النفاق خير وسيلة

بستغرب جدا من ازدواجية المعايير اللي بقت عندنا في العالم العربي..من كام يوم داخل منتدي بتاع افلام يجي المشرف يكتب حديث ويقولك كمان ممنوع وضع صور لا تليق بالمنتدي
وفي نفس الوقت هو فعلا مافيش صور لكن في افلام العن من الصور هو رافعها بنفسه المشرف !
طيب ليه كاتب كده في البداية مش عارف ..ييجي واحد تاني تعليقا علي صور لهيفاء وهبي يقول لصاحبها في التعليق "جزاك الله خيرا" !!
طيب هيجازيه خيرا ازاي يعني علي رفع صور هيفاء ولا يعني النظرة لهيفاء بعشرة امثالها مثلا ؟..كلام غريب في المنتديات
واللي بينقطني فعلا بقي هو عزاء الفنانين بتوعنا
قمة النفاق والازدواجية اما فنان بيموت ..حتي السيد راضي مات طلعت يسرا تعيط وتقول ده كان عبقري ؟..السيد راضي ممثل عبقري؟؟؟..فينك يا الباتشينو تسمع..السيد راضي ممثل عبقري..
وكل فنان طبعا بيقعد ساعتين قدام المراية عشان يتمرن ع العياط عشان هيطلع في التليفزيون فلازم يعيط كويس ..وكل واحد يقولك ده كان حبيبي..ده كان زي اخويا ..ماهو الراجل مات بقي وكل واحد يشتغلنا شوية..

والسياسيين طبعا حدث ولا حرج عن النفاق والازدواجية سواء من الوطني ولا الاخوان ..يقعد يزعق ويزعق في مجلس الشعب ويقعدوا يهزروا برة المجلس ويسهروا للصبح كمان ..والشعب شبعان من التمثيلية الفاسدة دي..

والموظف ابو دقن اللي يقعد وميعملش وظيفته بذمة ويقوم يصلي الفرض بفرضه..طيب عيب علي دقنك دي يعني المفروض تعمل عملك برضه علي اكمل وجه عشان ربنا يقبل صلاتك يا اخي ..متبقاش تنصح الناس وانت عايز تتنصح ..
واحيانا الظروف نفسها بتحكم علينا اننا نكون في حالة ازدواجية كاملة يعني الراجل اللي بيصمم استعراضات 6 اكتوبر مثلا عشان الريس يقعد يتفرج عيها تلاقيه هو نفسه بيشتم الحكومة اصلا بس مضطر يشتغل كده عشان لقمة العيش..

ومن اكتر الكلمات الاجتماعية المنافقة هي كلمة "حد جميل" بتاعة الفنانين ..كل مطربة تقولك التانية حد جميل ..وهي مش طايقاها اساسا ..لكن لازم عشان التليفزيون يا سيدي..
وابتسامة عسكري المرور ليك عشان عايز رشوة ..وابتسامة الميكانيكي ..وعامل محطة البنزين..وبياع الفاكهة..ازدواجية ونفاق..
القرش بيصنع الابتسامة وكتير بيخلق النفاق..
العسكري مرة خد رشوة وبعدين بيقول للراجل اللي ادالة "ربنا يباركلك" ..يباركله في ايه يا ابن ال...
دي رشوة..يعني ولا هيباركله ولا هيباركلك ..
وتطلع كل سنة فيفي عبده تقرفنا في التليفزيون وتقول انا بعمل ايه غلط؟
لأ مبتعمليش غلط خالص يا حاجة فيفي ..اصل هزة الوسط تطعم جائعا..وممكن تخدي حسنات علي رقصك ..ما انتي بتقولي اي هنتريش..

بس عندنا قواعد ثابتة في النفاق..الفنان اللي يموت عبقري ..واللي يمسك الحكم ذكي..واللي يتجوز امي اقوله يا عمي..وان كان لك عند الكلب حاجة قوله يا سيدي..
والنفاق احيانا طريق ممهد للسلطة والمنصب ..لانك لو خدت حباية صراحة يبقي عليه العوض ..في البلد دي ..

وتخيل واحد صريح في كل منصب :

ممثل صريح مثلا في عزا الفنان سيد راضي :

المذيعة: تقول ايه لسيد راضي دلوقتي؟
الفنان:هاقوله ايه يعني..اقوله ريحت الفن واللهي من ادوارك التافهة..
المذيعة: ازاي تقول كده ده سيد راضي كان قيمة..
الفنان: انتي اللي قيمة والله متجيبي بوسة..

او في عزاء سياسي:

المذيعة:تحب تقول كلمة لعائلة المرحوم...
السياسي: احب اقولهم احمدوا ربنا انكم خلصتم من مصدر الفلوس الحرام ..وربنا يعوض عليكم في ابن فاسد ان شاء الله زي ابوه..

او في الوسط الديني:

مفتي كبير: وانت ايه رايك في فتوتي الأخيرة..
مفتي صغير: فتوي ايه يا ابو فتوة؟..طيب هو انت ليه اخترت نقتل ميكي ماوس ونسيب الجدة بطة؟ ولا يعني عشان بتعمل فطير حلو؟ ابوك السقا مات..

او مع عسكري مرور:

العسكري: كل سنة وانت طيب يا بيه..هنا مخالف..
صاحب السيارة: وانت طيب يا سيدي ومعدتك كلها حرام ورشاوي ونار وشجر زقوم ان شاء الله..ومصارينك كلها بيمشي فيها دود من الأخرة ان شاء الله كده زي كل سنة..وفسادك بيزيد مع الأيام لحد ما اشوفك من اهل قاع جهنم باذن الله..مع السلامة


يعني الصراحة هتأدي لتغيير حياتك بالكامل فأقول لكل واحد..كمل يا عم نفاق ..وربنا يسهلك