اوعي العــالمي

احنا كل ما فيلم بينجح عندنا بنقول ياااه الفيلم ده جامد جدا ..لا ده شديد..لا ده عالمي ! ودي اقصي درجة ممكن نقولها في الافلام..
طيب برة بيقولوا ايه تخيل اتنين امريكان واقفين قدام السينما بيقولوا يا اخي الفيلم ده عالمي ..ايوه عالمي هيروح فين يعني ماهو عالمي يعني في امريكا واوروبا..

يبقي الامريكان قصدهم ايه بفيلم عالمي انه جه مصر يعني؟ ولا اتعرض في السعودية مثلا؟

وانا بكلم واحد من كام يوم بقولوا شوفت فيلم كذا "فيلم اجنبي " قالي اوعي ده فيلم عالمي ..جملة عجيبة اوي علي فيلم اجنبي ..يمكن عالمي عشان وصله مثلا من امريكا..وبما ان الفيلم طار من امريكا لميت غمر يبقي فعلا عالمي وعالمي قوي بغباء..!


وبعدين احنا عندنا الممثلين غير العالم كله كلهم في مشاغل غريبة جدا يعني مني زكي ملهية في الصابون وبتتخانق مع احمد حلمي ع العربية وعلا غانم في زيت شعرها اللي مجننها وحسن حسني وهالة فاخر اكيد في معسكر الزبدة الفلاحي علطول ونانسي عجرم واليسا مسكوا الدهب مش سايبينه حتي مهند ساب نور عشان يقعد يقول شعر للسيراميك يا عيني اتجنن باين ويحي ساب لميس وراح يعلن علي المفروشات وريهام عبد الغفور وداليا البحير دول مسكوا قطاع البوتاجازات وابو تريكة سر قوته شرب عصير تويست وبركات سر سرعته جبنة طعمة مثلثات .

طيب ايه الاعلانات اللي انت مش ممكن تتخيلها ؟ اقولك :

محمد الحلو يعمل اعلان لبان
علي الحجار يعمل اعلان مرسيدس
عمرو اديب يعمل اعلان جل شعر
سامي العدل يعمل اعلان مزيل عرق
مها احمد تعمل اعلان مستحضر تخسيس
عائشة الكيلاني تعمل اعلان مزيل حب الشباب
عمرو خالد يعمل اعلان قرية سياحية


اكيد ساعتها شركة الاعلانات هتضرب بالنار للاختيارات دي.

///////////////////////////////////////////////

***حاجة تانية بقي حكاية الانتماء في مصر اختلفت اوي عن زمان ..يعني كل شوية بتتشعب ومش عارف هتروح فين بعد كده كان الاول انت مصري ولا خليجي؟..وبعدين اهلاوي ولا زملكاوي ودخلنا في عصر انت تمراوي ولا عمراوي وبعدين العصر السخام بقي بتاع مسابقات التليفون علي مزيكا وميلودي
بقي السؤال انت تركساوي ولا جيماوي "نسبة الي جيم تيم وميلودي تريكس اشهر برامج المسابقات"
وبقي في فيس بكاوي ومارينز"نسبة لمارينا" وربنا يزيد ويبارك..

////////////////////////////////////////////////

***وبعدين في ناس تسألهم انت اهلاوي ولا زملكاوي يقولك بسرعة: زملكاوي؟
ايوه متستغربش من علامة الاستفهام هو بيرد كده لأن في ناس كتير تسالها ترد عليك في شكل سؤال ودول عندنا في مصر كتير اوي
تقوله كلت ايه انبارح يكون رده : ارانب ؟
انت في سنة كام يقول : تالتة؟
وتحس انك بتنبح في صوتك وانا قعدت مع واحد من دول وطلعت روحي كل سؤال يرد باجابته في شكل سؤال ودي مأساة في الحوار واللهي..

اسمك ايه؟
احمد؟

انت هتمشي؟
ايوه؟

/////////////////////////////////////////////////

***وبيكون الحوار كارثي لو مع بنت بالشكل ده من واقع خبرتي بالبنات "طبعا انا بكذب" بقول ان في تلات انواع في التليفونات:

النوع المتحفز وهو بتحس انه مستني الكلمة ومش هتفوت عليه وصاحية جدا للي بتقوله وبتحلله ومينفعش تثبتها بكلمتين "رخمة رخمة يعني"
والنوع النعسان وهو نوع نايم علطول حتي لو كلمتهاالضهر تحس انها نايمة ودي ممكن تقولها "علي فكرة بيقولوا عالجوا الاعوجاج الانفي لمحمد سعد" تقولك كلامك جميل اوي.
والنوع الحالم اللي ممكن يعيط في اي جزء في الحوار بدون سبب وبتكون معظم المكالمة "الو..الو..انتي معايا؟" "لا يا حبيبي معلش كنت بعيط"
والنوع البجح اللي تحس انك بتكلم واحد صاحبك وبتستعمل كلمات زي "ايه النظام ..قصر ..خلص..مرهمتني ..ثبتني ثبت..متنكش في الحوار ده..وكده يعني وهو اسوأ نوع غالبا.