Saturday, November 12, 2011

حمادة إشتغالات بتاع الهدوم والمقاسات





غرفة القياس في المحلات هي مكان جديد للاستفزاز زي الميكروباص والاتوبيس والمصالح الحكومية بالظبط .
ورغم ان المفروض تكون فرحان بالحتة الجديدة اللي بتشتريها بقي وكده الا ان المكان كله في المحل بيخليك مش عايز القطعة دي اساسا وعايز تمشي من المحل ده .


مجرد ما تنقي القطعة وتدخل تقيسها يبدا "حمادة اشتغالات" اللي واقف برة اللي بيبيع في المحل يسأل كل شوية "مقاسك يا باشا؟"
ويفوت كام ثانية كده ويكرر السؤال "مقاسك يا باشا؟" وبعدين يسأل "اجيب أكبر يا باشا؟"
يخليك تقوله "الله يخربيتك علي بيت الحتة دي يا اخي انتوا بتعملوا بحث ع المقاسات ولا ايه ؟كل شوية مقاسك مقاسك اما اخلص هاقولك اني خلصت" !
والغريب ان هو ميعرفش ان ده مش بيحسس الزبون بالاهتمام ابدا بل بالعكس بيحسسني ان المحل فاضي ومافيش زبون غيري اصلا وده معناه انه محل فالصو ومضروب بالنار طالما واقف معايا كل الوقت ده وانا بقيس.


النقطة الغبية برضه في المحلات ان ساعات تلاقي اوضة القياس دي مش باب بترباس لا دي بتبقي ستارة ..وده قمة الغباء فعلا وانت بتلبس كل شوية واحد يشد الستارة يشوف المكان فاضي ولا لا وبعدين تلاقي واحد بيقيس تقوله "باشا" تفتح الستارة التانية تلاقي واحد تقوله باشا ..سمعت كلمة باشا دي مية مرة في محل زحمة قبل كده من كتر ما الناس فتحت الستارة كنت بفكر اطلع اقيس في وسط المحل وخلاص ماهو كله فتح الستارة !!


الناس كلها مبتحبش تغير كتير في الاوضة دي خصوصا اما تكون حر وتخنق ومافيش تكييف في المحل مثلا وتقول للعامل "الجو حر جدا في الاوضة" يقولك "طب ما تسيب الباب موارب" !!
هو ده الحل اللي عنده مش يقول مثلا "هنركب تكييف قريب" لا يقولك سيب الباب موارب علي اساس اننا ع المصطبة او في دوار العمدة سيب البابا يجيب طراوة !

اوحش حاجة بقي اما تلاقي واحدة جاية مع جوزها محل رجالي عشان يجيب هدومه ! انا بتعجب جدا هو شايفاه عيل مثلا ولا انتي بتتحكمي حتي في طريقة لبسه !! وتقعد تقلب في وسط الهدوم الرجالي علي اساس انها خبيرة في هدوم الرجالة وهي ولا عارفة فيهم حاجة اساسا وتفضل واقفة قدام غرفة القياس اللي جوزها فيها وتقول "كويس يا علاء؟" "اجيبلك اكبر يا علاء؟"  !!


انا حاسس ان علاء ده ابنها مش جوزها وبدأت الكوابيس تجيلي جوة الاوضة واتنين بيجعروا "اجيبلك اكبر يا علاء" والتاني بيقولي "اجيبلك اكبر يا باشا" !!
 يا ستي سيبي علاء يختار بقي يعني كاتمة علي نفسه في البيت وبرة البيت ! حتي الهدوم هتجبيهاله علي اساس ذوقك انتي ؟
والست دي معرضة انها ممكن تفتح برضه الستارة غلط علي واحد ويكون موقف بايخ جدا يعني وبيحصل بالفعل وتقوله "اسفة جدا" .
انما طبعا لو في محل مختلط وده كارثة اكبر تلاقي نصه حريمي ونصه رجالي وغرف القياس سداح مداح لو فتحت علي واحدة تبقي ليلتك سودا انما لو واحدة فتحت عليك انت تسكت خالص !! ايه التفرقة دي !
وكان بالفطرة ان طالما الست فتحت ع الراجل تبقي مش قاصدة انما الراجل لو فتح الستارة ع الست يبقي بيستعبط وحيوان !!!

وطبعا متسألش حمادة اللي بيشتغل في المحل عن رايه وانت خارج من الاوضة لانه طبعا هيقولك ان التي شيرت هياكل منك حتة والحوارات والاشتغالات دي لان حمادة ميعرفكش انما حمادة شغلته انه يشتغلك بياخد فلوس عشان يشتغلك وبس !

واغبي حاجة اما يقولك "التي شيرت مقاسك بس المراية دي بتعرض شوية" !! ليه انا جاي محل هدوم ولا جاي الملاهي العب في مراية جحا !! مراية ايه اللي بتكبر وبتعرض دي اما محل اشتغالات صحيح !

وتطلع برة الاوضة وتبص ع المراية من برة شوية تلاقي اللي في الاوضة اللي جنبك طالع برضه برة شوية وبيبص ع المراية من بعيد ويقولك "حلو القميص ده..بس القميص بتاعي ده مقاسي" ؟
ايه يا جدعان الواد التايه ده جاي مع مين ؟ وانا مال امي قميصك حلو ولا وحش ماهو حسب ذوقك وانت اللي تعرف مقاسك اعرفه منين انا ؟ انما كتير تقابل المريخيين في محلات الملابس .

وفي النهاية بتروح للحاج صاحب المحل ودي التقفيلة بقي بتاعة اللعبة بتلاقيه قاعد قدام الكمبيوتر دايما وغالبا بيلعب او ع الفيس بوك ومش داري بالمحل اساسا ويبصلك فجاة ويبص لحمادة اللي كان معاك ويقول "فين الكارت يا حمادة" ويشوف السعر بدهشة كأنه مش صاحب المحل بل كأنه زبون اصلا ويسيب اللعبة بامتعاض ويقولك السعر ويقولك بصوت تخين "مبروك" !
وحمادة يشتغلك ويقولك "مبروك" وكل المحل يقولك مبروك كأنك قضيت الصباحية في المحل !!

ودايما الراجل صاحب المحل بتلاقي فوقه كلمة مستفزة زي مثلا "البضاعة المباعة لا ترد ولا تستبدل" كلمة مش موجودة غير في العالم السادس مش العالم التالت حتي .
او ساعات بيحن عليك ويقول "قابلة للتبديل فقط" وساعات يكتب "من حقك ان تدخن ومن حقي ان اتنفس" وهو اساسا عمال يضرب سجاير وخانقنا في ام المحل كله .



المهم ان كل العوامل دي تخليك تجيب قطعة ممكن متعجبكش في النهاية وتندم عليها وده بيحصل كتير من كتر الحر والدخان وصوت حمادة بيخليك تنقي وانت متردد وساعات تجيب حاجة اي لكام وتبقي عايز ترجعها تاني لكن تفتكر وش صاحب المحل تحس انها صعب ترجع وانها ممكن تستبدل بس من المحل التعبان ده .

وشخصية "حمادة اشتغالات" موجود في كل مكان بس بتختلف الجملة يعني في محل الاكل يقعد يقولك "اجيبلك حاجة تانية يا افندم " طول ما انت بتاكل او كل ما تخلص حاجة قدامك .
لكن اكتر جملة مستفزة من حمادة هي جملة "دي تمشي مع البني والبيج" ! وبيبدأ يفتي ويقول اي كلام ويعملك نفسه "داغر" وهو مش فاهم اي حاجة في الالوان وشكله عنده عمي الوان اصلا .
وكانك عينته مستشارك في الملابس وهتاخد رأي حمادة في الالوان ولو قلتله "بس انا معنديش بني وبيج" يقولك "وتمشي مع الازرق والاخضر" تبقي عايز تديله بوكس تورمله مراخيره علطول .

يعني غرفة القياس دي بترفع الضغط بالظبط زي اتوبيسات الحكومة فكر الف مرة قبل ما تشتري حاجة جديدة عشن حمادة هيحاصرك في كل مكان .

3 comments:

Anonymous said...

ههههههه موضوع لذيذ جدا

اخبار مصرية said...

قصة جامدة

أخبار - أهرام said...

ههههههههههههههههه