Tuesday, December 28, 2010

إديني شفــطة وبعدين إديني أطــة





في كل بلد وحدات قياس زي مثلا كلمة "قطعة" او "جزء" مثلا يعني كلمات مستحدثة بنقيس بيها مقاس الحاجة او كميتها انما عندنا كل حاجة من دول ليها كذا مقياس وبألفاظ تحس انها من كوكب تاني ولغة تانية مش مصرية :

ودي بعض ادوات القياس المصرية والفاظ القياس لحاجة معينة والاكثر انتشارا والأغرب قي نفس الوقت واللي بنتميز بيها عن باقي الدول العربية واكيد العالمية :


1- حتة - حتة دين : لو قلت دي حتة بنت تبقي بنت جامدة قوي او حتة بسكوت مثلا يبقي عايز جزء منه لكن لو قلت "حتة دين" عربية مثلا يبقي دي بقي بمواصفات العصر "جامدة/فاجرة/جاحدة" بالوصف العصري الحديث وترجمة كلمة "حتة دين"

2- زغروف-جوان"جوينت"-قرش-تربة-سطر : دي مقاييس برضه عصرية لكن للمحششين بس قرش حشيش او تربة حشيش هي مواصفات الكمية المطلوبة من الكيف اما الجوينت بتكون سيجارة ملفوفة او محشية ومتختخة..وسطر دي للمخدرات البيضاء بس

3- سلهوب/صرصور : دي بتتقال علي الهوا دايما يقولك "اقفل الشباك لحسن يخشلك سلهوب هوا" والسلهوب بيكون كمية صغيرة بتتسحب من ورا الازاز وتخش تجيبلك برد بس معرفش ليه اتسمت سلهوب !وده بيختلف عن الصرصور اللي بيخش من تحت عقب الباب ويبرد الشقة برضه.

4- مرزبة/فرقلة : في واحد ايده زي المرزبة وواحد تاني ايده زي الفرقلة واكيد ابو ايد مرزبة اقوي لكن دي المواصفات الموجودة لقياس قوة الايد في اللغة الحديثة

5- لحسة/ بق/شفطة/قطمة : ودي وحدات قياس الاكل وخصوصا ان لحسة بتتقال غالبا علي الايس كريم وشفطة علي اي عصير لكن هي كلمة بيئة حبة ممكن تقول عايز شوية عصير مش شفطة عصير لان الكلمة دي تحس ان انت خارج من ملجأ

6- فسوة : ودي ظهرت في افلام احمد حلمي زي مثلا انا هأتاخر فسوة عليكم معلش او اتاخر كده فسوتين

7- أطة : ودي في مصر بمعني "بوسة" اديني أطة كلمة شائعة الاستخدام

8- حتة-نتفة-ستفة : ودي للمبالغة في ما شاهدته ..مثلا تقول "شوفت حتة نتفة ستفة عربية ملهاش حل "

9- جندي-أوبيب-معلوم: ودي كلها بتتقال علي الفلوس زي "ناولني الأوبيب" او اديني المعلوم

10- غلوة : ودي يعني معناها اتعملت بسرعة فما تاخدش غلوة مية

11-نفس-شدة-سحبة : برضه دي مقاييس للمحششين عشان ما نزعلهمش ودي بتكون ع الجوزة او الشيشة

12- نفحة : ودي بتختلف معناها كتير في مصر ممكن تعني حبة من حاجة او تعني سيجارة او اصطباحة او فلوس

13- عدي الفلنكات : ودي بتتقال علي اي حاجة زادت قوي زي مثلا "ده انت كرشك عدي الفلنكات" و قزح كمان

14- فوريرة-حمامة : ودي مقاييس السرعة لواحد رايح مشوار

15- دخاني-شاي-قهوتي : دي بقي مقاييس الرشوة او التخليص لأمر ما في مصر




وكل شوية بتظهر مقاييس جديدة في مصر وادوات قياسها اللولبية والفاظها الغريبة دي .

2 comments:

Anonymous said...

اديني دخاني حضرتك او اديني المعلوم ههههه
ايه دخانه ده ؟اللفظ ده انتشر قوي في كل حتة حتي المصالح الحكومية

Anonymous said...

جامد جدا