Wednesday, October 29, 2008

كلمات من زمن فات



بعض الكلمات التي كانت تستخدم من فترة لم يعد لها اي استعمال الأن وإن إستعملها أحد الأشخاص فيكون إستعمال خاطئ ولم يعد هذا هو الوقت الصحيح لها مثل:


قطة مغمضة: كلمة كانت تستخدم لوصف نوع معين من البنات انقرض منذ عصر الديناصورات ولكن القطة الأن لها سبعة أعين وسبعة أرواح ..


بنشتري راجل: وهي كلمة أعيد إستخدامها بشكل أخر مخالف تماما وهي "إحنا بنشتري ونبيع في راجل " ..


متفتحش عين الولد علي الكلام ده: كلمة بريئة جدا بيستعملها أب وصديقه بسذاجة يحسدون عليها امام الشاب الصغير اللي هم فاكرينه الملاك الحارس وهو بيقول لنفسه في بالونة فكرية "هاهاها متعرفوش حاجة هاهاهاها"..


متاكلش حاجة وحشة من برة : كلمة تم القضاء عليها عندما فسد اللبن والجبنة الرومي واللانشون والفراخ جالها برد حتي فايه اللي فاضل برة وحش مش موجود جوة؟ معدتش فارقة كل يا ابني من برة زي ما انت عايز..


للأطفال " متكلمش حد غريب " : كلمة مالهاش اي لازمة فنحن اربعة وعشرين ساعة بنكلم ناس غريبة سواء علي الانترنت او علي الموبايل او في الشارع ..يعني الراجل بقاله سنة دلوقتي كل يومين يكلمني يسألني هاني الكردي موجود واقوله النمرة غلط لحد مقربنا نبقي اصحاب..مش عارف ليه هو مصمم ان دي نمرة هاني الكردي ومين هو هاني الكردي انا مش عارف


الفساد : كلمة قدمت قوي وفقدت قيمتها من كتر استعمالها كانت زمان كلمة تهز لكن دلوقتي بقت عبارة عن "وضع افتراضي"..


أكمل نص ديني : كلمة كان بيقولها الناس زمان عن الجواز لكن اتضح انها كلمة غريبة جدا في هذا الزمان ..يمكن تكمل نص دينك لكن بتخسر تلات اربع عقلك..لأن الجواز ده زي أكنك واحد رفيع قوي ورايح تلعب مع مصارع سومو ..


انت مش عارف انت بتكلم مين؟ : كلمة مستهلكة جدا واجابتها المستهلكة جدا :هتكون مين يعني؟..وغالبا ما يسأل شخصا ثالث هم مين دول؟ فالبلد مليئة بالشخصيات الهامة حتي اصبح الموضوع غير مهم..


البلد دي فيها حكومة وهاخد حقي: كلمات بريئة جدا لشخص كتاكيتي خالص سكرة عايز ياخد حقه في شئ مهم بالاستعانة بالحكومة .."لا تعليق"


ضل راجل ولا ضل حيطة : كلمة لستات الزمن القديم من ايام الديك ما كان بيكاكي الفجر دلوقتي الديك عنده انفلونزا فبيصحي علي ميعاد المضاد الحيوي..

3 comments:

Mero.. said...

هههههههههههههه جامد يا معتز

هاني الكردي ؟؟
هو مش والدك اسمه هاني سعد ؟؟؟ ممكن هاني سعد الكردي بس مجتش فرصة يقولك...!!!
سلام

معـــــتز هــاني سعد said...

يا عم ده راجل بيتكلم كل يوم ومش قادر يقتنع ان النمرة غلط وشكله كده بتاع مخدرات ولا ايه .باينها عصابة يا عم وزعيمها هاني الكردي

اخبار السيارات said...

thank you

اخبار السيارات