عيـد التيـك اواي

عايزين نجاري اوروبا في كل حاجة ..تفتكر ممكن؟..بس محتاجين شوية تطوير بسيط ..هو مش بسيط قوي يعني ..بس ممكن..
الشحات في اوروبا بيعزف جيتار ويرموله فلوس ع الأرض ..وانا بقول مش مهم نعزف عود ولا جيتار احنا ممكن نطور نقابة الشحاتين بتثقيفهم نوعيا..
يعني الشحات اللي هيقعد ميخدش الكورس العلمي للشحاتين مش هيبقي شحات معتمد..
طيب وهنديهم الكورس ده ازاي ؟.اقولك ..يعني الشحات اللي هيقعد قدام كلية طب لازم يعرف اسامي الكتب والمناهج ..والطالب يخرج من هنا يقوم الشحات يقوله
"الهي ما يضيعلك سكشن ولا يلهيك يا ابني عن الكاردولوجي"..ولو طالب في اخر سنة تقوله"الهي يا ابني تجيب التراكمي امتياز وتعدي عليك بسرعة سنة الأمتياز"
ولازم الشحاتة تفهم طبيعة كل كلية يعني اما تقعد قدام هندسة برضه لازم تفهم لغته "يارب اشوفك مهندس كومينيكشن كبير"
ولو راحت عند تجارة انجليزي "يارب اشوفك فايننشال اناليزر كبير "..

ودي ممكن تكون اول خطوة علي الطريق طيب هم احسن مننا في ايه تاني ؟يعني بيسموا اعصاريهم باسامي غريبة ..يقولك اعصار كاترينا مثلا ..
بسيطة جدا نسمي الخماسين مثلا "اعصار نهي" بدل اسم الخماسين ده..او "عاصفة رانيا" وندلع الاعاصير زيهم بالظبط واكيد هنوصلهم في يوم..
ولو بطلنا العمليات الانتحارية مثلا ممكن يبدأو يتطمنوا لينا ..وياسلام لو نعمل حزام ناسف بيطلع نغمات عشان الانفجار يبقي لذيذ..
يعني بشوية دلع كده ممكن نوصل ليهم ..

ونقابة الشحاتين تبقي اكثر وعيا كمان وتتحالف مع نقابة السايس بتاع المولات اللي بياخد الفلوس هباءا ..لأ دلوقتي لازم يقدم خدمة مقابل انه ياخد الفلوس دي..
مش مجرد انه قالي تعالي ورا يبقي خلاص ياخد جنيه..لأ لازم يغنيلي اغنية مثلا او يرقص رقصة فرانكو كده او يغني راب ..وهي دي الثقافة الاوروبية..
ويكون في يوم في السنة عيد اسمه عيد التيك اواي ..كل الناس تخرج بالزهور ووجبات الكنتاكي وتديها للشحاتين في الشارع..والشحات اللي عايز كاتشب يروح بقي النقابة..
يا شحاتين العالم اتحدوا..