كتـاب في حضرة الفيس بوك..رسالة من زميلك معتز

من ايام بعتلي علي الايميل احد القراء الأعزاء وقاللي "انا متابع لمدونتك بشكل دائم وبجد كتاباتك رائعة وانا بحب برضه الكتابة وبفكر اليومين دول اعملي كتاب وشوف جزء من اعمالي هابعتلك عشان تقيمه " !!!

وفعلا بعتلي بعض الحاجات اللي كتبها وقريتها ورديت عليه ..ولكن..اولا انا مبحبش اصدم حد.. ثانيا انا مش باولو كويلو يعني عشان اقيم حد.. ثالثا ياريت يا جماعة منهينش قيمة الكتاب ولكن نصقل الموهبة .

انا في الرسالة دي كنت بخاطب نفسي وبخاطب الناس كلها يا جماعة الموهبة بتلاقينا مش احنا اللي بندور عليها بالعافية ومش شرط تكون الموهبة يعني ابداع ولكن انك تكون موهوب حتي لو موضوع مافيهوش ابداع يعني في اسلوب عرضك وفكرتك وكل حاجة ..

عايز اقولكم اني من 9 سنين (الجملة دي بتحسسني اني عجزت قوي)  عملت كتاب !! ايوه فعلا كتاب ولكن مع نفسي ..ودي كانت اسوا تجربة ولحد دلوقتي بندم عليها وبقول كان فين عقلي ساعتها ..يعني رحت طبعت كتاب ووزعته ع الناس زي العبيط وكلهم قالولي حلو (وده شئ بيتقال للجميع طبعا لعدم الاحراج) ..!

الفكرة كلها اني قعدت اكتب شوية خواطر وكانت اول تجرب في حياتي  بتاعة مبتدأ بمعني الكلمة يعني اما اجي اقراها دلوقتي بضحك علي اللي انا كنت كاتبه زمان وازاي الناس قالولي تحفة !
بعد ما فاتت سنين في الاول حاولت اقرا كتير واشوف مستويات ناس تانية وحاولت احسن من نفسي وكل الناس تقدر تحسن من مستواها بالوقت والمقارنة مع الغير والقراءة ولكن محدش يستعجل ابدا ولا يضغط علي موهبته لو لسه في مهدها ..

دايما اللي بيكتب في الاول خالص بيكون الموضوع معاه زي الغرقان في بحر وبيخبط في كل اتجاه ..عايز يكتب..عايز يفجر ويخرج كل المكنون فيه بصرف النظر عن الاسلوب وقوة الكتابة في اول الطريق ..
ودايما لازم نصدق موهبتنا ولكن موهبتنا تكون مصدقانا برضه ..ولكن ازاي نصدقها ونبدأ فعلا نصقلها او نبعد عن الطريق ده من البداية لو كان مش لينا ؟
في مجالات ممكن تصقل فيها موهبتك وتنمو مع الوقت ومجالات تانية محتاجة موهبة فطرية فيها طبعا ..

الشعر مثلا..ممكن تتعلم الاوزان والقوافي وتبقي محترف ولكن مش شرط يطلع شعرك حلو يعني في النهاية ممكن يطلع "ركيك" .
ومجالات كتير قوي لازم متصدقش فيها حد الا نفسك وتقارن وتشوف وتلف في كل مكان وتشوف المستويات وصلت لفين وانت مستواك ايه حاليا .

انا بس هاقول بعض الافكار زي ما بعتها للزائر العزيز علي الايميل عشان افكر نفسي وافكر الناس كلها ان الواحد لازم يمشي علي الطريق صح من اوله قبل ما تفوت السنين ويرجع يقول ياريتهم ما وهموني !
ولكن هم مين ؟
دي بقي قصة العصر اللي احنا فيه ..عصر التطبيل الالكتروني ..كل واحد معاه مجموعة علي الانترنت اصحاب تلاقي "يا سلاااام علي الابداع" ويقولوا "مش ممكن ايه العبقرية دي" وده اللي مودي ناس كتير في داهية ودي بجد مشكلة كبيرة بنواجهها حاليا وهي "صناعة النجومية الزائفة" !

مصر مليانة مبدعين وموهوبين ولكن مش ممكن يكون ال 85 مليون عايزين يعملوا كتب !! لازم يكون الموضوع متقسم لان ربنا خلق الخلق ووزع الموهبة زي الرزق وكل واحد موهبته في حاجة معينة مش لازم الكتابة او الادب او غيره ..كل واحد موهوب ومبدع في حتة معينة ولكن الناس بقت شايفة ان موهوب يعني كاتب وبس وده مش صحيح !

الموهبة في كل المجالات طبعا ولكن "المطبلاتية" بتوع "مش ممكن يا عبقرينو" بيدوا للي بيكتب طاقة ساعات بتكون اكبر من حجم موهبته ويبدأ يقول بثقة "انا كاتب كبير ولازم اعمل كتاب" !
والمشكلة مش هنا ولكن المشكلة اما بيتصدم عند العرض علي المختصين ..يعني اما بالفعل تروح للمجال اللي انت بتكتب فيه وتعرض اعمالك وحد يقولك "مستوي بصراحة....."

وهنا هاقول بعض النصائح لنفسي ولكل الناس ولكل الكتاب اللي نفسهم يشوفوا نفسهم كتاب بجد في يوم من الايام وحلم الشهرة بيراودهم :


أولا :

 متصدقش ابدا حد من اللي حواليك بيقولك "انت عبقري" مش عشان هم كدابين ولكن هو مش مجالهم ..يعني واحد كاتب كلام منعكش وواحد تاني شافه ومالوش في النثر او الشعر اكيد هيقوله الله ايه الكلام الكبير ده ! فالفكرة كلها انك لازم تكلم مختصين ولو مش مختصين قوي يبقي علي الاقل حد ماشي في السكة دي عشر سنين او اكتر عشان يقدر يحكم انت في اي جزء من الطريق ..
اكبر خطيئة بيعملها الكاتب في بدايته انه يسال ناس حواليه والسلام ..هم اصحاب ايوه ولكن في الكتابة بالذات مينفعش تمشي ع المثل اسال مجرب ولا تسال طبيب ..لا لازم تسأل الطبيب ..


ثانيا :

حط نفسك في موضع مقارنة دايما ..يعني قارن مستواك واقرا كتير جدا في كل مكان حسب الطريق اللي انت ماشي فيه يعني لو شعر مثلا اقرأ لشعراء كبار وبعدين اقرأ لشعراء موهوبين مشهورين علي الانترنت وابدا بوضع اعمالك متخافش بس وضع اعمالك قدام الناس دي مش قدام ناس بتقول علي كل حاجة حلوة .


ثالثا :

الحكاية مش عدد .. يعني مش معني اني كتبت متين صفحة او اكتر اني مبدع ..ابدا.. ممكن صفحة واحدة تكون بالف صفحة تانية كلام عادي ومستواه ضعيف يعني الحكاية مش برص الكلام والحروف ولكن بالحرفية فيه .


رابعا :

اوعي تبص لنفسك انك عبقري..دي بداية الضياع دايما شوف اللي فوقك ..يعني لو حد قالك في الشعر مثلا "ايه العبقرية دي" قول "امال "كذا" يبقي ايه"
وكذا ده يبقي واحد انت متابعه وقاري كل اعماله
وحتي لو عديته بعد كده حط لنفسك سقف جديد لحد ما يبقي مثلا يقفك "امال نزار قباني يبقي ايه"
يعني طول ما انت بدون سقف هتحاول ترفع من نفسك انما لو شوفت نفسك سقف ابداعك يبقي انت هتفضل تحت سقف ابداعك ولو كان ضعيف !


خامسا :

امشي في الطريق الصحيح..
يعني لو بتكتب ع الفيس بوك ونجحت نجاح مبهر يعني قدام ناس كتير ابدا اعمل مدونة..
ولو كانت مدونة خش ع السكة اللي بعدها..
ولو لقيت انك نجحت في كل السكك دي ابدا اتكلم عن الكتاب.


سادسا:

لازم تعرف عشان محدش يخدعك ان المنافسة محتدمة جدا عشان تعمل كتاب ..
يوميا عدد رهيب بيتقدم عشان يعمل كتاب وطبعا الغربال بيشتغل وبياخدوا مواهب معينة وحاجات شايفينها هتكسر الدنيا مش اي كلام مكتوب وخلاص لان العالم كله بيكتب دلوقتي ولكن الفكرة بتكتب ايه ..


سابعا :

سيبك من خطوة انك تنزل بكتاب مع نفسك وتوزعه ع الحبايب لانه كتاب مش شوية موز لعيان !!
لازم تحترم قيمة وكلمة "كتاب" ويا اما تنزل كتاب بجد قدام الناس كلها يا اما تستني وتنشر اعمالك الكترونيا وخلاص وكفاية لان موضوع الكتاب اللي بيتوزع بحس ان فيه نوع من العفينة ..او هتقرا كلامي بالعافية يعني..
او نوع من "انا هاكتب بفلوسي" لان اي حد ممكن يحط اي حاجة في دور نشر ويعمل غلاف ويظبط الدنيا ويرش ع الحبايب ..


ثامنا :

اوعي تكذب علي حد ابدا حتي لو هتصدمه..
يعني لو واحد ناشر قصة ومعجبتكش قوله في وشه "وحشة" ده احسنله لانك ممكن تخليه يتمادي في طريق مش بتاعه ويتصدم صدمة اكبر في نهاية ويقول انت السبب لانك خدعته وحسسته انه كاتب كبير قوي .


تاسعا :

 لو حد قالك انت كاتب رهيب قوله "مقارنة بمين يعني" !
لازم تقارن عشان تحاول تمشي في طريق صح..


عاشرا :

التدريب الكتير والهوامش بتاعتك مهمة جدا في اول الطريق..
لازم يكون ليك ولو نوتة حتة تكتب فيها افكارك والكاتب الكبير "احمد خالد توفيق" اتكلم قبل كده عن افكاره اللي بيدونها في الورق في مقالة رائعة ومفيدة جدا..
يعني تدون افكارك او رؤوس اقلام وتبدأ ترجعلها ومش اي حاجة تكتبها وخلاص لازم تصفي الافكار دي وتشوف الرائع فيها ..


حادي عشر :

انا بنصح بس من منطلق اني من سنين غلطت نفس الغلطة وكنت مستعجل وعشان كده بقول "امشي علي مهلك" وخد وقتك خالص
مش بقولك اخرج عن الطريق ولكن بقولك "إبدأه صح"
الكتابة مش ماراثون توصل فيه الاول ..في الكتابة ممكن توصل خط النهاية حتي لو ماشي ببطئ ولكن ابداعك هو قفزتك ..


ثاني عشر :

انت بتقول انك كتبت علي الفيس بوك قدام اصحابك وقالولك رائع ..ده مش كفاية..
لازم تخرج للعالم مش تقفل علي نفسك عالم..
لو بتكتب خواطر مثلا او قصص اخرج لكل اللي حواليك اللي بيكتبوا في المجال ده من سنين طويلة واسالهم ايه رايكم وهم هيقولوك درجتك ايه هل انت هاوي ولا موهوب ولا مبدع ولا ياريت متكملش..
انما لو سالت اي حد وخلاص اكيد اكيد اكيد هيقولك روعة الروعة يا ابني لانه بيحكم برأيه في اتجاه هو اصلا ممكن ميكونش غاويه وميعرفش فيه وميعرفش المستويات والمنافسة وصلت لفين ..


ثالث عشر :

متاخدش كلام الل بينقدك انه بيهبطك زي ما بيقولوا او بيكسر مجاديفك بالعكس ممكن فعلا عايزم متتوهمش وتفوق وبيقولك رسالة "حاول تطور اكتر"
ممكن يكون نقده معناه "انت موهوب بس محتاج شغل اكتر ده مينفعش"
بدل ميقعد كل حرف تكتبه يقولك مواويل ويغني عليك هو بيقولك الحقيقة في نقده ولازم تسمع الجميع عشان تعرف القصور فين..


رابع عشر :

كان اوسكار وايلد بيقول انك تحط موهبتك في العمل وعبقريتك في الحياة..
لكن لازم تعرف موهبتك في اي عمل الاول..
يعني هتمشي في اتجاه القصة ولا الشعر ولا الكتابة الساسية ولا انت متعدد مثلا ولا ماشي في اي طريق عشان تركز موهبتك فيه ..


خامس عشر :

محدش بيحاربك لانك مش كاتب كبير !
لازم تعرف اني عشان بقولك اهدا وفكر وركز وزود موهبتك اني مش بهاجمك لانك مش كاتب مشهور ولا انا ولا انت فالفكرة انك لازم تسمع وكلنا نسمع مع بعض دي نصيحة من اخ كبير مش من كاتب كبير ولا حاجة انا علي قد حالي مجرد مدون .. ولكن دايما بقول الحق وصريح ..انت محتاج شوية مجهود عشان توصل لاحسن ما فيك ..
وتاني بقولك متصدقش حفلة الطبل اللي حواليك..لان الحفلة دي في كل مكان وفي كل صفحة فيس بوك ..كل واحد ليه المولد بتاعه وكله بيصقفله حتي لو كان المولد وهمي ..


سادس عشر :

انا مش عارف اشمعني سألتني انا بالذات ولكن اسأل غيري كتير قوي ..
اعمل زي كده كتير وفوت علي كل المدونات وقولهم ايه رايكم وفوت علي كتاب كتير قوي في مصر وفي العالم لاعربي وقولهم ايه رايكم واكتب اكتر واشعل موهبتك وحماسك اكتر لحد ما الكل يقولك "ممتاز"


سابع عشر :

اخي الكريم انا سعيد انك بتسأل عن رأي اخرين خارج نطاق فيس بوك الخادع ..وهو ده الصح انت كده ماشي صح جدا..
زي ما قولتلك انا مجرد مدون عادي جدا ولكن سعيد انك سألتني وياريت تسأل غيري كتير وتشوف الاجماع هيكون علي ايه ورايهم ايه كلهم..
وسعيد بزيارتك ومش بس كده انا عايز رايك انت كمان فيا..مش انا اللي اقول راي انا ممكن اكون بقالي كتير بكتب ولكن لسه يوميا بسال الجميع ايه رأيكم..ولازم السؤال ده تفضل تسأله طول عمرك حتي لو بقيت يعني يوسف ادريس التاني يا عم في قصصك دي واتمني ليك التوفيق وتكون كاتب كبير ومحترم مش كاتب في حضرة الفيس بوك ..


من زميلك معتز..
اتمني اكون افدتك برأي والمرة الجاية عايزك تبهرني ..
وكلنا علي نفس الطريق ..ماشيين مع بعض خطوة في خطوة..
خطوات ولو حتي مرتعشة علي طريق الكتابة المقدس..
الي لقاء اخر يا عزيزي ..