اللغــة المخفــية في الشــوارع المــصرية

ايه الحاجات المجهولة في لغتنا اليومية؟..الحاجة اللي بتتحط مكانها نقط وانت تكمل بقي ودي موجودة في كلمات كتير عندنا في مصر علي افتراض ان اللي قدامك فهمك توماتيكي توماتيكي يعني وبالنظرة بيفهمك علطول
زي مثلا واحد يقولك "وكده يعني" بعد الجملة ..وكده يعني ايه ؟ هو انت ليه خليت الموضوع قاعدة وان الحكاية دي و "كده يعني" او واحد يقولك "ما هو رايح زي ما انت عارف" زي ما انا عارف ايه؟؟ انا اول مرة اسمع القصة دي منك يا عم انت انت لبستني وخلتني عارف القصة كلها وانها منتشرة كمان ؟

وواحد تاني يقولك جاب هدومه وكيت وكيت" طيب انا خرجت بايه من الجملة غير انه جاب هدومه ؟ ما انا معرفش كيت وكيت دي اللي في بالك المعني في بطن الشاعر ..
او الجملة الشهيرة "وكده يعني ودياولو" ومش عارف بصراحة هي كلمة دياولو دي كلمة عربي ولا اجنبي ؟ جابوها منين دي اصلا "دياولو" !
وساعات بنعمل الحركات دي في بعض الامراض حتي منقولش اسم المرض ونقول "اصله جاله المرض الوحش" ..!او "المرض البطال" تحس انه جاله مرض قليل الادب ..

وواحد كمان يقولك "ماهو راح اسكندرية واسماعيلية ومش عارف ايه " طيب يعني انا اللي اعرف اذا كنت انت بتحكي القصة ومش عارف ايه امال مين اللي يعرف ؟
وفي كمان من لغة المجهول المصرية كلمة "فلان وعلان وترتان" او تلتان مش عارف..يعني دول تلات مجاهيل في جملة واحدة المفروض تفهمها..!

وفي بعض الاغاني برضه زمان بيستخدموا اللغة دي زي مثلا "ياللي ظلمتوا الحب وقولتوا عليه مش عارف ايه" وبرضه ام كلثوم كررتها تاني وقالت "ازاي يا تري اهو ده اللي جري" وكمان قالت "هو صحيح الهوي غلاب؟؟ معرفش انا" ..يا سلام اما جملة مفيدة صحيح متعرفيش انتي؟؟ طيب هاروح اسأل ماما..!


واحيانا تقول لحد فين يا عم المقص مش لاقيه يقولك هتلاقيه هنا ولا هناك ! او انت منين يا عم الحاج يقولك انا م النواحي دي..! ودي بتتقال في بعض القري "انا م النواحي دي"
وطبعا في العصر الحديث انقلبت لغة المجهول الي كمان جملة "بس يا سيدي وقامت معيطة" او "بس واتكسرت المركب ميت حتة" ..!
ومن اهم سمات اللغة دي جملة "ولا كاني ولا ماني ولا دكان الزلاباني" او جملة "ولا عيل ولا تيل" .


تقريبا الناس بتتطلع باللغة دي بسبب دلعهم وهم صغيرين بجمل مجهولة اكثر زي مثلا "كوتي كوتي" او "انكغة انكغة" والطفل يقول ع الكبير "ماله العبيط ده؟" ..!
او اللي قول "يا ختي كميلة" او " يلاااا الكورة رايحة فين ..يلااا المعلقة رايحة فين ؟ " وطبعا الطفل بيفتح بقه ويقول "هاه رايحة فين يا ابن العبيطة؟ " !

وبدأ الموضوع يتتطور يوم بعد يوم لحد ما وصل لخدمة العلماء وتقولك "هذه المكالمة قد تكون مسجلة" او "هذا الهاتف قد يكون مغلقا" يعني حتي الست اللي بتتكلم مبتقدرش تجزم بحاجة او خايفة توعدك ومتوفيش تقولك فيه تلاقي مافيش .

وبدأ الموضوع يتتطور اكتر واكتر لحد ما وصل للوحات المرور ساعات تمشي في طريق تلاقي "المنصورة 47 كيلو" وواحد ممكن يسأل ياه هي المنصورة كلها علي بعض 47 كيلو طبعا ده ترميه م العربية علطول ..المهم تلاقي اليافطة مكتوبة "المنصورة 47" تمشي بعدها بشوية تلاقي "المنصورة 48 كيلو" تقول علطول ربنا يخليلنا الحكومة دي عاملة الطرق بالورب يا عم الحاج مش طوالي يعني هو الطريق بيطول ولا مين اللي بقي فين بالظبط ؟؟ ودي ياما شوفتها في يفط كتير في امكان كتير تلاقي الطرق بتتطول وساعات لوحة مشاورة مدينة نصر يمين وشوية ولتاقي يافطة غلط وتلاقيها شمال وتلف حوالين نفسك ساعة علي ما توصل.

ووصل الامر للخطابات الحكومية ويطلع رئيس الوزراء يقولك "وكما تعلمون فان في الخمس سنوات الماضية حققنا ..." ويقول اي حاجة ..يعني برضه مشي علي نفس النظام وقال "كما تعلمون" لا واللهي يا حبي انت ماقلتلناش قبل كده حاجة من دي ..!

ووصل استخدام اللغة دي للشوارع والحارات زي كلمة "عندها" وكله نفسه يعرف هي مين طبعا..فبدأوا يحددوا الموضوع بقت "عند ام بودرة" او "عند ام ترتر" ودول اكيد قرايب ام بودرة وام ترتر هاعمل زي كابتن محمود بكر "واحد هيقولي انت بتقول اييييه؟ اسكت..اقوله طيب".

يعني اللغة المخفية انتشرت قوي سواء بالتلميحات او علي افتراض انها حاجة معروفة يعني ..زي كمان كلمة "احمد ومحمد واسمه ايه دهون" ..او الكلمة الشعبية الشهيرة رائدة اللغة المخفية "أبصر ايه" يقولك "الواد سعيد واحمد وابصر ايه" ..او مثلا جملة "هتجيب شنطة وجزمة و بتاع"..مش عارف ايه البتاع اللي في الاخر ده ؟

لغة شهيرة قوي وليها زبونها دايما خصوصا في التصريحات الحكومية كمان شغالة قوي وواكلة معاهم يعني ..زي ما انتوا عارفين..!