Friday, September 28, 2012

عزيزي البلطجي..انت ليه بتقتحم المستشفيات وترهب الأطباء ؟؟؟





اتكلمت قبل كده عن المبادئ الكاذبة وذكرت العديد من الامثلة ودلوقتي عايز اربطها بموضوع الهجوم المتكرر علي المستشفيات والاطباء من قبل بعض البلطجية بإسم انهم بياخدوا بتارهم او بيقيموا العدل مثلا في البلطجية اللي هم بيعملوها اما يهجموا علي المستشفيات .

وازيد بعض الامثلة عن المبادئ الكاذبة دي اللي خلفت وراها ضحايا بالالوف حول العالم وبالملايين كمان في بعض الحروب اللي قامت علي مبدأ كاذب وفكر سقيم عقيم.
 كل سفاح وكل قاتل بيبقي ماشي ورا مبدأ او هو شايف انه ماشي ورا مبدأ..مثلا زي بتاع مذبحة النرويج كان كاتب مقولة شهيرة معناها ان الراجل اللي عنده مبدأ احسن من اللي معندوش مبادئ وبالحكمة دي راح قتل عشرات الاشخاص !!

وفي ارهابيين بيقتلوا وبيفجروا ويقولك مثلا "جهاد" والدين الاسلامي العظيم برئ مما يعتقدونه جهاد طبعا انما هو من وجهة نظرهم او من فكرهم المتمسكين بيه .


حتي الشيطان ماشي ورا فكرة عنده وفاكر برضه انها صح ورفض فكرة السجود لانه شايف انه كده اتظلم وحاشي لله انه يكون اتظلم ولكنه كبره وعناده :  "وإذ قلنا للملائكة اسجدوا لآدم فسجدوا إلا إبليس أبى واستكبر وكان من الكافرين"

حتي الصهاينة كمان عايزين ينشأوا وطنهم علي جثث ملايين العرب لانهم كما يزعمون بجنونهم  ان اليهود "شعب الله المختار" حتي ان الكاتب "علي احمد باكثر" كتب في كتابه "إله اسرائيل" ان واحد اسرائيلي ممكن يفسر ما ورد في الاصحاح العشرين من سفر التثنية اللي بيقول "وأما مدن هؤلاء الشعوب التي يعطيك الرب إلهك ميراثا فلا تستبق منهم نسمة واحدة بل ابدها علي بكرة ابيها"
علي اساس ان الجملة دي مطبقة علي العرب اليومين دول وهو تفسير متخلف خاطئ طبعا ولكن كل واحد بياخد الجملة اللي علي مزاجه ويحطها قدامه ويجعلها مبدأ ورسالة في حياته حتي لو كانت كلها حسب تفسيره الوهمي ومش هي الحقيقة .


وتدخل امريكا في حرب فيتنام اللي اعترض عليه ملايين المواطنين الامريكان كان علي اساس ان امريكا يعني هي الحمل الوديع وراعية السلام وهي اللي بتنصف المظلوم رغم انه كله كان لمصلحتها وهي اللي لعبت في الحرب دي كلها من تحت الطرابيزة ودخلت نفسها في حرب سقط ليها ملايين الضحايا علي مدار سنوات بلا سبب مقنع وكذلك الحال في تدخلها في دول عربية بإسم الديمقراطية او تدمير اسلحة الدمار الشامل زي ما حصل في العراق وغيرها من الدول وهي ابعد ما تكون عن الديمقراطية الحق.

والسفاح "روبسبير" في الثورة الفرنسية كان بيقتل الالوف علي المقصلة بإسم العدالة وتطبيق القانون وبإسم الثورة رغم ان الثورة اللي المفروض تعلي كلمة الحق هو اضاعها بظلمه وطغيانه وجبروته وبدأ ميشوفش الا نفسه فقط في الثورة الفرنسية ويقتل كل اللي بيشوفهم خونة في نظره.

يعني كل مجرم لازم هتلاقي وراه سبب يقنع بيه نفسه بجرمه عشان يزينه في عينيه وعشان يبقي ماشي ورا غاية معينة هو شايف انها الطريق الصحيح وغيرها يبقي باطل.


نفس الحكاية دي بيطبقها البلطجية اللي بيهجموا علي المستشفيات بانتظام عشان احد اصدقائهم او حد من عيلتهم مات جوة المستشفي..جنون مغلف بظلم مغلف بغباء تام.
وكأن الطبيب اللي جوة المستشفي ده هو فعلا اللي قتل المريض مش لارصاصة او المطوة اللي اتضربت في جسمه من الخناقة او الضرب اللي كان فيه قبل ما ييجي المستشفي.
وكأن الطبيب ده بياخد مرتبه عشان يقتل ضحايا جوة المستشفي مش يعالجهم وانه قاصد يقتل كل بلطجي يدخل المستشفي مع انه المفروض بيكون خايف من بلطجة أهله للأسف فبيعمل ما في وسعه عشان يحاول يعالج.
وكأن الطبيب ده نازي مجنون بيمسك جسم البلجي المصاب ويقطعه حتة حتة ليطهر الارض من الرجس !!
وكان الطبيب متواطئ مع الشرطة مع ان الشرطة اساسا مبتحميش حياته ولا نيلة ..وكأن الشرطة اساسا هي المسئولة فقط عن اصابة البلطجي ومش بلطجته نفسها !!

طيب البلطجي شايف العملية دي كلها ازاي ؟؟ اما بيقتحم المستشفي زي القصر العيني وغيرها كتير حوادث لا حصر لها من اقتحام المستشفيات في كل المحافظات هو شايف انه كده بياخد حقه ده حسب تعريفه للحق طبعا في قاموس "التطرف والتحريف" بتاعه .




ودي بعض حجج البلطجي في الهجوم علي المستشفي والرد عليها :


1- البلطجي شايف ان كل ضحية تسقط ليهم داخل مستشفي ده نتيجة فساد مش خطأ او قضاء وقدر .       "الغريبة ان هو نفسه ضحية فساد مبارك وعايز يعاقب غيره علي الفساد"

2- البلطجي شايف ان الطبيب مسئول مسئولية كاملة عن حياة البلطجي حتي لو الاصابة خطيرة جدا وبين الحياة والموت   .       "وكان الطبيب ساحر هيحي الموتي او اللي حالتهم بتيجي وهي بتودع اصلا والطبيب مقصرش في حاجة"


3- البلطجي شايف ان حتي لو في خطأ طبي البلطجي عايز يحاسب وياخد حقه بدراعه علطول مع ان اي خطأ طبي في اي دولة في العالم بيكون نتيجتها محاكم وتعويضات كبيرة جدا.         "يعني حتي لو في خطأ البلطجي بيعالج الخطأ بجريمة ويظهر بمظهر الجاني حتي لو كان ممكن يكون فعلا ضحية خطأ "


4-شايف ان  الطبيب المفروض انه غصبا عنه يعالج ويشفي المريض ولو بالعافية.          "مش غصبا عنه ولا حاجة ده بيقوم بدوره بكامل رغبته وكفاية انه بياخد ملاليم وميزانية الصحة في مصر زفت وحالة الاجهزة والمستشفيات زفتين مش زي اي حتة في العالم ليها ميزانية صحة محترمة يعني الطبيب اصلا معذور تماما ولكن بيقوم بدوره "


5- البلطجي شايف ان المستشفيات بتهمل في علاج الفقرا وبتسيبهم لحد ما دمهم يتصفي.     "مع ان المستشفيات الحكومية دي اساسا فاتحة عشان الفقراء وملايين الفقراء بيتعالجوا يوميا اللي بيكونوا طبيعيين يعني مش بلطجية جايين المستشفي مضروبين برصاص ولا مدفع رشاش ومن جهل اللي بيحاولوا يقولوا ان الاطباء بيقصورا مع الفقراء انهم مش بيشوفوا المستشفيات الخاصة بتاعة الاغنياء بتعمل ايه وانها هي اللي ساعات بتسيب دم المريض يتصفي لحد ما يدفع الحساب او المقدم مش المستشفيات الحكومية بتاعة الفقراء ..يعني بالعكس مستشفيات الفقراء بتقوم بدورها علي قد ما تقدر حتي وان كان فيها اهمال علي قد الامكانيات الضعيفة لكن الأطباء بتحاول "



6- البلطجي بيشوف ان الطبيب سفاح بيعمل عمليات اجهاض وبيسرق اعضاء وبالذات هو شايف ان ده بيحصل من حواليه حسب بيئته ومجتمعه اللي فيها معدل جريمة كبير .    "ايوه ده بيحصل لكن التعميم خطأ قاتل ..وانت اللي بتروح تعمل الاجهاض بايديك ومتلومش علي بعض الاطباء الفاسدين وانت اللي بتساعدهم ببلطجتك علي عمليات الاجهاض ومافيا بيع الاعضاء وسرقتها ..متلومش كل الاطباء عشان طبيب فاسد ده بيحصل في كل حتة حالات فساد في نسبة قليلة من الاطباء ..زي ما واحد عمل اجهاض في الوف ولدوا الستات وفرحوا ملايين الأسر ..متلومش الطبيب الفاسد بس لوم برضه مبارك اللي خلي بعض الاطباء فقرا ومش لاقيين ياكلوا وبيضطروا يتجهوا للاجرام ده زي ما انت يا بلطجي اتجهت لبلطجتك مش عشان انت مجرم بالفطرة ولكن مبارك خلاك مجرم بالفقر والجهل والحرمان "



7- البلطجي شايف انه بياخد بالتار وبينتقم من الطبيب القاتل ويفسر بمزاجه ويقول "ولكم في القصاص حياة"  !!...          "مستر بلطجي..قصاص من مين ؟؟ هو مين اللي ضرب الرصاص علي زميلك ؟
ولو القصاص بالدراع طيب ما انت لسه شايف ويلاته من شوية اما واحد ضرب رصاص علي زميلك باسم القصاص برضه !! يعني انت بتعمل نفس اللي انت دقت طعمه وحسيت بالمرارة ..ايه التناقض ده ؟؟
وبعدين انت بتتكلم في الدين ؟؟ انت بتفسر أية علي مزاجك فعلا ؟؟ انت عارف ايه شروط تطبيق القصاص اصلا ولا مين اللي بيقيم القصاص ؟؟ هو اي كلام والسلام ؟؟ هتعمل زي اللي يفسر الأية اللي بتقول "وجعلناكم شعوبا وقبائل لتعارفوا"  ويروح يتعرف علي بنات طول اليوم عشان تفسيره للأية كده !!!..بلاش تخاريف وبلطجة وقرف .




البلطجة نتيجة الفقر والجهل اللي تركهم نظام ديكتاتوري مستبد من اعتي الديكتاتوريات حول العالم وهو النظام السابق وكان من اشد المستفيدين من انتشار البلطجية في كل مكان للانتخابات وخلافه وعشان نتخلص من الاثار دي محتاجين وقت وجهد كبير وتعليم الناس دي دور علي المجتمع المدني والحكومة ولازم يعيشوا عيشة ادمية الاول قبل ما تطالبوهم يكونوا بني ادمين ..دول ناس بعضهم عايش في صفيح هتكلموا ازاي علي الحق والخير والجمال !!! هل ده يعقل ؟؟


لازم المجتمع المدني يقوم بدور جبار عشان الناس دي تلاقي مسكن انساني وحياة ادمية حقيقية لانهم اتظلموا كتير وزي ما بلومهم علي بلطجة البعض منهم انما ساعات بقول الحق مش عليهم الحق علي اللي صنعهم كده وكان فرحان انهم يبقوا كده وهم حلمهم يتغيروا اكيد.

الأطباء اللي درسوا عدة سنوات وتعبوا بيخرجوا عشان ياخدوا ملاليم وكمان يتهانوا جوة مكان عملهم..الطب من اقدس المهن ومع ذلك يهان الطبيب ويشعر بان مهنته تدنس يوما بعض الاخر وانه عرضة للموت في سبيل قضية هو لا يعلم عنها شئ وهي قضية تار وهمي معاه !!

التقصير الامني في حماية المستشفيات شئ مقزز ومخيف وغير اخلاقي..لما الامن بيخاف من البلطجية ودي شغلتهم امال الطبيب يعمل ايه ؟؟ المفروض انه يعالج المريض في جو اصعب من جو الحروب ؟؟
ده حتي في الحروب بتكون المعسكرات مافيهاش الضغط ده لان الراجل بيقوم بدوره وخلاص ولو مات ضحية بين ايديه محدش هيحدف عليه ملتوف لانه قصر !!!


البعض يلوم علي الاطباء انهم عايزين يعملوا اضراب ويقولوا "ياااه معقول انعدمت فيهم الانسانية ؟؟"   واللي بيقول كده ميعرفش ومجربش انه يشتغل في اجواء حرب وحواليه مئات البشر بالسنج منتظرة لحظة الاقتحام عشان تقتل او تصيب المخطأ ..يعني بيشتغل وهو بيستشهد في بعض المستشفيات يبقي اي انسانية بتتكلم عليها ؟؟


عقيدة التار نمت جوة ناس كتير في مصر بسبب اللي شوفناه من نظام قمعي وكمان اللي كان بيحصل من الداخلية من اهانة للأدمية في الاقسام ومافي حد تشتكيله في اي مكان في مصر فاصبح غياب القانون هو السبب الرئيسي لان التار اصبح مرادف للعدل والحق.



كل واحد بيشوف القانون مبيطبقش صح هيحط قدامه جملة "العين بالعين والسن بالسن" ويبدأ يطبقها حتي لو مفهمش هي عايزة تقول ايه ..لكن غياب العدالة تجبر الناس انها تخترعها !

الانتقام وممارسته باليد محرم في الدين يعني الدين مش بيدي الحق لكل مواطن انه يروح ينفذ القانون بإيده والا كانت تبقي غابة .


وزي ما قال غاندي :


An-eye-for-an-eye-for-an-eye-for-an-eye ... ends in making everybody blind


وان لو فضلنا ناخد في التار بدون قانون وبدون عدالة حقيقية العالم ده كله هيمشي بشريعة الغاب اللي بترفضها كل الاديان السماوية .


البلطجي اللي بيقتحم المستشفيات لازم يعرف تاره مع مين ولازم القانون يعود بكل حزم وياخدله حقه طالما ليه حق وفي نفس الوقت تطبق عليه القانون لاقتحامه مستشفي وفي حالة اصابة الاطباء اثناء وظيفتهم لابد من تغليظ العقوبات بشكل رادع فعلا .

زيادة المرتبات وتوفير الحماية والعمل في جو صحي هي الاساسيات الواجبة لخطة شاملة لتطوير قطاع الصحة في مصر ونفضل نقول الطبيب المصري في الخارج مشرفنا ..لا احنا عايزينه يشرفنا جوة الاول وده دور الحكومة في تحسين المناخ اللي بيعمل فيه الاطباء وجعل الميتشفيات مكان ادمي فعلا لا يهان فيه مريض ويعاقب فيه الطبيب المقصر ايضا .

1 comment:

Anonymous said...

تحليل متميز جدا