Friday, September 13, 2013

الحــرق بالجــاز في ليــالي الجواز..الجزء الثالث والعشرون







الوحدة ولا الجواز..؟؟


اه دي مسألة محيرة قوي تصدق..بس كانوا بيقولوا "الوحدة احسن من عشير النكد" مش عارف ده مثل شائع ولا مقولة من مقولات خالتي اللتاتة !!
طيب ما تشيخوف بنفسه يعني قال مقولة بتكيف العزاب قوي ..عارفين قال ايه ؟؟  قال "إذا كنت تخشى الوحدة فلا تتزوج "

ايه ده يعني فعلا عاش ما اتجوزش خالص ؟؟ لا الغريبة انه اتجوز رغم المقولة دي !!

بس في كتير عاشوا من غير جواز والامثلة بالهبل يعني منهم العقاد والمعري وبيتهوفن ومايكل انجلو وجبران خليل جبران ونيوتن وكتير من الشخصيات السياسية كمان دول فقط اشهر امثلة موجودة ..
يعني وحدة ولا جواز يا عم الحاج ؟ ارحم امي العيانة ..

شوف يا سيدي تيجي نمشيها دراسات وحوارات من دي ؟
يوووه ده كل دراسة بيظهر عكسها بعد يومين من الدراسة الاولي دي عملية متقلبة قوي ..زي موضوع الشاي والقهوة كده مضرة ولا مفيدة كل يوم دراسة تقول حاجة شكل..

في الجواز ودراساته بقي ممكن تشوف العجب يعني مثلا قريت دراسة بتقول "أن الزواج يساعد على الاستقرار النفسي، ويخفض من احتمال الإصابة بالاكتئاب"
تمام؟
بعدها تقرا دراسة بتقول حاجة تحس انها غير مناسبة للاولي خالص يعني بتقول "في كل 9 ثانية هناك امرأة يُعتدى عليها جسدياً من قبل زوجها"

طيب الدراسة الاولي اوقع ولا التانية ؟؟

مش عارف بس تحس ان الستات في الجواز بتبقي عاملة زي انظمة المحمول :

ست "نظام محلي"  ودي عيبها انها هتبقي مراقبة كل حركاتك لان ملهاش صاحبات كتير قوي وانت كل همها ..ودي مش فاتحة البيت كازينو صاحبات داخلة وصاحبات جاية
ست "نظام محافظات"  يعني اما تحب زيارات تروح لأمها او خالتها
ست "نظام أهلا كل الناس"  دي بقي بتاعة كله ناس داخلة وناس خارجة واجتماعيات بالجملة والبس يا برنس..!


طيب تحب اي نظام ؟؟
لا انا هابيع المحمول أحسن !!!

يعني عايز تفهمني ان الحياة العزابي دي ملهاش عيوب ؟؟
لا ده ليها عيوب بالجملة بس شوف مثلا كفاية علينا الافلام العربي اللي بتطلع العازب شخصية مجنونة عن عند..يعني يوم ما يركزوا علي شخصيات عازبة في الافلام العربي او مطلقين حتي يجيبولك مثلا "محمود حميدة" في فيلم ملك وكتابة..او نور الشريف في فيلم دم الغزال او خالد الصاوي في فيلم "عمارة يعقوبيان" ...احيييه هو يعني مش لاقيين عازب كويس خلاص لازم تطلعوهم متشردين في الافلام ..

اه مش مشكلة يعني لو عايز تخلص من الافلام دي وتحافظ علي فكرتك في العزوبية وتشوف مساوئ الجواز الحقيقية عليك بقي بفيلم اليزابيث تايلور اللي اسمه
Who's Afraid of Virginia Woolf?

يعني ده فيلم يجيب م الاخر ؟؟
ده فيلم يخليك تحلف بحياة العزوبية يا معلمي..

برنارد شو اللي كان من اكتر الادباء سخرية من الجواز خصوصا في مسرحية "الانسان والسوبرمان" وقال عنه اغبي نظام عرفه التاريخ ليه قصة شهيرة قوي مع واحدة جميلة كانت بتكلمه ورد عليها بسخريته المعتادة :

بيقولك واحدة جميلة جدا وقفت معاه وقالتله : حبذا لو تزوجت بي فسيأتي مولودنا بجمالي وذكائك،فيكون عبقري زمانه.
 فرد برنارد شو ساخرا: أخشى أن يأتي المولود بذكائك وجمالي فيكون مصيبة الدهر !!




بس الخلاصة ان برضه يعني العزوبية ليها مشاكلها ..هي مشاكل هلس ومن نوع خاص بس اقولك كذا مشكلة بيواجهها العازب في اي مكان:


1- اول اما العازب يدخل المطعم هيتسأل السؤال الشهير "حضرتك لوحدك يا افندم؟"
هتقوله "اه لوحدي"  هيشاورلك علي طرابيزة في الركن كده لو المطعم زحمة يعني عمرك ما هتاخد الطرابيزة البرحة والكنبة الكبيرة لان دي محجوزة لعيلة "روح اقعد هناك في الركن"..
مش عايزني ارفع ايدي لفوق كمان !!


2- لو قاعد في اي مكان وفي وشك واحدة وخطيبها غالبا هتلاقيهم فجأة بيبدلوا الاماكن ويجيبلك الراجل في وشك حتي لو ما بصيتش ناحيتها اساسا بس انت عارف في مرحلة الخطوبة بيبقي كل واحد فاكر انه خاطب "مارلين مونرو" رغم اني شايف قدامي نموذج مصغر لعيشة الكيلاني في شبابها ..ما فيش داعي تبدل الكرسي مافيش فرق كبير حصل..!


3- في المواصلات العامة حتي لو مهدود حيلك وعايز تقعد لو انت متجوز وقاعد جنب اسرتك مش هتقوم لحد انما لو شاب فرداني كده يبقي جوة كل راجل كبير او ست واقفة بيقولوا لنفسهم "مش المفروض الطور ده يقوم ما هو لوحده اهو وزي البغل"
"مش المفروض يوسع شوية دي عالم معندهاش دم"
"يعني مش كفاية لوحده وكمان مبرطع ع الكرسي"

تحس انك بتقرا افكارهم وهم بيبصولك وطمعانين في المكان وهم عمالين يسبولك من جواهم ..يعني القاعدة بتقول ان العازب لازم يفضل واقف..مش بقولكوا متذنب ووشه للحيطة !!


4-   من المفترض ان اي واحد صاحبك هيكلمك عشان تخرج "انك فاضي" دايما الناس شايفة العازب انه فاضي يعني يقولك "ما تيجي نخرج"
تقوله "لأ مش هينفع دلوقتي"
يقولك" ليه وراك ايه يعني؟"

ده ايه غتاتة امك دي..يا اخي مليش رغبة يمكن بعمل اي حاجة بقرا كتاب ولا بعمل اي نيلة انت مالك ..انما عند الشعب المصري قاعدة "الاصل في العازب الفضا" !..



5- العزوبية بتخليك قضية رأي عام ودي أسوأ حاجة..مش رأي عام يعني في الجرايد ولكن بتوصل لحد السباك ييجي مثلا جنبك في اي وقت ويقولك "مش هنفرح بيك بقي؟"
اه انت يعني يا عم السباك عايز حوض زيادة وزبون جديد انما تفرح بيا بتاع ايه ده انا اول مرة اشوفك يا حيلتها ..!!
وبتلاقي في عيونهم ابتسامة مخيفة كل حسب مهنته اما يتكلم معاك انه عايزك تتجوز او عايزك تلبس في الحيطة..
مثلا النجار "تحس انه عايز يديك مرزبة زوجية"
السباك "يديك كوع"
الحلاق "عايز حد جديد يحلقلك معاه يبقي هو ومراتك"
الكهربائي "عايز فيوزاتك تلسع"

يعني كله بيبقي عامل زي افلام الرعب او حفلة ماسونية كده بيبقي كلهم في صف وانت لوحدك جديد في المجتمع ده كلهم ليهم هدف واحد وجملة واحدة "مش هتتجوز بقي؟"
ولاحظ كلمة "بقي" دي تديك ايحاء بالاصرار بقي وخلصنا يعني مش معقول هتفضل عازب؟؟ او من جوة نفسهم بيقولوا "ايه ده هو كان ينفع واحنا معملنهاش"
ويبدأ يشوف انه كان ينفع فيعمل زي فيلم الطريق الي ايلات "ياريتني كنت معاهم يا ريتني كنت معاهم" !



6- لو قعدت لوحدك في السينما هيطلعلك اعلان موبينيل بتاع تذكرة هدية اللي هو بيقولوا فيه "عشان ما تروحش السينما لوحدك"
تبقي بتشوف الاعلان وانت قاعد لوحدك في زأر كده في السينما وحاسس انك اهبل قوي وانت داخل السينما لوحدك او يعني الاعلان بيحسسك بالعبط..
تبدأ تبص حواليك هو حد واخد باله انك لوحدك وبيبص ولا حاجة ما هو اللي علي راسه بطحة بقي ..



7- اشاعات الشعب المصري بقي علي اي واحد ما اتجوزش هي برضه احدي مشاكل العزوبية في مصر..
اي ممثل في وسطه وعازب يقولك ده شاذ يا عم..او ده بعيد عنك عنده المرض الوحش ..مع ان في رأي العازب الجواز هو "المرض الوحش " !!مش واخدين بالهم ان هم اللي عندهم "المرض العبيط"

!!
ما هو لازم واحد عايش لوحده تديله اي تهمة لان من جواك شايفه مش شايل مسئولية ودي طبعا حاجة معكننة عليك حياتك لانه لازم يتفشخ زيك فارميله اي اتهام سواء ممثل او شخصية عامة او ناس

حتي مش مشهورة ..علي رأي المثل "العازب ما يسلمش"




8- سؤال "لوحدك" بيرن في ودانك باستمرار لو انت عازب ..
تقول "انا خارج" ممكن حد يقولك "لوحدك؟؟"
"انا مسافر"  "لوحدك؟؟"
لا هاخبط ورقتين عرفي عشان اخرج يا ولاد ال...
هم بيخطفوا العزاب برة في الشارع ولا ايه ؟؟ولا انا محتاج محرم عشان اخرج ؟؟



9- العازب غالبا لو مش عايش مع اهلة وعيش لوحد خالص يبقي هيتخيط في الاسعار ..معروف ان الست هي "وزيرة مالية البيت" هي اللي تفهم ازاي تفاصل والاسعار كانت بكام وبقت بكام
انما لو عازب راح للفكهاني وبقي زبون هيبقي فعلا وحرفيا "زبون" !! لان الفكهاني بعد فترة هيلاحظ انه دايما هو اللي بيجيب الفاكهة مش المدام فهيبدأ يخيطه نسبيا وبالتدريج في الاسعار ..
الفكهاني وبتاع الخضار بيخافوا من الست اكتر من الراجل في عملية الشراء لانهم بيطلعوا عين اللي جابتهم فصال ..
انما الراجل تلاقي الفكهاني بيقوله "دوق يا باشا" اول ام يقولك دوق يا باشا تعرف انه هيلبسك في السعر علطول..



10- دايما لو المتجوز تعبان تلاقي حد يقوله "تلاقيه منامش م النجمة يا عيني"
انما العازب لو تعبان هيقولك " وانت تعبان ليه؟"
الظاهر ان الناس فاكرة ان "نوم العازب" ده مش رقصة قرد ده اسلوب حياة !!


11- العازب دايما يتسأل "ما بتحسش بالملل وانت مش متجوز؟"
بس غالبا احيل هذا السؤال للمتجوزين وهم هيردوا علي اللي بيسأل باصوات مش لطيفة ..
اي متجوز هيعيش علطول بوجهة نظر "طلق مراتك تنعم بحياتك" !!



12- العازب دايما كأن علي وشه علامات الراجل اللي هيعاكس..
في اي مكان في ازواج كتير وزوجات ودخل واحد لوحده يصيب المكان حالة من الاستنكار وكانهم بيقولوا "ايه اللي جابك هنا ياد"؟
يخلي العازب يتمني ويقول امتي يفتحوا كافيهات للعزاب فقط في مصر بدل اصوات الاطفال اللي بتعيط دي والامهات اللي فاتحة الزعيق وبقها 2 متر قدام ..؟



يعني شوفت بقي ؟ العازب بيمر بمشاكل كتير زي المتجوزين بالظبط..ولا ده مرتاح ولا ده مرتاح ..
العازب "مسلسل تركي" والمتجوز "ليالي الحلمية" بالمقدمة بتاعتها اللي بتجيب احباط في الباط..ده الفرق الواضح واختار انت بقي..!!

1 comment:

Sarah Habib said...

بص بقى يا سيدى بالنسبه للموضوع انت عازب وموش هتتجوز بقى والكلام الفكسان ده. احب ابشرك انك هتفضل متراقب الى الابد لو اتجوزت هيفضلو متابعين المدام حامل ولا لسه ولسه ليه وهاتسمع كلمه اتجدعن وهاتلك عيلين قبل ما تكبر ولو موضوع العيال اتأخر حبتين هيتعرض عليك اسامى دكاتره للمدام ولو خلفت بنت هيقولولك عقبال ما تاخيها ولو خلفت ولد هيتقالك هاتلو اخ

الناس عايشه على حكايات الناس ومحدش فى حالو خالص

روق وصلى عالنبى اسمع واضحك ومتردش ربنا لو اراد يبعتلك حب عمرك هتضحى بالعزوبيه وبحريتك ولو مبعتوش مفيش حاجه فى الكون تستدعى