Monday, June 4, 2012

جعلــــــوه مقــدســـــــا





القضاء مهنة ليها هيبتها واحترامها وليها تاريخها القديم العريق من قبل الميلاد ومنذ وجد الانسان علي الأرض..ولكن من الكلمات اللي بقينا نسمعها كتير في العالم العربي "لا مساس"  و  "لا تعقيب"  علي احكام المحكمة !

فعلا لا يمكن المساس والتعقيب علي أي حكم طالما القاضي محل ثقة مطلقة وهو ما لا يمكن حدوثه لان مافيش بشري أبدا له كامل الثقة او تكون الثقة له اشبه بالمبايعة !
الفكرة ان المهنة مقدسة دي حقيقة ولكن الاشخاص مش مقدسين يعني القانون هو اللي مقدس وهو اللي فوق الجميع مش القاضي نفسه لان اي مهنة ليها اللي بيتبعوا معاييرها وبيخافوا ضميرهم وفيها اللي يتبعوا هواهم بس وعشان يكون كلامنا عليه امثلة لازم نعرف ان القضاة لو كانوا ليهم الثقة المطلقة مكانش حد نصحهم او وجه ليهم رسالة..يعني إيه ؟ يعني في اكتر من عصر هتلاقي كتب كتير بتكون كلها موجهة بالعشرات من النصايح للقضاة لان منصبهم حساس جدا وكلمتهم ما بين الجنة والنار وعشان كده القاضي من اهم المهن في العالم لان حياة ناس كتير في ايديه..



طبعا سمعنا عن الحديث اللي بيقول  "قاض في الجنة وقاضيان في النار" وكمان اما تقرا كتاب "عبقرية عمر" هتلاقي ان عمر بن الخطاب وجه نصايح كتير قوي للقضاة وهلخصها في شكل نقاط بسيطة .
نصائح عمر للقضاة :

1- آس بين الناس في مجلسك وفى وجهك وقضائك حتى لا يطمع شريف في حيفك ولا ييأس ضعيف من عدلك

2- البينة على من أدعى واليمين على من أنكر ، والصلح جائز بين المسلمين إلا صلحا أحل حراما أو حرم حلالا ولا يمنعك قضاء قضيته بالأمس فراجعت فيه نفسك وهديت فيه لرشدك أن تراجع فيه الحق فإن الحق قديم لا يبطله شيء.

3-والرجوع إلى الحق خير من التمادي في الباطل ومن ادعى حقا غائبا أو بينة فأضرب له أمداً ينتهي إليه ، فإن بينه أعطيته بحقه وإن أعجزه ذلك استحللت عليه القضية ، فإن ذلك أبلغ للعذر وأجلى للعمى.

4-الفهم فيما أدلى إليك مما ورد عليك مما ليس في قرآن ولا سنة قم قايس الأمور عندئذ وأعرف الأمثال ثم أعمد فيما ترى إلى أقربها إلى الله وأشبهها بالحق ، المسلمون عدول بعضهم على بعض إلا مجربا عليه شهادة زورا ومجلودا في حد أو ظنيناً في ولاء أو قرابة ، فإن الله تولى من عباده السرائر وستر عليهم الحدود إلا بالبينات والإيمان

5-وإياك والغضب والقلق والضجر والتأذي بالخصوم والتنكر عند الخصومات فإن القضاء في مواطن الحق مما يوجب الله به الأجر ويحسن به الذكر فمن خلصت نيته في الحق ولو على نفسه كفاه الله ما بينه وبين الناس ومن تزين بما ليس في نفسه شانه الله فإن الله تعالى لا يقبل من العباد إلا ما كان خالصا فما ظنك بثواب عند الله في عاجل رزقه وخزائن رحمته.


نصائح هامة قوي قالها سيدنا عمر بن الخطاب لازم تكون امام كل قاضي في عالمنا عشان فعلا يقدر يحكم بالعدل والحق .





وكمان ابن خلدون كان ليه عدة نصائح للقضاة في كتاب اسمه "مزيل الملام عن حكام الأنام" وقسمه عدة فصول كل فصل جواه "تنبيهات" يعني هتلاقي فهرس الكتاب كله "تنبيهات" للقضاة .
من بعض التنبيهات دي مثلا زي ما هتشوف في فهرس الكتاب :
1-حسن التأدب... وقضاء الحقوق
2- الحذر التام من مصاحب... إلى أغراض فاسدة
3-شدة الحذر من حبيب لا رأي له يأمر بالسوء
4- محاسبة النفس بعد القيام من المجلس
5-إن الأناة من الله والعجلة من الشيطان
6-إذا لم يتبين القضاء لغبش في الواقعة استوضحها
7-تصور الواقعة كالشمس ليس دونها حجاب.

وعمل في الكتاب باب كامل متقسم اقسام اسمه "التنبيه على رذائل أخلاق وأحوال تولدت من الولاية أوقعت في ذم الحكام وانكساف نورهم". وقسمه لثلاث أقسام لتحذير الناس من الوقوع فيهم .




وكتير من كتب الفلسفة هتلاقي فيها نصائح للقضاة لانها مهنة حساسة جدا في العالم كله ولكن دائما النصح واجب ومينفعش لو حد وجه كلام للقاضي يعتبر انه اكبر من النصح لان مافيش حد أكبر من القانون ولا اكبر من النصح والدليل علي ذلك وقوع بعض القضاة حول العالم في أخطاء قاتلة وفضائح في كل مكان ودول ممكن يكونوا قلة بس يعني بيحصل والغرض ان مافيش حد في الدنيا فوق القانون ولا قاضي ولا رئيس دولة وشوفنا امثلة كتير جدا برؤساء الدول الفاسدين ودلوقتي نشوف بعض الأمثلة علي وقوع القضاة في بعض الفضائح :


1-محاكمة قاض متهم بتعذيب خادمته في المغرب.

2-الجنايات تقضى بسجن وكيل نيابة متهم بالرشوة 10 سنوات

3-قاض أمريكي يقر بشراء المخدرات لراقصة تعر "دي كانت فضيحة شهير جدا هي وفضيحة الفيديو اللي شافه الملايين حول العالم للقاضي اللي بيعذب بنته بالضرب"

4- خبر في السعودية بيقول كمان : جدلا واسعا حول القاضي المتورط في قضية فساد مالي ضخم كان ضحيته عشرات المواطنين، دافع القاضي فيها عن نفسه بأنه كان مسكونا بالجن ويعالج منها حاليا بالرقية الشرعية !

5- فضيحة اسمها
Kids for cash scandal

ودي كانت فضيحة كبيرة جدا وشهيرة اما القاضي كان بياخد رشاوي تتخطي ملايين الدولارات من اصحاب الاماكن الخاصة باعتقال الاطفال واتعاقب ب 28 سنة علي الرشاوي اللي خدها لحبس الأطفال بدون اسباب واضحة او دون ما يعطيهم حقوق كاملة .

6- في الصين كان في تسع قضاة اتهموا بالرشوي برضه وفي الفلبين قاضي كانت ثروته 25 مليون دولار حاططهم في اكتر من عشرين حساب واتكشف ان كان ليه فضائح مالية في معاملات مشبوهة .

7- رئيس احد المحاكم بالاسماعيلية كان متهم بالاتجار بالسلاح وحيازته المخدرات بغرض التعاطي كمان .


بالأمثلة دي وحتي لو هم قلة اللي بيخرجوا عن النص لكن في كل مهنة من يخرج عن النص يعني مافيش حد مقدس الا الله والقانون .

وفي كل الدول بيستخدموا وسائل كتير لقياس القدرة علي العمل القضائي زي السعودية اللي في الفترة الاخيرة استحدثت اختبار لقياس القدرة علي العمل الصعب ده والحالة النفسية والسلوكية للمتقدمين لهذا العمل وفي كل الدول هتلاقي وسائل كتير واختبارات متعددة لانهم عارفين ان المسئولية كبيرة جدا .

وفي ناس كتير بتسأل ليه القضاة ميطلعوش ويقولوا تصريحات عن القضية او يحاولوا يوضحوا للناس الصورة بشكل كامل ! لكن الموضوع ده كان ليه تاريخ طويل من الخمسينات كانت البي بي سي عايزة تعمل برنامج عن القضاة العظماء في الراديو وعايزين قاضي يقدموا وقالوا الطلب ده ل "اللورد" عشان يسمح ليهم وظهرت قواعد تحكم الموضوع اسمها

The Kilmuir Rules

واتكلمت القواعد دي عن ان صمت القاضي وبعده عن الاعلام بيحافظ علي هيبته وسمعته ومش بتخليه محل نقد دائم ولكن القاضي ممكن يظهر في بعض المناسبات عشان يخاطب الجمهور اما يكون في طلب من جهات اعلامية محددة وبعد موافقة اللورد وميكونش الخطاب عن القضية اللي شغالة طبعا .

ومن بعد القواعد دي في الخمسينات اتطور الوضع وقناة "ايه بي سي" ظهر فيها قاضي كبير اسمه "انتوني ماسون" ومن بعدها قضاة كتير طلعوا اتكلموا في البرامج عن حياتهم وعملهم كقضاة .

وفي انجلترا كمان في التسعينات عملوا كتاب ينظم طريقة تفاعل القضاة مع الميديا في قواعد محددة..ومبادئ استقلال القضاء في الامم المتحدة كان فيها بند عن حرية التعبير للقاضي وبيقولوا في البند بشكل واضح :


In accordance with the Universal Declaration of Human Rights,
members of the judiciary are like other citizens, entitled to freedom of
expression, belief, association and assembly, provided, however, that in
exercising such rights, judges shall always conduct themselves in such
a manner as to preserve the dignity of their office and the impartiality
and independence of the judiciary



واتكلمت القاضية مارجريت ماكماردو عن الثقة في القضاء وضرورة ان القاضي يقدر يوعي الناس بالقواعد اللي بتنظم المحاكمة وبعض المعلومات القانونية الاساسية اللي يقدر يدي الناس اقدر قدر من الثقة في سير العملية داخل المحكمة في اي قضية .
وثقة الناس بتكون هامة خصوصا لو كان الحكم غريب عليهم او مش متوقعينه ولكن عشان كانوا عارفين القواعد عن طريق توعيتهم وتزويدهم بالمعرفة بيخليهم يتقبلوا الحكم أي كان .
وده بيسموه
judicial
legitimacy


والقاضي اكيد مبيتكلمش عن قضية شغالة بالفعل داخل المحكمة امام الرأي العام ..واتكلمت القاضية مارجريت في تقريرها ان القاضي مبيتكلمش عن قضية بالفعل داخل المحكمة للميديا بشكل عام لان ده ممكن يسبب لغط كبير .


القضاء مهنة مقدسة وليها تاريخها المشرف منذ فجر التاريخ ولكن لازم نعرف انهم بشر يصيبون ويخطئون أيضا وان القانون هو اللي لازم يكون الشئ المقدس مش اللي بيطبقوا القانون نفسهم وانا اتكلمت عن الموضوع ده بسبب كتر الكلام ده في كل البرامج اليومين دول ان لا تعقيب علي احكام القضاء وان القضاء لا يمس وان قدسية القضاء شئ اساسي ..كل ده صحيح لكن لازم نحط في اعتبارنا برضه ان في قضاة ممكن يخطئوا وهم مش منزهين عن الخطأ وده في كل دول العالم والقانون فوق الجميع .

2 comments:

Anonymous said...

فعلا لازم يكون القانون هو المقدس وليس من يطبقونه زي ما انت بتقول ..لك كل الاحترام والتقدير كتابات متميزة جدا ومدونة رائعة بارك الله فيك ودام ابداعك

Blogger said...

QUANTUM BINARY SIGNALS

Professional trading signals delivered to your cell phone every day.

Start following our signals right now & gain up to 270% per day.