Tuesday, January 26, 2010

صبيـان وبنـات











كل الولاد يقولك البنات دي غريبة جدا يا اخي وليها اهتمامات غريبة وبينسي تماما نفسه واهتماماته الاغرب والاعجب ساعات كتير فانا هنا هاقارن بينهم وهتعرف في الاخر ان الولاد برضه كائن مريخي موزمبيقي عجيب :




أولا :

بيقولك انا مش فاهم البنات ليه بتهتم قوي كده بالفساتين والموضة مثلا ايه يعني اللبس ليه شاغل كل تفكيرهم والغريبة انه مش واخد باله انه طول النهار بيشوف ماتشات كورة
وفي نظر البنات برضه ان ده شئ عجيب جدا زي اهتمامهم بالفساتين ايه يعني شوية لعيبة بيجروا ورا كورة ايه الادمان ده !


ثانيا:

ادوات التجميل والمكياج مبتفارقش البنات تقريبا طيب ما انت في اي رحلة او مكان مبتفارقكش ازازة الاكس او اي اسبراي ومعجون الحلاقة ومش بعيد المسكات كمان لبعض الشباب
والكريم والجيل يعني ممكن في الاخر تلاقي شنطتك عبارة عن شنطة مستحضرات حريمي بصرف النظر عن الحاجات التانية بتاعتهم يعني


ثالثا :

بيقولك البنات بتبالغ قوي في طريقة كلامها وتقول "ياااه يا بنتي تحفة مش مصدقة بجد" او "جامدة اخر حاجة واو " وكده
طيب ما انت يا معلم ابو المبالغة اللي في الدنيا صباح الخير يا عم ده انت 24 ساعة بتقول "يا باشا " "يا برنس الليالي"
وساعات الفشرة الكبيرة بقي "قشطة يا سمو الامير" يعني الي يقعد مع ولد نص ساعة يحس انه في فيلم "رد قلبي" فورا من كتر الالقاب


رابعا :

البنات بتهتم بطريقة لف الايشاربات وانت بطرق لف الكرافتات يعني تعادل في الحتة دي


خامسا:

البنات بتهتم بالمطبخ وانت مش واخد بالك ان ده عشانك يعني هو مش هواية مثلا ولكنه من ناحية واجبات البيت


سادسا:

ومن ناحية الشغل فالبنات دلوقتي تقريبا بتاخد من الولاد معظم الوظايف وكمان بعد الجواز تطلع عينه فلوس تاني يعني كسبانة كسبانة


سابعا:

يقولك البنات بتهتم برشاقتها زيادة عن اللزوم ومش واخد بالك ان انت برضه بتهتم بس للاسف بعد ما تكون شكل درفيلي مخروطي تبدأ تاخد بالك يعني البنات واعيات اكتر لكده من بدري


ثامنا :

البنات والستات مدمنات مسلسلات ودراما وانت مدمن افلام اجنبي او بلاي استيشن او كورة


تاسعا :


البنات بتهتم قوي بطريقة قص شعرها وانت بتهتم قوي بطريقة حلق دقنك لا والأهيف من كده ساعات بتهتم بطريقة حلاقة السوالف


عاشرا :
البنات بتفشي الأسرار بتاعة الجيران طيب ما انت بتاخد الاسرار دي وتحكيها لاصحابك





يبقي ايه رايك دلوقتي !! مين بقي اللي غريب !

No comments: