Sunday, July 21, 2013

رمضـــانيات 2





** مسلسلات رمضان السنة دي كلها حد بيدور علي عياله زي غادة عبد الرازق اللي ابنها ما يعرفش انها امه او عادل امام اللي بيدور علي ولاده او مسلسل الشك اللي فيه مي عز الدين بتدور مين ابوها الحقيقي ..
واضح ان في مشكلة في مصر في شهادات الميلاد او المفروض كل المسلسلات تبقي ب "تتر" واحد اللي هو اغنية "انا مش عارفني انا تهت مني انا مش انا" !!



** مسابقة قناة الحياة بتاعة مسلسليكو اما المذيعة بتروح للناس البيت وتديهم ال 100 الف جنيه بتشوف رد فعل عجيب من الناس يعني كان الافضل تكون مفاجأة فعلا انما ده باين عليهم انهم عارفين من قبليها بشعر ايام كده مثلا..بيفكرني بمشهد خالتي اطاطا اما بتقولها "اقفلي الباب يا حاجة وافتحي كأنك ما تعرفيناش"  فتقوله "حلوة المفاجأة دي؟" 



**خبر بيقول انهم بيدبحوا عجل في رابعة العدوية ..ده طبعا بعد خبر كحك العيد بتاع صفوت حجازي مش عارف ايه موضوع الاكل مع الجماعة يعني بدأوا بسكر وزيت ودلوقتي بقي عجل وخروف دلوقتي الواحد فهم هم يقصدوا ايه ب "شرعية الصناديق" ..الظاهر بطريقتهم هم يعني "صناديق الوجبات" .



** الوزيرة اللي قلبت الدنيا اللي كانت هتمسك الوزارة وفي الاخر ما مسكتهاش "داليا السعدني" كانت حديث الساعة الايام اللي فاتت
 الظاهر النقلة كانت هتبقي كبيرة قوي من ام ايمن وعائشة عبد الهادي زمان الي داليا السعدني .
وده يؤكد ان الحكومة المصرية زي ما بيقولوا "مش وش نعمة" 



** واحد من اوائل الثانوية العامة بيقول "امنيتي ان مرسي يرجع رئيس"
وده يخلينا نقول الجملة المشهورة "الله يخرب بيت التعليم المجاني"



** برنامج اسمه "يا ثورة ما تمت" بيفكرني بمتظاهرين رابعة العدوية اللي كل ما يتحركوا في حتة يتقابلوا بغضب الاهالي منهم ونفخهم في كل مكان ..
"يا مظاهرة ما تمت"  و "يا علقة سخنة تمت"



** البلتاجي عمل حكومة وشكلها من علي منصة رابعة وعين نفسه رئيس جمهورية وهو في اشارة رابعة في قلشة كوميدية من اخراج بديع..
كل واحد يقعد علي الكمبيوتر دلوقتي ويطلع ورقة يعين نفسه فيها رئيس جمهورية والمسخرة في الموضوع انه عين نفسه كمان في اربع وزارات وصفوت حجازي في كام وزارة كده..
ماشي بنفس اسلوب الزيت والسكر بتاع الجماعة وبقي رئيس جمهورية اشارة رابعة وحتي دي مش باغلبية لان كل الاهالي في منطقة رابعة كارهينه اساسا..
عامل زي سعيد صالح في المسرحية اما قال "ما انا فتحت المدرسة بنفسي ودرستلي"


** طيارة هليكوبتر من الجيش كانت بترمي جوايز علي الناس قدام الاتحادية ..
اكيد كان في ورق مخصوص للجماعة في رابعة برضه "مبروك كسبت خروف هدية"



** جوجل طلعت تكذب انها تعرف اعداد المتظاهرين او قدرتهم زي ما قال بعض الاخوان..
حتي جوجل بيفبركوا ليها تصريحات زي ام بيقعدوا يفبركوا اخبار عالمية والجرايد موجودة اساسا قدام الناس وهم يترجموا العناوين بالطريقة الاخوانية ..الانجليزي الفنكوشي بتاعهم طبعا..
حتي اردوغان حبيبهم اللي خايف علي نفسه اليومين دول من ساحة تقسيم اتعدي منهم في كذب التصريحات وقال انا قولت للبرادعي انت ايه صفتك وطلع البرادعي اصلا مقابلوش خالص ولا طلب مقابلته..
والغريب ان كل ما يتضربوا يقولوا ليه كده احنا كنا بنصلي ويشتغلوا العالم ..
اظن ان بعد ما فبركوا لجوجل اكيد جوجل هتفبركلهم برضه علي طريقتها وكل ما تبحث عن كلمة "كذاب"  يطلعلك  "هل تقصد الجماعة؟؟"  !!



** برامج المقالب السنة دي زي برنامج "السيرك " وغيرهم مش برامج مقالب دي برامج "مقلب" ..
حتي حسين الامام عامل برنامج اسمه "بالبيجاما" الظاهر انه اما تخن قوي كده كسل حتي ينزل اللوكيشن فعمل البرنامج في البيت بالبيجاما !!



** كتر الشتايم في مسلسل "حكاية حياة" بشكل اوفر او زعيق روجينا عمال علي بطال بدون اي سبب يخلي الحل في المسلسل ده كتم الصوت ع الاخر وسيب الصورة بس عشان الديكورات مش اكتر ..
الكوميدي في المسلسل ان الشخصية الوحيدة المحترمة فيه تقريبا او اللي مش بتخون حد هي "رزان" ومن سخرية القدر انها عاملة دور "قوادة" 
مسلسل حلو بس حقير حقير يعني مش عارف ازاي..



** لو خدت اسامي المسلسلات السنة دي علي الشخصيات السياسية هتلاقي :

مزاج الخير  "بديع"
اسم مؤقت  "عدلي منصور"
الرجل العناب   "السيسي"
حاميها حراميها  "مرسي"


1 comment:

Sarah Habib said...

ver nice one keeeeep on :)