مسطـــول مـــن زمـــن قـــريش

وقف التاجر القريشي يبيع في السوق وينادي بعلو صوت :


مين يشتري العبد مني ..
وانا بنااااااادي واغني..
ترم ترم تررررم..



وفي كل مناسبة وطنية وبعد كل غزوة قريشية :

تغني نانسي بنت عجيرم المنفوش :

لو سألتك انت قريش تقولي ايه..
تقولي قريشي ابن قريشي..
وكل قريشي الله عليه..
قولها باعلي صوت..
وارفع راسك لفوق..
انا قريشي وابويا قريشي..
وخفة دمي قريشي "وهنا لنا وقفة ..ايه خفة دم قريشي دي؟ "



وياتي يوري من قبيلة مرقدي ليقول :

قريشي انا احبيني..




وتفتح قناة جديدة للكوميديا اسمها "قريش كوميدي" ليظهر فيها كوميديانات قريش كلهم..

المشكلة عندهم بقي كانت في السفر ..تخيل مكانش في يافطة واحدة تقول "قريش60 كيلو" "قبيلة مازنجر بن افروديت 14 كيلو " مافيش خالص ولا يافطة..



وتاتي شيرين بنت عبد الوهاب لتغني :

مشربتش من بيرها ؟
طب جربت تغنيلها؟
ولا ليك صورة في الصحرا تغني قوافلها وتشكيلها؟ "وهنا لنا وقفة ايضا...لا مالهمش صورة في الصحرا خالص "
ممشتش في صحاريها؟
طيب ما غزوتش فيها؟



ويغني تاجر الجواري تامر بن حسني للإعلان عن الجارية الحسناء رشا ويقول :

انا شايف دلوقتي قدامي واحدة..
هيجرالي حاجة..
لو مبعتهااااش..
مشوفتش في جمالها انا اي واحدة..
هيجرالي حاجة ..
لو مسلمتهاش..
يا جامدة ايه اللي انتي عملتيه فيا




ويأتي كاظم بن ساهر ويغني :

فرشت رمل قريش ونامت ..
واتغطت بالشمس..
صارت مثل النار اعصابي..
امتي المزة تحس ؟




ويحدث لأول مرة دويتو قريشي ساخن جدا بين بعرور قريش ومي بنت عز الدين يقول :

انا اظن
اني قريشي متين
انا اظن
اني سلاحي متين
اه يا ناري اه ياناري
ده قريشي مولع ناري
اه يا ناري اه يا ناري
قريشي مولع ناري




وكان لقبيلة قريش رجل يسمي "رجب بن الخازمي " وهو الذي يرد علي الفارس الذ يسلم فرمانات المعارك والتهديد
وذات يوم اتي رجل يحمل فرمان تهديد ووعيد وقال "مارايكم في هذا ؟ ام تحبون الحرب ونظام ؟ وليكوا شوق في معركة ؟ "

فرد عليه الرجل صاحب القبيلة وقال : نادوا الهيفائية

وجاءت هيفاء وقرأت الرسالة وقالت :
رجب ..
دع صاحبك عني..
رجب
صاحبك جنني..
قال ايه يغزونا ..
ده ابن لذونا..
راجل قاسي وغدار..
عايز معركة..
ونظام فرتكة..
يرمينا في وسط النار..
ررررررررجب..

وكانت هذه اصل اغنية رجب الشهيرة






وغني علي بن الحجار لقريشية شكلها عجيب فمها مريب وقال :

سمرا وبودان طويلة.. "ايه دي الجزمة ؟ "
وطويلة ديل الكحيلة.. "بيقول اي كلام "
ياني ونداني غرامي
ومالي في هواكي حيلة
وبقولك ايه
تجيش نعيش
في قبيلة تانية
فيها الحشيش ؟
في قبيلة تانية
فيها الحشييييييييييش




وردت عليه المزة وقالت :

اجمل احساس في الكون
اني احشش بجنون
في قريش معاك
اتنين مساطيل يا سلااام
ده غرام ولا في الاحلام
دوبني هوااااك
شربني حشيش
روحي انا
شكلك خرمان
وشكلي انا
يلا حشش
معايا انا
معايا انا


ويعود تامر حسني من تاثير الحشيش القريشي ويقول :

عمرها حصلتلك دي ؟ هئ
تبقي ماشي في قريش الصبح
تلاقي نفسك بقي بلييييييييييل
انا بقي حصلتلي معاك
وشربت حشيش وياك
انا بقي من يوم مشربته
مش داري وشك من شكل قفاك



وفي سوق عكاظ للمناظرة الشعرية وقفت شاعرتان من شاعرات العرب وقالت الاولي :

اخاصمك اه
اسيبك لا


ثم قالت للشاعرة الأخري:
ردي عليا بمثل هذه القافية لو استطعتي

وردت الشاعرة فجأة وبمهارة مريام بنت فارس :

نينا نينا نينا نينا نينا نا
اوبة نينا نينا نينا نينا نا



وصفق جميع الحضور باعجاب شديد من تمكن الشاعرة من ادوات اللغة العربية




ويقف العريس القريشي الحاضر ليعلن خبر فرحه القريب امام الناس ويقول بصوت عالي :


هتجوز
انا هتجوز
انا خلاص هتجوز وهابطل ابص عالبنات
خلاص هاتجوز وهابطل اقضيها غزوات "لأ فعلا شاب مقضيها "
رقصني عالواحدة
ولا عنتر ولا عبلة "وهنا يغتاظ عنتر وعبلة لانهم كانوا حاضرين اتنين اسمهم عنتر وعبلة "




فيقوم عنتر بسيفه ويزعق بصوت عالي جدا احتجاجا علي كلام العريس ويقول:


الا الا الا الا الا
ايه ده ايه ده ايه ده ايه ده ايه ده ده
الواد ده مين الواد ده مين الواد ده مين ده ؟
قبيلة ايه ده؟
منين ده؟
الواد ده يا ناس
مش وجه اليف
علامات دقنه
دي مكان تنتيف
ده انس ولا جن
يا ناس هتجن؟
طب الا الاالا الا الا الا
ايه ده ايه ده ايه ده ايه ده ده



ويقوم قريشي مسطول فجأة ممسكا قارورة خمر ويقول :

سيا سيا وو سيا تنجبلاووه سيا
يا رايح
رايح فين؟
يا قاعد
قاعد ليه؟


وفجأة يكمل بكلام اخر :

الواد عايزله خنجر
منين اجيبه خنجر؟
الواد عايزله جارية
منين اجيبله جارية
ده الواد بياع الجارية حبسوني وحبسووووووووووه



وينهال عليه سيل من الشتايم والطماطم لانه بيقول كلام اي كلام

ويأتي بائع الجواري فجأة تامر ويقول لمنير :عايز جارية؟ ابيعلك جارية

ويقول منير له : هئ..اوصفهالي..



يرد تامر:

تقولي اوصفهالك..هأوصفلك..
تخينة..تقيلة..
زي الفيل بتتحرك..
ورموشها تقيلة..
تقولش رموش واحد صاحبك..
وعايزني اوصفهالك اوصفها



منير: يخربيتك سديت نفسي هئ..هو النهاردة ايه اساسا انا بايني سكرت هئ

امباااااااااااااااارح كان عندي عشرين هئ
كان عندي عشريين
امبارح
وانا بإزازتي سارح هئ
ولقيت الهوي طارح
كان عندي عشرين..ولا باين واحد وعشرين مش فاكر هئ
كان عندي عشرين
عشررررررين



رئيس القبيلة: لا حول الله الواد سكران طينة امبارح ايه اللي عنده عشرين ده سنه فوق الخمسين باين



وياتي اعلان فجأة في الشوارع بالميكرفون


"الأن مفاجأة قريش مول اب تاون قريش علي صخرة ونص في الصحرا
خيم رمضانية.."ما احنا اصلا حياتنا كلها خيم "
يعني مافيش رمضانية وغيرها ههههههه
المهم
المفاجأة عدد كبير من السادة الزعماء لقريش الافتتاح غدا
اوعوا تيجوا
بااااااااااااااااي يا قريشيين"

ضفيـــرة و إســــورة

جوايا خوف..
جوايا حزن ضرير يشوف..
من عتمته في كهف نور..
خالق ابالسة في شكل حور..
جوايا بحر..
ملحه بلون انفاسها ليه ؟..
وبتمشي الف حورية فيه..
والشمس ساكنة في نور عنيه..
جوايا روح..
السن من عمر النهار..
وفي ليلها شهقة الإحتضار..
مخلوقة بحواس انكسار..
جايز تقولي عرفتني..
من وصفي كله عرفتني..
لكن هازيدلك بيت كمان..
قلبي الفراق عشقي المطر..
مجنون وحاسس بالخطر..
دمعي انتهاز فرصة وجود..
ووجودي عاشق للخلود..
جايز اقولك بتقتل..
جايز اقولك بنهزم..
لكن بعدل..
قدام عيونها القتل عدل..
وبين ايديها هزيمتي عدل..
بعد الكلام ده عرفتني ..
لكن هازيدلك بيت كمان..
جوايا بنت صغيرة..
طايرة بضفيرة واسورة..
وسألتها الحلوة مين؟
قالت بصوت ناعم جميل..
انا بنت حلمك..رحلتك..
قدرك وحب في سكتك..
ضفرت شعري برقتك..
وربطت طوق حنيتك..
فستاني احساسك وبس..
مكياجي لون دمك وبس..
وكبرت بيها وفيا كبرت..
والصورة ماتت فيا صغرت..
بصيت لقيت..
طوق ع الورق..
وضفيرة حلوة بتتحرق..
والحزن بيشبك ايديه..
والحب غير لون عينيه..
من لونه دم..
الهجر لونه الاصلي دم..
والحلم زي البنت مات..
انا حبي كان اجهاض رقيق..
دايما يموت وسط الطريق..
دايما اشوف سياف غرام..
جهزلي رحلة الانتقام..
يمكن عشان قلبي البرئ..
مين اللي ينقذ مني حلمي..
مين اللي هيطفي الحريق !
ينقذ ضفيرة واسورة..
مرسومة بالنار والحريق..

ديكــو وفـــرخـــونة ..الجــــزء العـــاشر

في اثناء سير السيارة التي تم خطف ديكو بها ..



ديكو: يا جماعة انتوا تبع مين بالظبط؟ وعايزين مني ايه ؟

سنقر "عضو الجماعة" : جماعة ايه ؟

العتال "عضو اخر في الجماعة " : جماعة ايه ؟ انت معانا يا ابني؟ احنا اللي خاطفينه وهو بيسألك

سنقر : ااااه لأ ده موضوع شخصي

ديكو: شخصي ايه هو انا جاي اخطب ؟ ده انتوا خاطفيني

العتال: انت عايز تتجسس علينا ؟ وتعرف كل اخبارنا في مهمة خاصة مش كده؟

ديكو: يا نهار اسود ؟مين قالكم انتوا كمان

العتال: التهامي باشا

ديكو: الله يخربيتك يا تهامي الكلب يا سكران يا عرة الرجالة

سنقر: مين تهامي باشا ده؟

العتال: اخرس يا حيوان بدل ما احط عرفك في بقك

ديكو: وصلنا؟

العتال: اه وصلنا اتفضل انزل



وفي اثناء السير في ممر طويل يجد ديكو تلات فراخ بيلعبوا بالكوتشينة


ديكو: ده زي الافلام العربي بجد دايما المختطفين عندهم رجالة بيلعبوا كوتشينة ..انتوا بتلعبوا بوكر؟

الرجالة "في صيحة رجل واحد " : وبنشرب جوون ووكر

ديكو: عاش يا رجالة ..شكلي هتبسط هنا والله ..لو سمحت فين خدمة عملاء المخطوفين ؟

العتال: انجر قدامي يا حيوان

درويش "مؤسس الحركة" : ايه يا ديكو عايز تبص علينا ؟وتتجسس؟


وفجأة يترنح ديكو مكانه ويتقمص دور عادل امام في عمارة يعقوبيان


ديكو: ابص عليكوا ليه ..ابص ع العمارات اللي باظت..اللي بقت من تحت مسخ ..احنا في زمن المسخ..كانت الموضة بتنزل في اقفاصنا قبل اقفاص باريس ..احنا في..

درويش: لا وحياة امك بلاش المشاهد دي عليا انا شفت الفيلم ومتخلنيش اعمل معاك زي صاحب المحل وهند صبري ..

ديكو: احم ..لا خلاص هاحترم نفسي..

درويش: احنا هنعملك اختبار لمعلوماتك السياسية عشان نحاول نجندك معانا ونقلبك ع التهامي اللي مجندك

ديكو: مجندني ايه بقي ده فضحني

درويش: وهندفعلك قده مرتين

ديكو: ابيع نفسي يا باشا

درويش: هاتوا اللي هيسألوه بسرعة



ويدخل تلات رجال سياسة علي ديكو وفي ايديهم دفاتر كبيرة ولابسين بدل فخمة وباين عليهم العز


ديكو: مش هتهزوا اللمبة وكده بقي ونظام؟

اللجنة : لا يا ابني احنا مش هنعذبك احنا هنسألك بس

ديكو: انا تحت عرفك يا باشا

اللجنة: مين هو يا ابني حمدين الصباحي؟

ديكو: اخو بوحة الصباحي يا باشا

اللجنة: ليه سموا قمة دول الثماني بهذا الاسم؟

ديكو: يا باشا واضحة عشان مينفعش اقول السباعي ولا السداسي يعني

اللجنة : انت مع المقاطعة ؟

ديكو: لا يا باشا مبحبش المقاطعة لازم اقول ان شاء الله

اللجنة: طيبب ايه رايك في التمديد؟

ديكو: طبعا اجمل حاجة التمديد خصوصا مع بيبسي ومزة يا سلام

اللجنة: طيب ايه هي التبعية ؟

ديكو: والله يا باشا اسألوا عنها اي ميكروباص التباع طبعا لازم يبقي ليه تبعية للسواق

اللجنة: مجلس الشيوخ فين يا ابني؟

ديكو: شيوخ؟ اكيد في الازهر الشريف يا باشا

اللجنة: روسيا البيضاء ليه اتسمت كده؟

ديكو: حريم ملبن يا باشا

اللجنة: عظيم يا ابني عظيم واضح انك مثقف جدا

ديكو: الله يكرم اصلك يا باشا

اللجنة : هنسألك سؤالين في الحياة العامة كده ..ايه الفرق بين عمرو دياب وتامر حسني

ديكو: النمر والأنثي يا باشا

اللجنة: بتحب صوت هيفاء ؟

ديكو: الصوت بيخرج من البق ..وانا بحب اي حاجة تحت بقها يا باشا

اللجنة: من قائل هذه الجملة : انا عارف ان الملايكة مبتتشافش..وانا حبي اتاخد قفش

ديكو: قفش؟ اكيد مخبر يا باشا

اللجنة: ثواني يا ابني وهتعرف النتيجة

درويش: خلصت الاختبار يا ديكو؟

ديكو: الحمد لله ..كانت اسئلة صعبة بس جاوبتها كلها

اللجنة: انت مثقف جدا يا ابني بالنسبة لكونك فرخة واحنا هنضمك معانا وهنخليك عميل مزدوج

ديكو: زي نمس دوج

اللجنة: دوج؟ اسمه بوند يا ديكو

ديكو: يعني هالعب ع الحبلين واضحك ع التهامي

اللجنة: ايوه يا ديكو وهتتجسس علي التهامي

ديكو: يا عم اتجسس ايه انت هترسم ؟ ده هو بيبيع الاخبار لوحده اساسا

درويش: المهمة صعبة يا ديكو

ديكو: كله علي الله يا باشا

درويش: ربنا معاك يا ديكو

ديكو: بقولك ايه انا هأخلص من رؤؤف زفت تطلعلي انت الله يخربيت الجاسوسية يا اخي

درويش: احنا هنعملك بطاقة جديدة

ديكو: المهنة جاسوس؟

درويش: احتمال ونحط صورتك وانت بتصور ملفات بكاميرا صغيرة

ديكو: ياريت والله يا باشا

درويش: اخرس يا غبي انت عايز تفضحنا

ديكو: طيب وابني يا باشا اللي واقع معاهم دول ممكن يبهدلوه

درويش: متخافش احنا هنبعت اللي يخلص ابنك من ايديهم ..

ديكو: مين يا باشا؟



ويدخل مصطفي شعبان مرة اخري من الخلف ومعاه سلاح القنص

مصطفي شعبان : متبلة؟

ديكو: الله يخربيتك يا اخي هو انت معاهم وكنت بتمثل عليا

مصطفي شعبان : ايوه كانت حركتين كده بس ايه رايك في نطة العربية دي زي بتاعة فيلم مافيا بالظبط

ديكو: طول عمرك جامد يا مصطفي ..لا يونكن الاقي زيك

مصطفي شعبان : ههههههه





يا تري ايه اللي هيحصل مع التهامي وكيف يستطيع مصطفي شعبان مساعدة ديكو في الحصول علي منقار ابنه

الجزء القادم

قنـــاة جديدة طحن

قناة ومرعبة ومخيفة فظيعة وعنيفة "الرعب من اول نظرة " انها ..نيها نيها نيها قنـاة الرعب..

قناة الفزع



بث ترعيبي :


اعلان مدارس:


صوت مرعب يدخل الاستديو يصيح :
الشيطان شاطر..ايوه لانه خريج مدارسنا ..مدارس الشيطان ..ولا مشاغبين ولا متعبين بل شياطين
مدارس الشيطان ..العب يا حمادةمع زميلتك والشيطان تالتكم
مدارس الشيطان مختلطة حبتين ونص
مدارس الشيطان التجريبية ونسختها التحضيرية قريبا
مدارس الشيطان ..شعارنا "الشيطان شاطر "




اعلان فني:



عايز تسمع اللي فاتك "صوت صويت "
بتفكر تخلي ذكرياتك بلون الهباب
الأن مع المفاجأة

شـــــريط المـــوتي
شريط الموتي بنقدملك فيه كوكتيل فني من كل اللي ماتوا ..ام كلثوم.. عبد الحليم..فريد الاطرش
وجزء خاص جدا للمقتولين ..ذكري وسوزان تميم
شريط الموتي بنحاول نسمعك فيه افظع الاغاني "هجر فراق شتيمة "
مع اصدار خاص جدا لكل الاغاني الكئيبة
اغنية هاني شاكر اللي اتشل فيها في الكليب
اغنية حلمي عبد الباقي اللي اتعمي فيها
اغنية ريان اللي حبيبته ماتت فيها
شريط الموتي " وهل تخفي الكأبة"




اعلان زواج :



شركة "القتل الرحيم " للزواج
الزواج نص الدين وتلات ارباع الموت
الزواج يخلصك من كل مشاكلك لانه يخلصك من مصدرها
الزواج هو النهاية السعيدة ..تقدر تاخد نص الجملة الاولاني
شعار الشركة "نحن نزوجكم ولكن..الحمد لله الذي عافانا مما ابتلاكم "




اعلان خادمات :



مؤسسة "الفاجرة" لتوظيف الخادمات
"الفاجرة" تربي ولادكم ..بس علي طريقتها
مجهزة بكل ادوات تربية الملاعين الصغيرين..فلكة وشبشب وخلافه
"الفاجرة" ..قسم خاص لطلبات رجال الاعمال والزواج العرفي من ورا المدام
"الفاجرة" شعارها "الأطفال احباب الله ..واعداء الأنسان "



اعلان تبرعات :


"لص بغداد " للتبرعات
تبرعوا ..وطهروا نفسكم.بدل ما هنطهركم بمعرفتنا
تبرعوا دلوقتي بمزاجكم..لأن بكرة مين عالم
نقبل التبرعات بكل البنوك ..ومافيش وصولات اوعي تحلم بيها..
هنبني مستشفيات ونزوج يتيمات ..بس عندها هناك..
"لص بغداد ".... و "شد ع الأمانة سيفون "





اعلان مطعم :


"ذو الألف معدة " للمأكولات
الجوع كافر..احنا اللي غيرنا ملته..
"ذو الألف معدة " يقدم اقبح المأكولات
وخصم خاص علي طبقنا الخاص " سفاح الأمعاء "
احجام سندوتشاتنا "صغير".. "وسط".. "جهنمي".. "شيطاني".. "عفريت مسلسل"
"ذو الألف معدة" .. "لو كان الجوع رجلا لقتلته ومزقت عينيه "



اعلان جريدة :


جريدة "السرطـان"
ننتشر كالسرطان في جسد المجتمع
اخبارنا منتقاة من عناصر اكثر تضليلا من الشيطان نفسه
الكذب حرفتنا والاخبار القبيحة غايتنا
ملحق خاص لأخبار موت الأقارب ..ابن بيقتل ابوه وام بترمي ولادها وزوج بيكهرب مراته حتي الموت
ومتنساش نسختك من ملحق الاسبوع "مجـــون " فيه كل اللي عايز تعرفه عن الاخبار للحفلات الماجنة والساقطات
جريدة السرطان شعارنا "انا اللي قتلت الخبر "





عزيزي المشاهد بعد هذا الكم من الاعلانات نذهب سريعا للمسلسل العربي
"كئوس الضغينة " ويليه
المسلسل "ملذات الهوان "

ثم الفيلم التسجيلي "تعذيب بطريق بتعريضه للشمس يومين "



ابقوا معنا ...سنعود ..فاهمين..اوعوا تقلبوا..اقسم بالله لو قلبتم انتم عارفين..نيها نيها نيها ..ضحكة شريرة

كــــش غـــني..ميلــودراما مصــرية

غني وفقير علي طاولة واحدة بيلعبوا لعبة مصر الحبيبة شطرنج الألم المصري الخالص وكوميديا سوداء لهموم الغني والفقير في مصر :





الغني "يحرك العسكري" : العربية كل يوم انزل الاقيها مش مغسولة

الفقير "يحرك العسكري " : كل يوم انزل من غير فطار

الغني "يحرك الحصان" :عندي مشاكل في الشغل كتير البيزنس مبهدلني

الفقير "ياكله الحصان" : انا مش لاقي اجيب مية جنيه في الشهر

الغني "يحرك الحصان التاني" : ساعات باكل الكورن فليكس من غير لبن عشان بكسل اروح السوبر ماركت

الفقير "ياكل الحصان التاني" : يعني ايه سوبر ماركت؟

الغني "يخرج بالوزير " :عندي مشاكل زوجية

الفقير " ياكل الوزير " : انا عندي خمسين سنة ولسه متجوز من تلات سنين

الغني "يحرك الملك هروبا" : انا عندي النت بطئ جدا والشركة مش بتصلحه

الفقير "الكشة الأولي" : ايه النت ده؟

الفقير "الكشة التانية" : انا ساعات مش بلاقي العيش الصبح

الفقير" الكشة التالتة" : ولادي معظمهم قعد وساب التعليم

الغني "هروبا بالملك " :القزاز المعشق اللي عندي لونه بهت

الفقير "الكشة الرابعة" :قزاز؟ البيت بتاعي من صفيح

الغني : البنزين بيغلي كل يوم

الفقير "الكشة الخامسة " : والجاز كمان

الغني : الباتون ساليه اسعاره ولعت

الفقير "الكشة السادسة" : والطعمية بتغلي

الغني: المية طعمها متغير اليومين دول

الفقير" الكشة السابعة" : انا عندي تيفود من المية

الفقير "مات الملك " : انا بموت

كووول جدا يا مثقفين

في كل بلد في العالم المثقف ليه صفة واحدة انه "مثقف" يعني بيقرا كتير عنده معلومات غزيرة ومطلع اول بأول علي كل حاجة ..انما عندنا في مصر ليه علامات مختلفة تماما :



أولا : شعره منكوش وهليهلي :

وده يديك ايحاء جامد جدا بمدي ثقافته حيث توجد علاقة طردية متينة بين الهليهلية والثقافة والحركة الهليهلية الضاربة في المجتمع المصري بدأت مع كتاب كبار ومن امثلتها في هذه الايام مفيد فوزي مثلا اختياره لألوانه قائم علي تراث الحركة الهليهلية الاولي
والشعر المنكوش دليل انه يا عيني مافيش عنده دقيقة يا كبد امه يسرح شعره من كتر التفكير في قضايا الوطن وحمل هم الناس ويوجد انواع عديدة للشعر المثقف :

أ ) شعر منكوش للاعلي : وتدل علي ثقافة راسخة واصيلة وحضور دائم لساقية الصاوي للإستماع للندوات الهليهلية ومن امثلتها "الحلزونة يا اما الحلزونة "

ب ) صلع كامل : وده بيكون مثقف ثقافة مودرن اجنبي وفرنساوي وكده

ج ) شعر منكوش وطويل من الخلف : وده مثقف جدا وواعي جدا للي بيقوله وبيكون فاهم تاريخ كويس "اي كلام فاضي طبعا "



ثانيا : يسمع محمد منير وبلاك تيما وفريق وسط البلد :

ومش عارف ليه المصريين اختاروا مطربين للدليل علي الثقافة دي حاجة فريدة من نوعها فعلا وبعدين لاحظ انهم بينقوا اعجب مطربين عشان تبقي حاجة غريبة وخلاص مش مهم حاجة حلوة
يعني صوت اصالة وانغام مش مثقف انما لازم تسمع كلمات غجيبة زي سيا سيا ووا مثلا لو ترجمتها تبقي مثقف بحق ربنا
ورغم ان محمد منير ليه اغاني حلوة كتير الا انه ساعات بيهري بس خلاص معجبينه ناقص يعملوا ليه كعبةبدون فهم ولا وعي هو حب وخلاص حتي لوعمل شريط وحش
بس هو بقي رمز من رموز الثقافة واللي ميحبوش يبقي يع كخ انسان غريب وقديم


ثالثا: دائم الاختلاط بالغرب :

وطبعا دي علامة مش عندهم لأن مش من علامات المثقف الغربي انه دائم الاختلاط بالشرق
وبيكون لزقة ودلدول لكل ما هو غربي دون تفكير او منطق ورغم ان هم اكيد مبيشوفوناش كده تماما "ولن يرضوا عنك ابدا"
فوجهة نظر الغرب في الشرق مختلفة تماما عن الوجهة المعاكسة
لأن لو واحد غربي قال انا كنت مع واحد عربي النهاردة اصحابه الغربيين هيضحكوا
انما طبعا لو شرقي قال انا كنت مع غربي النهاردة كله هيفرح وكأنه شرفنا مثلا رغم انه قعد مع واحد هليهلي تاني مش واحد مهم يعني يعني مش تمثيل سياسي ولا اقتصادي ولا نيلة
وده بجدشئ محزن اننا بنحاول نفهم العقلية الغربية بس هم ميفهموناش وهيفهموا الأقل ليه ؟


رابعا : الندوات الجديدة والمشايخ الجديدة "حسب التدين" :

يحضر كل ندوات معز مسعود وخلافه من الدعاة الجدد ورفض الطرق القديمة في الدعوة
او النوع التاني الرافض لهذا الامر تماما والتمعن في الامور السياسية والاقتصادية بصرف النظر عن الدين زي بتوع الاحزاب


خامسا : بيبص للسقف كتير :
ودي علامة في كل المثقفين من ايام زمان



سادسا: حضور ساقية الصاوي لمجرد الحضور :

لازم تحضر يا مان النهاردة ندوة عن علاقة البطيخة المعاصرة بالماضي السحيق ..وااااو يا مان بيس



سابعا: جزمة مقطعة وشراب منتن :

وده طبعا عشان تبقي مثقف كبير وتقرا كتاب "الحب في زمن الكشري "



ثامنا : التحشيش :

ودي بقي اضافة جديدة طحن فمحدش هيقتنع بثقافتك اليومين دول لو مش بتحشش مع اصحابك وتصطنع الضياع وكده وتلعب اللعبة اياها
ودي من اهم علامات العصر والصايع كمان بيشرب حشيش بس حشيش المثقف واعي وفاهم



تاسعا : كلما كان المسرح اقل واوطي كلما كنت مثقف اكتر :

الحضور للمسارح اللي مالهاش اسم في مراكز الشباب والأماكن اياها وترك الاماكن الكبيرة زي الاوبرا والمسارح الكبيرة
عشان تاخد نيشان المثقف لازم تقولنا شفت مسرحية "الكنتالوب الراكض علي المريخ " في مسرح " الهيلا هوبة "
فيقولوا الناس وااااااااااااو يا مان دهانت مثقف اخر حاجة
انما لو حضرت حفلة محترمة في الاوبرا لموسيقار كبير فدي مشكلة لان ناس كتير حضرتها وانت لازم يا مثقف تبقي مميز


عاشرا: تغيير الرأي كل خمس دقايق :
فالثبات علي رأي لمدة عشر دقايق ليس من صفات المثقفين الجدد
فمقالة علي النت تجيبه ومقالة توديه ولا هو عارف اصل الموضوع ايه




يا مثقفينك يا بلــــد

أخـــر أمــــال القــــيصر

قيصر يتنازل عن عرشه من اجل الحب..
ما أجمل تلك الصورة..
في صغري لم أعرف كيف يكون العرش صغيرا جدا في عيون القيصر..
حتي ادركت ان العرش صغيرا جدا في عيون القيصر..
تلألأت عيوني بحلم اخضر عن هذا القيصر..
يقف بخيله وحاشيته عند النهر ويركع رافعا يديه الي السماء صائحا :


" يا الهي اشكرك علي تحفتك التي اهديتني اياها..
اشكرك علي الانهار والقصور والزهور..كلها صور من صور الجنة..
ولكنني الأن وجدت الجنة..

خذ مني النهر..فنهر مشاعري اليها اصفي واطهر..
خذ مني القصر..فقصر ابنيه بعينيها يعادل الف الف قصر..
خذ مني الزهر ..فزهرة من جود حنينها وإستمالة لحظها تحفظ فيها الشذي اكثر من اي زهرة..

الان عرفت الجنـة..
إمرأة عيناها كليلة القدر..جميلة هي حتي مطلع الفجر..
علي جبينها يغرد طير غرام وينام الف مجنون لليلي..
عيناها اقتباس من اسطورة فينوس وليست مثلها..

ذرنــي ومن عشـقت وحـيدا..
أنا لست بموجوع ولكن تفاصيل الوجعة في جسدي أكبرها القلب وما يشقي..
انا شبه معذب لو كان عذاب البشر هو الجلد..تجلدني رموش خمرية في سريري الدري بعينيها..
انا نصف فراق ونصف بشر..

يا حاشيتي ويا خدمي انا القيصر..
كنت الاشهر والأقدم والأصلح..
انا لست بقيصركم بعد اليوم..انا قيصر هذا الحب..
انا جسم سابح في فلك الروعة..
أحضاني تسع كل صفات البشر وصفاء السماء..
وعيوني تتسع لألف ربيع قادم يشرب من شهد ملامحها..
أسناني مستعدة جدا لمضغ الزهر ومضغ النور النابع منها..
وقلبي مستعد ليوم قيامته العشقية وحالة انفصامه..
وكياني مستعد لوضع القضبان الوردية..

يا حاشيتي..
خذوا مني السلطان..وليسلم لي كل واحد منكم أطهر ما فيه..وأسلم انا سيفي وتاجي..
اعطيكم ملكي واعطوني نور عيونكم..
احتاج لأن اصبح انقي لأني سأراها..
أحتاج لأن أأخذ من كل واحد منكم دمعة صافية ويد حانية ونبضة صادقة..
خذوا سيفي وتاجي واعطوني برائتكم وطهارتكم وعشقكم..

صفاتي لن تكفي..
فاعطوني اجمل صفاتكم اصوغها حلقانا وخواتما لحبيبتي..
وخذوا مني كل غروري وصوغوه طواويس تنعم في مملكة جمالها..
خذوا مني دمي وصوغوه شموسا تنعم كل صباح برؤياها..
وخذوا مني شراييني وضعوها زهورا وياسمين وبنفسج كي تستنشقها حبيبتي فيدب شذاها في دمائي..
اشكرك الهي علي نعمك لكنها بدون حبيبتي لا تعنيني..
اشكرك علي فضلك ومالك وكرمك لكنها الكل وينقصها الكل..

انا لست بقيصركم بعد اليوم..
انا قيصر حلمي وحياتي..
قيصر العشق

وحينما استيقظت من نومي ابتسمت
لاني اعرف انه مجرد حلم
ولم يعد اي احد يقدم اي تنازل ..ولو تنازل واحد من اجل الحب
ولكن اصبح الحب هو التنازل المتاح وقتله مباح