الــزن علي الــــودان

كتير بنواجه شخصيات صريحة واللي قلبها علي لسانها لكن ساعات الشخصيات دي بتقول كلام مش في وقته خالص وممكن يضر اللي حواليه زي مثلا اللي يكلمك عن "الإمساك" وانت بتاكل
او اللي يكلمك عن صاحبه اللي مات وانت في فرح

مرة كنت قاعد مع ناس في بيتهم وكنا بناكل حاجة فيها مكسرات المهم فتحوا موضوع فجاة ان قريبهم الصغير اللي من فترة كان بياكل مكسرات وقفت في زوره وقلبوه وقعدوا يخبطوا علي ضهره
طيب ده معتاه ايه اسيب ام الطبق يعني ولا ايه بالظبط !

وركبت اسانسير وطالع الدور العاشر وانا اصلا بخاف من الاسانسير وواحد جنبك يقولك تخيل من فترة حصلت لواحد صاحبي حادثة في الاسانسير واتحبس جواه ساعتين ..يا عم اسكت بقي مش وقته خالص
الواحد مرعوب لوحده انت عايز ايه بالحدوتة دي يعني انط من الاسانسير ولا ايه !

وطفل صغير ساعات يقول لمامته في صراحة وهم ماشيين فوق كوبري صعب جدا وقديم "ماما هو الكوبري ده هيقع ؟ "
مامته تقوله في خوف "اسكت يا حمادة"
يكمل حمادة "هيقع يا ماما ؟"
مامته "اسكت يا حمادة يا حبيبي لو سمحت "
حمادة "يعني ممكن يقع يا ماما ؟ "
مامته "اخررررررررس يا حمادة هضربك لو قلت كلمة زيادة مش كده بقي اسكت خالص"
وهي بتكون خايفة اصلا وبيكمل عليها حمادة عشان كده الشخصيات دي صعب الواحد يقعد معاها لو خايف من المكان اللي هو فيه

ولو انت علي سطح عالي جدا يقعد واحد يقولك اوعي تبص لتحت ..لحد ما يخليك تترعب وتبص لتحت وممكن تقع ..
تيجي تشرب بق مية من الحنفية تلاقي واحد بيكلمك عن صاحبه اللي جاله تيفود من كتر تلوث المية اليومين دول ..وادي المية اهي يا عم الحاج وتروح كاببها في الحوض.

ده انتوا محاصرينا بقي..ان هاقولكم كيف تواجه الشخص الصريح :

أولا :
لو قالك زي حمادة الكوبري هيقع قوله "ايوه يا حبيبي وممكن يكسر عضمك " وساعتها تبقي قفلت عليه التكرار وهيقعد هو مرعوب زيك

ثانيا :
اللي يكلمك عن التيفود وانت بتشرب شوف هو بيعمل ايه لو كان بياكل جبنة مثلا كلمه عن غش اللبن والامراض اللي بيسببها اليومين دول والمواد الحافظة اللي ممكن تضيعه

ثالثا :
اللي يخوفك جوة الاساسانسير قوله "غريبة ليك صاحب اتحبس بس؟ ده انا اعرف خمسة ماتوا من وقوعهم من الاسانسيرات واتفرموا تحته "

رابعا :
بالنسبة لموضوع زي المكسرات قول وهم بياكلوا "مش بس بتخنق ده انا سمعت ان كترها ممكن يجيبلك سرطان "

خامسا:
اللي يديك تحذيرات مرعبة زي ما تبصش لتحت شاورله تحت وقوله "ايه اللي تحت ده يا افندم" كل خمس دقايق لحد ما يبص هو



يعني الناس دي معاها المواجهة احسن سلاح واديهم زي ما هم بيدولك