Wednesday, October 19, 2011

البلبل المائي في فن شراء الجهاز الكهربائي







شايف البياع اللي في الصورة فوق ده ؟
اهو ده بياع شكله فاهم وهيديك حاجة تمام مش هيديك قرع عسلي

.
اشتريت اي جهاز كهربائي قبل كده او عايز تعرف الطريقة من واحد مجرب العملية دي كتير ؟
اسال مجرب ولا تسال طبيب..الجهاز الكهربائي في مصر زي البطيخة واكبر احتمال انها تطلع قرعة !
تليفزيون او راوتر او اي جهاز كهربائي عموما هاقولك الطريقة المثالية.
ونسمي النصايح دي "البلبل المائي في فن شراء الجهاز الكهربائي" .
واحد يقولي البلبل المائي ؟؟ اقوله علي اساس ان الكتب اللي بتبقي متسمية بالطريقة دي اساميها مفهومة يعني ؟؟
المهم نشوف النصايح دي قبل ما تدخل او اول ما تشوف عينك الجهاز اللي انت عايزه ع الرف :



1- الملاك اللي قدامك ده هيتحول وحش لو حاولت تفكر انك ترجع الجهاز وتاخد فلوسك وعلي راي عادل امام "وفجاة لقيت الزبيبة طارت وقاللي ملكش حاجة عندي" .


2- اول جهاز هيحط ايده عليه عشان يجيبهولك بايظ قوله هات واحد تاني وهتلاقيه متردد وبيعرق لانك كشفته وده زي اما تخلي واحد يشرب العصير قبلك لحسن يكون مسموم !


3- لو قالك الجهاز ده صيني تقفيل ياباني او اي هبل في الجبل من النوع ده حاول تتجنبه لانه بيقول اي كلام وهو اصلا ميعرفش ده تقفيل ايه ويمكن ميعرفش يعني ايه تقفيل اصلا وبيبيع وخلاص وسمع الكلمة دي .


4- اوعي ترمي اي حاجة وفرحة الجهاز الجديد بقي وتروح رامي الكرتونة لازم تكون عارف ان اختيار جهاز كهربائي في مصر اصعب من اختيار عروسة بمراحل.


5- اوعي تفكر انك هتستعين بحد يحميك وتحط في بطنك بطيخة والهري ده لان جهاز حماية المستهلك هو جهاز حماية التاجر ومش هيعملك حاجة زي الجهاز القومي للاتصالات لو الانترنت بطئ اشرب من البحر ياافندم.


6- لو مخدتش فاتورة التاجر هيستغل اول فرصة ويقولك انت مخدتش الجهاز ده من عندي اصلا ويعمل عبده العبيط .


7- لو قالك دي اخر حتة عندي اوعي تاخد الجهاز لان ده معناه انه عمره اصلا ما هيرجعها لو عملتله ايه .


8- تاكد من اسم التاجر كمان ميكونش مثلا شلاطة او الدبش او اي اسم من دول وتاكد من معالم وشه ان ميكونش فيها مطوة سابقة او غرز لاما تعرف انك خدت صابونة .


9- متروحش اي محل صغير وكاتب علي نفسه "مؤسسة" لانه بيكذب من اولها !


10- متروحش اي محل كاتب "ليس لنا فروع أخري" لان ده دليل انه محل صغير مع انه فاكر نفسه ذكي بام الدعاية الهبلة دي .


11- لو قال كلمة "عشان خاطرك يبقي السعر كذا" يبقي بيغلي السعر عليك لانه بيشتغلك وميعرفكش اساسا .


12- لو قال للصبي اللي عنده "هاتله حتة جديدة من المخزن" يبقي هيجيبلك المستعمل .


13- لو سألك "معاك عربية؟" علي اساس تشيل فيها الحاجة يعني يبقي قصده يعرف انت مريح يعني وغني ولا ايه نظامك عشان يغلي عليك السعر .


14- لو قالك "عايز نصيحتي" يبقي اسمعها فعلا وخد عكسها فورا .


15- لو قالك "عيب ده انت زبون" هو يقصدها حرفيا انك فعلا "زبون" !


16- حاول تدي الصبي بقشيش لانه ممكن يقولك الحقيقة او يديك جهاز سليم فعلا لان المحل م محله وهو مالوش مصلحة الا الفلوس .


17- اما تسال اسال في محلات في اماكن مختلفة عن نفس المنتج مش في منطقة واحدة لانهم مظبطين مع بعض .


18- لو قالك "إسأل برة" يبقي هو فعلا سعره غالي بس هو فاكر ان الجملة دي هتثبتك .


19- لو قالك "عيب الجهاز بتاعنا لو في اي حاجة" ه قصده انه فعلا بتاعهم واستخدموه قبل كده !


20- حاول ترجع بعد دقيقتين المحل اما يفتكر انك مشيت هتلاقيه بيتكلم عن الصفقة اللي عملها علي قفاك دي وازاي خيطك
!


21- متطلعش المحفظة قبل ما تسال عن السعر لان تطليع المحفظة بدري دليل انك فنجري وهتاخد باي سعر .


22- حاول تاخد فكرة عن الجهاز اللي هتشتريه من كذا محل لانهم بيخافوا من اللي فاهم في الجهاز .


23- ضروري تجرب الجهاز في المحل مرتين تلاتة اهو يبقي شغال مبدئيا انا مرة اشتريت جهاز من غير دايرة كهربائية اساسا !




م الاخر خد بالك قوي لان اي محل اجهزة كهربائية المفروض يعلقوا عليه يافطة "احذر الاشتغالات" .





2 comments:

Anonymous said...

ههههههههه جامدة بجد انا برضه كل ما اشتري جهاز كهربائي اتخم فيه ويطلع تعبان كتير حصلتلي

اخبار مصريه said...

hhhhhhhhhhhhhh very nice