روميو المعفن

لو كان المحمول معانا من زمان كانت معظم افلامنا المصرية انتهت نهايات سعيدة يعني دايما في كل فيلم يدخل

البطل في النهاية وعشان فرق ثانية واحدة مثلا حبيبته تتجوز ويفضل نفس الحوار ..
"مدحت حبيبي ..ازاي تغيب عليا الوقت ده كله وانا مستنياك في جنينة الاسماك يا اناني يا متوحش"
او حكم بالاعدام مثلا مش عارفين يوقفوه عشان كالعادة البطل طلع برئ وفي اخر لحظة والمفتي بيقول كلامه يدخل

واحد يقول وقف الحكم..
فيلم زي فؤادة وعتريس مثلا:
عتريس:ردي بقي هي الشبكة واقعة ولا ايه؟
فؤادة: الو
عتريس:ايه يا فؤادة ازاي تفتحي الهويس وتقلبي البلد عليا؟
فؤادة: بص يا عتريس احنا اتكلمنا في الموضوع ده كتير وياريت ما تكلمنيش ع الرقم ده تاني
عتريس:امال اكلمك ع الارضي؟
فؤادة: اتكلم ارضي يا ابن بلدي
عتريس: سيبي الهويس يا فؤادة وبلاش تركبي دماغك..وانجزي عشان كده هاكسر الدقيقتين..
فؤادة: لسه نتن زي ما انت برضه بتحسبها بالثانية؟
عتريس:مع اتصالات بحسبها بالثانية ما انا غيرت من فترة..
فؤادة:طيب ما تحولي رصيد وانا اسيب الهويس واسيب الفيلم ده خالص
عتريس:تأمري هاحولك خمساية حالا
فؤادة:حاجة غريبة اوي يا عتريس
عتريس:ايه يا حبيبتي؟
فؤادة:مكتوب تم تحويل خمسة جنيهات وتحت مكتوب اعلان كده "جواز عتريس من فؤادة باطل"
عتريس:يبقي عملوها الكلاب واتفقوا عليا انا هاحول تاني من بكرة
فؤادة:دي مؤامرة علينا يا عتريس لازم تدمر الشبكة دي لان حتي نجوم اف ام وصلها الخبر ومشغلة اغنية لشعبولا

بتقول "البت حلوة خالص يا فؤادة مش اي عريس..
يا بنتي لسه شبابك خسارة في ميت عتريس ..
واييييييييييييييييه"
وانا زعلانة اوي من الغنوة دي انا بحبك يا عترة
عتريس:لا ده ميعرفونيش ده انا فوق الجميع زي الاهلي بالظبط
فؤادة:ده حتي رابطة محبي عتريس اكبر من الاهلي وجوازي منك مش باطل
وينتهي الفيلم نهاية سعيدة لوجود الموبايلات في حياة عتريس وفؤادة "شبكة واحدة تجمعنا كلنا"

وبالنسبة للقصص الاجنبية فقصة روميو وجوليت مثلا اكبر قصة في العالم محتاجة محمول لانها كانت هتنقذهم من

الماساة فعلا
روميو:الو ازيك يا حبيبتي
جوليت:روميو اطلع برة الشبكة بتقطع
روميو: انا سمعت انك هتاخدي سم هاري يخرج من كيعانك
جوليت:اه يا حبيبي صباح الزفت اما اخد السم ده ياريت متاخدش ورايا سم عشان مش طالبة غباء والنبي
روميو:ومين قالك اني هاخد سم وراك ما في داهية هو انا اهبل
جوليت:حلو اوي الكلام ده ده كلام جديد عليك ..ده انت صايع بحر يلا ..طول النهار تقولي ضوء القمر وضوء اللمبة

وسايب الشغل خالص يا مقيح
روميو: ده انتي عايزة تتربي بقي
جوليت:وريني يا عنيا
رميو: تصدقي انتي خسارة فيكي الدقيقة اصلا
جوليت:لوز لوز ..ده انا اللي بحولك كل يوم رصيد لدرجة ان فودافون عاملة صورتنا ع الكروت من كتر ما بحولك

يا خيخة
روميو:انتي عارفة انهم لغوا الضريبة ع الكروت
جوليت:الله كلامك رومانسي اوي ظبطتني
روميو: لا وككان هتتكلمي بنفس قيمة الكارت مكالمات ده غير العروض
جوليت: انت كلامك في الحب بيدوخني يخربيت عقلك
روميو:يعني صافية لبن
جوليت:رباط يا جزمة
روميو:خلاص طالما اتصالحنا مافيش داعي للسم بقي انا هاجيبلك شوية ميا من مصر وانا رايح هي كفيلة تظبطك
جوليت:اه انا سامعة عنها في كل حتة بيقولوا ولا سم ولا نيلة مية مصر هي الاصل
روميو:باي بقي عشان الدقيقة انتي هتعيش ولا ايه
جوليت:باي يا نتن
وهكذا انتهت الحكاية نهاية سعيدة بدون ماساة حقيقية وعاشوا في سعادة وتبات ونبات



وطبعا الموبايل مفيد جدا في كل اعمال نادية الجندي للجاسوسية اكيد


نادية الجندي:اسرائيل لازم تعرف حجمها هم مش عارفين انا مين ولا ايه انا نجمة الجماهير

المخابرات: طبعا طبعا ده انتي امرأة هزت عرش مصر ..بس جماهير مين بقي اكيد الزملكاوية عشان عددهم

نادية الجندي: انت هتستظرف يلا..ده انا مدوخة ورايا الملك فاروق الفيشاوي في فيلمين بحالهم و48 ساعة في اسرائيل ظبطت الدنيا فيهم وعملت بونو بونو

المخابرات: طبعا سعادتك ده بالاضافة لفيلمك المرشح في الاوسكار الرغبة مع الهام شاهين

نادية الجندي: المهم مافيش رسايل جديدة وصلت

المخابرات: ايوه في اتنين مكتوبين بالحبر السري

نادية الجندي:حبر سري؟شايفني موبينيل يا مغفل؟ انا قصدي رسايل ع الموبايل يا هلف

المخابرات: اه يا فندم جتلك رسايل ع الموبايل بتقولك ياريت تقري الرسايل اللي بالحبر السري

نادية الجندي: اغبياااااااااااااااااا
حميييييييييير


وهي دي الرسالة اللي هزت عرش مصر لان نادية الجندي انتحرت بعديها وانتهت فترة الجاسوسية