كتابي الأول ..وتجربة من الحياة ..وشكر لكل الأصدقاء

يوم الاحد اللي فات كان حفل توقيع أول كتاب ليا ..قراء المدونة عارفين اسمي لكن انا قولت لو حد جديد اقوله برضه هههه..انا اسمي معتز هاني والكتاب بعنوان "أخر أحلام الدانتيل" واقيم الحفل في معرض القاهرة الدولي للكتاب ..

انا مش بحكيلكم قصة حياتي لكن فعلا دي كانت من اسعد اللحظات في حياتي فقولت احكي تجربتي مع عالم الكتابة..مش عشان عايز ابقي كاتب وخلاص ولكن عايز ابدأ أول خطوة في الطريق..

من زمان اوي وانا بحب الكتابة يمكن قلت ده في حفلة التوقيع من سنة 1999 بدأت أكتب وسنة 2003 رحت عمل كتاب كروكي كده اي كلام يعني انا اللي عامله ووزعته علي اصحابي وسميته
"صرخة أنثي" لكن طبعا بعد ما حبيت الأدب وبدأت أقرأ لعملاق زي جبران خليل جبران عرفت ساعتها اني كنت لسه ضعيف قوي وفي بداية الطريق ومن سنة 2004 بدأت اتغير بشكل جذري..
لما بدأت مرحلة المقارنة..

دايما في الكتابة لازم تقارن ..انا زمان مكانتش بقارن نفسي بحاجة وكل كاتب مبتدئ بيشوف نفسه نجيب محفوظ أو أحلام مستغانمي وهو لسه في كي جي 2 وخصوصا لو في ناس بتصقفلي..
اكيد ان ده مش ذنب الناس لكن اي حد هتعرض عليه كلام انت كاتبه اكيد هيقولك حلو مجاملة في بدايتك مش معقول هيقولك ايه القرف ده..هههههه

انما انت لازم تقارن نفسك بحد..بكاتب كبير تحطه هدف قدامك وتقول نفسي اوصله ولو بعد عمر طويل..بدأت أتحسن فعلا في عام 2004 ثم بدأت اكتب علي بعض المنتديات الأدبية في 2005 ولاحظت حاجة غريبة قوي ان كتير من مواضيعي بيتم تثبيتها يعني دي حاجة معروفة في المنتديات الموضوع المميز بيتثبت فترة عشان الناس تشوفه ..وبدأت أتعرف ساعتها مع مجموعة من الأدباء الشباب علي المنتديات وفي الفترة دي بدأت اتعلم يعني ايه شعر حر وتفعيلة وغيره علي يد المتخصصين ..وكتبت أشعار كتير لكن مع أول موضوع نثري بدأت هنا أعرف أنا فين بالظبط..عرفت فين نقط تميزي ونقط ضعفي ودي حاجة لازم اي واحد بيكتب يعرفها طبعا..

لقيت ان نقط التميز في النثر والقصص القصيرة وبدأت اسيب شوية الشعر الحر واكتب شعر عامي ..ولقيت ترحيب كبير علي المنتديات زمان في الفترة دي باعشاري العامية ومواضيعي النثرية بشكل مسرحي يعني مش خواطر ولكن نثر بشكل قصصي..وبعدين أنشأت المدونة دي في عام 2007 وبدأت فترة الأعمال الساخرة اللي اتعرفت بيها المدونة بشكل واسع في مصر والعالم العربي ..
ولكن في وسط الاعمال الساخرة كنت بنشر كتير اعمال ادبية وبعض المواضيع المتنوعة سياسية او عن الافلام وغيره..

كان في مقولة شهيرة لأنطون تشيخوف بتقول "إن الطب هو زوجتي والأدب عشيقتي"..فعلا انا كنت في فترة حاسس ان الأدب اصبح عشيقتي ..لكن في نفس الوقت بحب جدا المواضيع الساخرة وبحب اكتبها..
بعد سنوات طويلة بعض الاصدقاء بدأ يكلمني عن نشر اول كتاب ليا ..والبعض قالي اعمالك متميزة للغاية ..بدأت اعرض الأمر علي المتخصصين قالولي أعمالك فعلا متميزة ..قولت طالما الناس بدأت تقول كده انا هأفكر في الموضوع لأن الكاتب لازم ميصدقش نفسه..يعني انا في الاول من عشر سنين كنت فاكر نفسي طه حسين مثلا او مصطفي صادق الرافعي لكن لما تقرأ كتير في المجال ده تعرف مكانك فين وانت افضل من مين ونفسك تبقي زي مين..

وفعلا بدأ التحسن يظهر من 2007  وبدأت أكتسب ثقة فيما اكتبه وبدأت اعرف أقيم نفسي ودي مهمة جدا لأي حد بيكتب..ازاي تعرف تقيم نفسك بعيون الناس..يعني ممكن توصل لمرحلة انك تنشر موضوع وانت عارف انه ممتاز وتنشر موضوع وتقول ده نص نص مش قوي..وهي دي العين الناقدة اللي انت محتاجها مش اي حاجة تكتبها تقعد جنبها وتقول واااااو هههههه..

بدأت أتوجه لدور النشر فعلا..اكتر من حد نصحني يمكن الاستاذة هبة وصاحبي شادي وناس كتير قالولي علي فكرة الكتاب وانا مش عارف كنت منتظر ايه يمكن كنت مستني حد يكتشفني مثلا ..انما ده مبيحصلش الا بالعزيمة وتقديم الاعمال والاصرار علي انك تحط قدمك علي اول الطريق ..زي ما قال باولو كويلو "ان سعينا الي هدف فإن الهدف يسعي الينا"

لحد ما جالي أول رد من المستشارة الثقافية للدار بعد فترة طويلة وكان اسعد يوم في حياتي يوم ما أعجبها العمل بشدة وأوصت بضرورة نشره لأنه متميز فعلا..
ساعتها حسيت ان تعب السنين مراحش هدر وانك مهما تتعب ربنا مش هيضيع مجهودك أبدا ..زي ما كنت زمان فاكر ان المدونة مبيجيلهاش حد لكن في 2009 عرفت ان المدونة يقرأها ألوف البشر في ارجاء الوطن العربي كله من خلال الإحصائيات ومن خلال وضعها في المدونات الاخري تحت بند "مدونات أقرأها" او مدونات اتابعها هتلاقي المدونة دي بفضل الله في كثير من المدونات بيحبوا يتابعوها وانا سعيد جدا بكده..هو الموضوع مش بينجح بتعليقات القراء لأن الشعب المصري زي انا كمان كتير جدا بنقرا المواضيع ونكسل نعلق كالعادة لكن ممكن نعمل شير وخلاص وانا كمان بعمل كده اما بقرأ لأصدقائي حاجات تعجبني..فأنا ساعات بلاقي موضوع مش عليه ولا كومنت لكنه ناجح جدا في عدد الزيارات وعدد القراء وده الأهم عندي..

بدأت الحفلة في معرض الكتاب وبدأت اتكلم فيها عن الادباء اللي بحبهم واللي قرأت ليهم وحضر مجموعة من اصدقائي وغيرهم واتوجه ليهم جميعا بالشكر علي اليوم الجميل ده من عمري..
وبدأت أحب الكتابة أكتر ..مش نوع معين من الكتابة لكن سواء ساخر او ادبي او حتي مقالات عامة..

لأي كاتب شايف ان مستواه متميز .متميز من خلال مقارنته مع غيره مش متميز في رأي نفسه وخلاص..لازم فعلا لو الجميع اكدله ده من متخصصين وهواة ساعتها ياخد خطوة ..
يعني لو كان الموضوع مشي برأي أصدقائي فقط مكانش ينفع مش عشان هم مش عارفين يقيموا ولكن عشان هم هيجاملوك..فلازم كمان تسأل حد محايد ميعرفكش ولا ليه علاقة بيك وتقوله ايه رأيك في اللي انا كاتبه ده..يعني دور الاصدقاء مهم ودور المتخصصين مهم برضه في نفس الوقت مع بعض..

من أجمل الاشياء في الحياة بجانب الحب انك تحقق حلم حلمته اكتر من 14 سنة..وبعد كل الصبر ده تلاقي ان تعبك مراحش هدر وزي ما قال جبران "وراء كل ليل فجر باسم"

تاني مرة بشكر كل اصدقائي اللي حضروا واللي محضروش لأي ظروف ..وبعض الأصدقاء المدونين المصريين اللي حضروا بشكرهم ..وبشكر كل الناس اللي شجعتني في بداية الطريق من سنين طويلة
زي تمام وشادي وسيد وجردوح ومحمد وكل الأصدقاء..وبشكر دار النشر المحترمة علي تقييمها الجميل للعمل..

ياريت مكونش طولت عليكم او عملت زي اعلان سبرايت وقولت "انا كده" هههههه انا فقط بنقل اليكم تجربة وواقع عشته وحلم سعيت لتحقيقه وحققته..
وحبيت اقول ان الاهم من الحلم تصديقه فعلا..وربنا يوفق الجميع ويارب اكمل مشواري علي خير فأنا أشكر الله قبل الجميع..