Friday, March 6, 2009

فريق وسط البلد ونظرية الغريب

كنت بشوف من كام يوم برنامج "امريكان ايدول" وهو برنامج لإكتشاف المواهب زي البرامج الفاشلة اللي عندنا زي "ستار ميكر"مع الفارق الرهيب طبعا
المشكلة عندنا اننا في مجال الطرب داخلين علي مرحلة جديدة جدا وللأسف هتبقي كارثة طربية وده طبعا لدخول نظرية "الغريب " علينا.
دلوقتي ومن هنا ورايح سمحنا للغريب يدخل علينا ونقول ده فنان بداية من جورج وسوف لحد العسيلي ووسط البلد الله يحرقها أصوات.
ميزة البرامج الغنائية الأمريكية انها بجد بتدور علي سيلين ديون جديدة او ماريا كاري جديدة ومبينجحش فيها الا الصوت الرهيب
انما احنا بينجح عندنا امثال شاهيناز وايساف اللي لو دخلوا برة يتحدفوا بالصنادل
بشوف اصوات جميلة جدا في البرنامج الامريكي ده وتلاقي الراجل يقعد يألس عليه ويبهدله ويقوله انت مش مخلوق للطرب
قولت امال لو جورج وسوف قدم هيقولوله ايه ولا فريق وسط البلد
حكاية واسطورة الشخص الغريب دي مش موجودة عندهم..هتقولي يعني ايه الشخص الغريب..يعني مثلا محمد منير
مع ان اغانيه حلوة بس ده ممكن جدا كان مينجحش برة لأن كل ميزته هي كلماته الغريبة وهناك زي ما احنا عارفين كل كلمات اغانيهم اصلا غريبة وفي كل المواضيع ومحمد منير مكانش هيجيب جديد المهم الصوت الجامد والالحان الروعة
انما عندنا ناس تسمع وسط البلد يقولك واااااو ليه يا عم؟يقولك بيقولوا كلام جديد
يعني الحرمان عندنا من التجديد هو السبب في دخول الكوارث دي زي العسيلي الأخنف المجدد
كل ما تسمع برة شريط تلاقي الكلمات غريبة جدا وخيالية ورائعة وعندنا يقولك الشريط عامل ايه
واحد يقول يعني الشريط كويس في 3 اغاني حلوة!!!!!والشريط يكون 10 اغاني اصلا

يعني 3 من عشرة بيقولك معقول والسبع اغاني الباقية يقولك تخبيط ورقع وخلاص مافيش كلام
ولو مبطلناش اسلوب الكلام المتحنط ده ودورنا علي كلمات جديدة الفن عندنا هيموت
يعني مثلا للأسف اما تغني وتقول يا ملاك..يبقي الكوبليه الجاي اكيد..العمر معاك..
او بستناك..قلبي معاك
حبيبي..دايب في لهيبي..
روحي..داوي جروحي..
وهكذا من الملل المتواصل ..يا جماعة برة الأغنية فكرة معينة مش جمل بتترص وخلاص
يعني لو جمعت الكلمات علي بعض تطلع ناتج معين فكرة معينة
مش اوزان وقوافي وخلاص
وهو ده اللي عارفينه برة ولذلك البرامج دي بتطلع نوابغ زي كيلي كلاركسون مثلا وليونا لويس في الفترة الاخيرة وكانوا قنابل فنية

1 comment:

Anonymous said...

شاهيناز لو راحت امريكا بصوتها ده حتبقى اشهر مطربة عالمية لان صوتها من اقوى الاصوات واجملها في العالم العربي كله