قناة المنور الساعة 12 بتوقيت سمالوط

من بين عصر الفتاوي الرقمية والفتاوي الصفراء سأحاول ان اكون حياديا جدا حين اعرض بعض المكالمات التي ربما تحدث بكل تفاصيلها في المستقبل.. والمستقبل القريب جدا..

قناة المنور الساعة 12 بتوقيت سمالوط:

المذيعة: معانا اتصال نقول الو..

المتصلة: الو ..ازيك يا مذيعة..

المذيعة: ازيك يا متصلة ..

المتصلة: صدقيني انا عايز اكلم الشيخ موت قوي خالص..

الشيخ : هاي يا قمر عاملة ايه..

المتصلة:ازيك يا شيخنا يا جميل انت حد جميل قوي بجد..

الشيخ: ده انتي اللي انسانة رائعة اللهم احفظك يا رب هادعيلك كل يوم والله..خير ان شاء الله يا عسل..

المتصلة: واللهي يا شيخ كان عندي سؤال محيرني جدا..

الشيخ:اتفضلي يا حبي..

المتصلة: كنت بسأل عن حكم الصلاة في المدن الجديدة زي الرحاب مثلا وهل ثوابها زي الصلاة في مدينتي ولا بيفرلي هيلز؟

الشيخ: والله سؤال في محله يا بنتي ..وحاليا ده السؤال اللي علي رأس أولوياتنا في مجمع الفتاوي..وعايزين نضربله فتوي كده ولا فتوة ارضاع الكبير..

المتصلة: والله انتم عسل وفتوي ارضاع الكبير دي عاملة شغل ياريت تفقعونا كام واحدة كده زي دي او زي بتاعة التدخين في رمضان حلال..

الشيخ: طبعا يا بنتي احنا هنا عشان نريحكم بس..والدين النصيحة ..

وفجأة يتقمص الشيخ شخصية القزم اللي بيظهر في اعلان ميلودي ويعمل حركة ببقه: "مممممممممم"* إنصح..

قناة الدين في كبسولة الساعة 4 بتوقيت "الجبلاية":

المذيع:مين الجميل اللي معانا ع الخط..

المتصل: انا ولد علي فكرة يعني لو مش عايز تكمل اتصال اقفل..

المذيع:ولد؟ طيب كمل وامري لله عايز ايه يابني؟

المتصل: ممكن اكلم الشيخة ؟

المذيع: ومالك بتقولها كده بطريقة زي ما تكون تقصد الش...

المتصل:اقصد ايه يعني مش فاهم انا بنطقها كده..

المذيع:طيب خلاص انت هتتختنق معايا ؟متصبح تاتا اتنين في تلاتة..

الشيخة: ايوه يا حبيب قلبي اامرني..

المتصل: الشيخة ؟انا مش مصدق نفسي انتي الشيخة ؟كان نفسي اسمع صوتك من زمان..

الشيخة: وعجبك؟

المتصل:الا عجبني ده ناعم جدا ده وداني عالم تاني ده انا..

المذيع:خش في الموضوع يا استاذ..

المتصل: والله انا عايز اسال هي الثانوية العامة حلال ولا حرام؟ وبالنسبة لسلسلة فتاوي البول والبراز انا كان ليه واحد صاحبي ابوه مبروك يا تري ممكن اخد بق من بوله؟ والسؤال الأخير امي عملت كحك في العيد بحاجة اسمها "خميرة بيرة" فهل دي حرام عشان البيرة اللي فيها ؟وطالما الكحول حرام يعني مينفعش احط ميكروكروم ع الجرح؟ وهل ورنشة الجزمة بالاسفنجة حرام ولا القماشة؟

وشكرا

المذيع:والله اسئلة بنت حرام زي المتصل بالظبط

الشيخة: واللهي يا ابني انا شايفة ان من الابتدائي للإعدادي حلال ومن اول اولي ثانوي لحد الجامعة حرام والحضانة مختلفين فيها..وبالنسبة للثانوي فهما اختلفوا قالوا علمي علوم يمكن مباح وعلمي رياضة حرام والادبي كله حرام في حرام..لانهم بيعاملوهم علي اساس انهم فئران تجارب وبيحفظوهم بغباء فالأولي لداخل الأدبي الفطور في رمضان وعدم سماع تامر حسني لمدة شهرين..وبالنسبة للبول فاشرب بول ومتقولش بول قول كوكاكولا..والخميرة بيرة اكيد حرام يعني ليه مسموهاش خميرة فودكا مثلا او خميرة تكيلا وانما هو استخفاء وراء ستار..وورنشة الجزمة بالقماش اصح لان الاسفنج ناعم والجزمة صلبة ولا يصح..والله اعلم..

قناة "افتي يا عم المفتي" الساعة 5بتوقيت العتبة:

المذيعة:مساء الفل علي كل مشاهدينا وياريت يكون مزاجكم عنب أو حتي خوخ وبنقولكم كلكم قشطة كيك هيبدأ برنامجنا وانتم حبايبي مكتوبين علي قلبي بتوعي مكتوبين علي كوعي..

المتصل: ايوه يا ست الكل؟

المذيعة:ايوه يا كاظم

المتصل: كاظم مين يا ستي؟

المذيعة: اممم انت مش كاظم اصلي ليل ونهار بحلم بكاظم بموت في كاظم بعشق كاظم..

المتصل: طيب ياريت تسيبيلي نمرتك في الكنترول يا عسل..

المذيعة: لأ خلينا اصحاب احسن..

المتصل: لا حول الله طيب ما احنا هنبقي اصحاب امال فهمتي ايه يا خلبوصة؟

المذيعة:طيب ايه اسئلتك؟

المتصل: ابدا ده كام سؤال سهلين كده..هل سماع عبد المطلب بعد تامر حسني حرام؟ وهل سماع فريد الأطرش من الكبائر؟ وانا جبت ماوس بدون سلك وبعدين ركبتله سلك فهل ده حرام من باب "التبرع بالأعضاء "يعني ؟

الشيخ: يا ابني بارك الله فيك وحفظك بالنسبة لعبد المطلب فهو غير مستحب يعني اغانه اصلا تخليك يجيلك تبول لا ارادي اما تامر فياسلام علي تامر قول معايا كده .."جربت اكتر ماللي نفسي فيه..اييييه جيتي انتي بسرعة يا بنت الايه ..ببساطة كده قلبي قدرتي عليه"

المذيعة:"وان..تو"

الشيخ: وفريد الأطرش ياريت متسألنيش عنه ليه يا ابني تضر نفسك طالما انت لسه شباب فريد الأطرش ده للكبار فقط يا ابني انما الشباب لأ واصحاب القلوب الضعيفة والحوامل لأ..وبالنسبة للماوس فأنت تغير من خلقته فطالما هو "ويرليس" فلماذا تضيف له سلك فهذا خطا وغير مستحب وبالنسبة لسؤال قريب من هذا وهو من متصل سابق كان يسأل عن تركيب الكروت وأقول له لا باس بتعريف كرت الشبكة قبل الدخول للشبكة ولكن لابد من تعريف كرت الصوت قبل سماع الصوت..وقفل الجهاز بعد ان تري افلام كاميرون دياز او انجلينا جولي واجب شرعا لكي تأخذ انفاسك ولاتري الاثنين معا بل خذ اخف الضررين ..وخف تعوم..والله أعلم..

المذيعة:انتهت برامجنا لهذه الحد علي الله تكونوا استفدتم ولو عندكم اسئلة ابعتوها علي ايميل البرنامج لحد ما اشوف مين ظبطني ع الكنترول.