شخصيات مصرية خزعبلية ولا فراخ الجمعية

في اسامي كتير بنسمعها كل يوم في كلامنا ومنعرفش مين دول ..اسامي بنكهة مصرية جدا وعمرك ما هتسمع الاسامي دي في اي دولة تانية..
ساعات بنضرب بيهم امثلة..ساعات بيكونوا حتة من اغنية وساعات بيكونوا افتكاسة وساعات بيكونوا اسامي دلع مالوش معني زي مثلا "أبو علي" دايما حسن يبقي ابو علي ..ساعات بيكون نتيجة تاثر بشخصيات في تاريخنا الاسلامي لكن احنا بنقولها بالفطرة كده..كل حسن ابو علي ..وكل يوسف يتقاله "جو" عشان يوسف شاهين في راي بعض الناس..وكل "ابراهيم" بيبقي علطول تلقائي كده "ابو خليل" .

مش بس بنغير في الاسامي ده احنا بنحب ننطق حتي الكلمات بميت طريقة زي شجرة اما ناس بيقولوا عليها "سجرة" ..وكلمات تانية كتير ولهجات متعددة..
لكن من ابرز الاسامي اللي معلمة في حياتنا في مصر هي :


** عيشة وام الخير :

ده مثل مصري بيتقال فيه "اللي في عيشة تاخده ام الخير" ودايما نسمع اسامي عيشة وام الخير ومحدش يسأل مين دول بالظبط وايه قصتهم زي خيار وفاقوس بالظبط لسه كله بيسأل يعني ايه فاقوس !


** عم خليل بيسقي الورد :

دي كانت حتة لاغنية من اشهر اغاني مصطفي قمر زمان والاغنية دي معلقة مع اجيال من المصريين وحافظينها يمكن حاجة تفكرهم بايام كان في شوية غني بدل العك بتاع دلوقتي مع ان مصطفي قمر مش قديم للدرجة ولكن بقي بيتقال فين ايامك يا مصطفي بتاع زمان ايام اغنية البحر وغيره مش الهري بتاع اليومين دول .


** احمد والحاج احمد :

دايما الناس تقول "احمد زي الحاج احمد" والجملة دي ف مصر باستمرار خصوصا ايام التغييرات الوزارة طبعا لان دايما احمد زي الحاج احمد مع انها جملة توحيلك بالمساواة والعدل الا انها عند المصريين جملة تفيد ان "مافيش فايدة"


** أمورة بابا رشا :

كانت اغنية خنيقة قوي من فترة الطفولة من ايام سوسة سوسة كف عروسة والاغاني اللي كانت في زمن فيه الطفولة حقيقية مش اطفال سبيس تون .


** خير في سلامة :

علطول في اي حوار او صفقة اتنين بيعملوها مع بعض تسمعه بيقول للتاني خير في سلامة وسلامة في خير وفي فيلم قديم ابيض واسود بالاسم ده .


** ريمة لعادتها القديمة :

غالبا الجملة دي بتتقال في البيوت وعلي الحكومة برضه كل ما الحكومة توعد بحاجة  وترجع فيها في النهاية كالعادة او اي زوجة تعمل اكلة حلوة وبعدين ترجع تلخبط كالعادة في المقادير يتقال رجعت ريمة لعادتها القديمة .



** تنتون وتنتن :


دول بقي اشهر شخصيات مصرية الجملة مظهرتش من زمان قوي يعني بس من اشهر الجمل في مصر "اتلم تنتون علي تنتن واحد نتن والتاني انتن" !
يمكن برة عندهم بات مان وبيتر بان احنا عندنا تنتون وتنتن !


** ناقر ونقير :

في كل مكان ناقر ونقير في البيت في المدرسة في الجامعة دايما تلاقي ناقر ونقير ماشيين خلف خلاف زي الحكومة والشعب كده برضه .


** سلامتها ام حسن :

جملة بتتقال فياي وقت من الجمل المصرية اللي بتترمي في اي اتجاه واحد مثلا يقولك "الحكومة هتعمل علاوة" تلاقي التعليقات غريبة قوي واحد يقول "مافيش احسن من لبن الام"  والتاني يقول "سلامتها ام حسن" من غير ما تعرف ايه علاقة ده بالخبر !


** الحلوة خوخة :

طبعا علي اي عربية نقل هتلاقي الجملة دي من اغنية شعبيةقديمة بتقول "الحلوة خوخة جت بعد دوخة" طبعا بعض الناس خدتها علي اساس انها حكمة عميقة مثلا وخلوها علي العربيات اكتر من صورة جيفارا علي التي شيرتات !


** حسن ابو علي :

ده بقي سرق المعزة !!
في اغنية شعبية برضه يتقال حسن ابو علي سرق المعزة وطبعا اي حسن اصلا هو ابو علي بالفطرة .


** أم قويق :

دي بقي اكيد اشارة غالبا للزوجة !
كل زوج بيقول علي مراته ام قويق ويقول انا خارج وسايب البيت لام قويق ونطاط الحيط وده من كتر الزن علي الودان في البيوت اللي بيطفش الرجالة وبيندمهم علي الجواز .


** خضرا الشريفة :

هي جملة ليها حكاية قديمة لكن المصريين مسكوها علي اساس انها سخرية من اي واحدة لا مؤاخذة وتعمل نفسها شريفة يتقال عليها "بتعمل نفسها خضراالشريفة " !
وعكسها جملة شعبية مصرية مش تمام يعني وغرضها مش شريف وبيقولوا ساعات ناس مش ولابد لفظ "فايزة لسه عايزة" !!!



** زيد وعبيد :

ولا زيد ولا عبيد زي كده ما يتقال ولا كاني ولا ماني ولا دكان الزلاباني .
وقريب ليهم الاتنين ما اسخم من ستي الا سيدي !





يعني دول شخصيات خزعبلية اخترع مصري اصيل دايما يتقالوا في وسط الكلام من زمان قوي وبقوا من اشهر الالفاظ والجمل المصرية .