Sunday, August 4, 2013

رمضـــــانيــــات 3






** من الاعلانات الغريبة جدا اعلان بورتو اللي بيعلن عن فرع بورتو في سوريا !!
اظن اعلانات المدن الجديدة والقري السياحية كترت قوي وبقت اوفر وكأن الشعب لقي فجأة كنز في المغارة ومحدش واخد باله ..
حتي لو كان المشروع من سنين بيتم تنفيذه في سوريا لكن وقت الكلام اصلا عن جملة "بورتو سوريا" مش وقتها خالص دلوقتي..
 وسوريا اساسا معادش فيها مكان سليم نحب نقول لصاحب الاعلان "كلك نظر" !!



** مسلسلات رمضان السنة دي ليها هدف واحد ان كل واحد يخلي باله من لغاليغه..او يخلي باله من ال "دي ان ايه" بتاعه !!
 الناس كلها مش لاقية امها ولا ابوها يا عيني ومش عارفين مين ابوهم الحقيقي ..
عماد حمدي يوم ما ضرب عبد الحليم في الخطايا كانت حاجة جديدة قوي لكن لو رجع تاني عماد حمدي اليومين دول يمثل في المسلسلات هيلطش في كل ابطال المسلسل !!



** طالما العيد قرب تعرف علطول ان افلام العشوائيات هتشتغل.. وطبعا مين ملك العشوائيات او سينما العشوائيات ؟؟ هو "السبكي"..
كالعادة بطل فيلمه المفضل اللي عمل عبده موتة والالماني بيكمل مشواره في فيلم اسمه "قلب الاسد" ..
ويبقي محمد رمضان هو اخر سلالة "الاسطمبة" اللي بدأها محمد سعد في اللمبي وكملها مصطفي شعبان في العار ..
ممثلين الاسطمبة دول اللي هم حافظين مش فاهمين بيمسكوا الدور ما بيخرجوش منه كانه عمل ما بيتصرفش منهم..
ولو سألت واحد فيهم يقولك اصل عجبني الورق.."حابس حابس وشالله يا ورق"



** أجمل حاجة في مسلسل فرح ليلي رغم المط والتطويل غير تمثيل ليلي علوي المتميز هو اغاني المطربة الرائعة "مريم صالح" ..
صوت قوي فيه شجن واصالة زمان بالاضافة للمسة الحاضر والحان متميزة تشبه الحان فرق عظيمة زي
radiohead
أو
coldplay
وغيرها من الفرق المميزة اللي بتتميز بغرابة الكلمات وسحرها وعمقها وجمال اللحن وسلاسة النغم..



** خبر مسخرة بيقولك الجيش الهندي قعد يراقب كواكب الزهرة والمشتري 6 شهور وكان فاكر انها طيارات تجسس ..
عاملين زي الاخوان بتوع رابعة العدوية اللي عملوا طيارات لعبة بتتباع في الشوارع برة وعاملين فيديو انها اختراع وكده يعني ..
الظاهر من كتر ما هم قاعدين في قمقم مش متابعين العالم برة وافتكروا ان طيارة بالريموت يتقال عليها اختراع
عايز اقولهم علي رأي اعلان موبينيل زمان "انت فاتك كتير"



** منصة رابعة العدوية تعلن تغيير علم مصر !!
واكيد شعارهم كان "شيلوا النسر وحطوا خروف خلوه يحكم بالمعروف" !!




** في مسلسل "الشك" هياتم طلعت حامل..
هياتم في السن ده طالعة في دور واحدة حامل..
وده ليه احتمالات كتير زي مثلا ان يكون انا اغني من بيل جيتس
او ان روني يعمل عقد مع الزمالك
او ان مرسي يرجع للرئاسة !!




** اعلان البنك الاهلي بتاع "عايز بسطرمة و500 جنيه"
لو حد جرب يطبقه علي ارض الواقع في مكان مش معتمد للخدمة  وفي اي كشك والسلام اظن ان صاحب الكشك مش هيسيبه الا لما يعلم عليه وهيفتكره جاي يثبته !!



** تمثيل زكي فطين عبد الوهاب هو الحاجة الوحيدة اللي فعلا أسوأ من اعلان بسكوت ديمو !!


** أظن ان مصطلحات رابعة التجارية زي "مشروع شهيد"  أو "شهيد تحت الطلب"
فيها كده من احساسهم بأن البشر سلعة وفيها اكتر من الحقيقة اللي كل مصر إتأكدت منها ..انهم مجرد "تجار دين" !



**بعد لقاء البرادعي الاخير علي شاشة الحياة ..
عرفنا الفرق بين واحد ماشي علي مبدأ السياسة فن الممكن..
وواحد زي مرسي كان ماشي علي مبدأ زي ما الشاذلي قاله "السياسة نجاسة"  !!

2 comments:

Sarah Habib said...

سبحان الله دايما بستنى تحليلك فى رمضان للدرما وللاحداث بس واضح جدا انك قرفان لان البوست قصير موش زى السنه اللى فاتت

انا عندى اعتراض صغير بالنسبه لزكى فطين عبد الوهاب انا بحب تمثيله لانه مختلف وموش بالضروره كل الممثلين يبقى باين انهم بيمثلو كمان احيانا بتبقى محتاج حد يبقى سمج من غير مايمثل وده قمه النجاح ... الى الامام ايها المسحوب من لسانك بس عاوزين تحليل اطول للمسلسلات ماتكروتناش :D

معـــــتز هــاني سعد said...

هاي سارة

هو فعلا حال البلد مخلي الواحد بيقتصد كده في كتابة الموضوع ومستنيين مصر تمشي في الطريق الافضل ان شاء الله

ناس كتير فعلا بتحب زكي فطين وناس تانية شايفة انه اسوأ ممثل الراجل ده بيفكرني ببرود ممثلين اجانب برضه ملامحهم ثابتة بس احيانا بيكون ده المطلوب للدور زي في رأي الشخصي الممثل مارك والبرج بارد شوية بس الدور بيبقي عايز كده فعلا زي ما انتي بتقولي

انا بكتب موضوع فعلا عن المسلسلات اللي شوفتها بس انما المشكلة انهم زي ما انتي عارفة حوالي 30 مسلسل عايزة سوبر مان عشان يخلصهم ويمسك خمس ريموتات في ايده انما انا بقول رأي بس في 7 او 8 مسلسلات انا تابعتهم

تحياتي