Monday, April 12, 2010

صبـــــاحو مــــصري







صباحك مصري ؟ بتشتكي دايما من اول ساعة صحيان بسبب اللي بيحصل لو فاتح الشباك؟
اكيد يبقي انت اكيد في مصر ..دايما الصباح في مصر مختلف تماما صباح زي الاكل المصري
تحس انه ملخبط زي الكشري الاكلة اللي اخترعها المحشش الاكبر وحط اي اكلات علي بعض
سواء الاصفر اوا لكشري المصري ابو جبة كلها تخاريف اصيلة لمستر حشاش الاكبر
الصباح المصري بقي بالظبط زي الاكلة دي اخر لخبطة

لو صحيت الصبح وفاتح الشباك مش هتعرف تنام تاني لو صحيت علي 6 كده غصب عنك
ممكن تسمع اصوات العصافير البلدي المصرية اللي بتاكل كل ما يحلو ليها لحد ما تبقي مش قادرة تطير
وواحدة تقف تغني عصفور طل من الشباك وقاللي يا نونو !
ما هو لازم يا ست عايدة العصفور المصري ده يقولك يا نونو لانك بالنسبة لحجم كرشه نونو
ده عصفور بلدي سمين بينهج وهو بيطير متفهمش بياكل ايه بالظبط ويقولك بيأكل العصافير الصغيرة في بقها
ههههههه ده انت متفائل قوي يا عم ده بياكل اكلهم حتي لاحظ ان الصغيرين دايما بيصرخوا
اسوأ حاجة الصبح صوت العصافير الشديد ده لو كان تحتك شجر يبقي هتتبهدل من الصوت ده ناقص يشخروا بليل يا عم الحاج من حجمهم ده
لأ والعصافير التانية اللي بتخبط في الارض دي يقولك عصافير الجنة ! جنية ايه يا عم هي شايفة الارض اساسا لما هتشوف الجنة دي عصافير سكرانة باين

ممكن بقي لو تحتك مصلحة حكومية تسمع صوت الموظفين الصبح بدري قوي علي 7 كده تلاقيه باعلي صوت في حنجرته
"صباح الفل يا استاذ علي "
والتاني باعلي صوت "صباح الجمال يا محمود عملت ايه امبارح في الموضوع ؟ "
ويدور الحوار كأنه في ميك في الاذاعة المدرسية
كأن كل الناس صحيت خلاص ياعم طيب وطي صوتك جايز ناس لسه نايمة
ولكن دايما الاستاذ علي بيعتبر الناس كلها صحيت طالما هو صحي

كان تحت بيتنا بقي حالة خاصة كل يوم واحد بييجي الصبح بيحي المدينة بالكامل بأعلي صوت ليه
"صباح الخيييييييييييييير يا ولاد الك...........
صباح الخييييييييييييير يا ولاد الم.............
صباح الخير يا مع....................."
وهكذا كل يوم بنسمعه وهو بيكنس الشارع وبيلقي علي المدينة تحيتها الغريبة
معرفش هو بيشتم مين بالتحديد بس تقريبا البلد كلها !

وساعات بقي تصطبح علي كذب
زي ميكرفون معدي يقولك "بشرع عظيمة لاهالي المدينة الكرام سيتم اليوم افتتاح محل هريدي
لاحدث الاحذية اسعار خاصة بمناسبة الافتتاح سعر الكوتشي اديداس ب 40 جنيه "
وهنا لينا وقفة اديداس ايه اللي ب 40 جنيه ؟؟؟
يمكن بتاع خالتي اطاطا ؟ احتمال تكون هي صاحبة المحل اساسا.

او تصطبح علي صوت بتاع الانابيب وانا بستغرب مين عايز انبوبة الساعة 7 الصبح بجد ؟
هيشربها ويرجع الفارع ولا ايه ؟ ايه الفطار الغريب ده ؟
ولا قاعد من امبارح يا عيني ودقنه كبرت جنب الدش ونفسه يستحمي يعني ؟
ما حبكتش يعني الانبوبة دي ما انت نازل الشغل اما ترجع بقي

او اصوات اتوبيس المدرسة وده اسوأ شئ لو جنبك اطفال صغيرين راحين حضانة
الاتوبيس ييجي من الساعة 6 زمامير لمدة نص ساعة علي ما محمد يصحي ويفطر وبعدين يرد عليه
طيب يا عم سعيد نازل اهو
وعم سعيد يزمر تاني ..عشان كده الاطفال بتتعلم تسب لعم سعيد من صغرها
بصراحة ليهم حق ده راجل مستفز اوي ومعاه الدادة بصوت عالي كل يوم
"يلاااااااااااااا يا محمممممممممممممممممممممممد"
"يا محمممممممممممممممممممممممممممممممد"
وكأنها بتغرق ع الصبح او محمد ده اللي هينقذ حياتها

او الراجل بقي الروش اللي نازل بدري وبيشيل غطي العربية ولابس نضارة شمس ومعلي الكاسيت ع الاخر عشان يتسلي وهو بيشيل الغطي وبينضف عربيته الصبح
طيب يا عم انت بشكلك ده رايح فين؟ ده سيتي ستارز مبيفتحش بدري كده
انت اكيد رايح تتفسح ده مش لبس شغل خالص

وفي ناس بقي ترمي اطنان من اكياس الزبالة الصبح بدري بحجة ان الزبال ييجي يشيل بدري يعني
طيب ايه كمية الزبالة دي يا حاجة؟ يا تري اتعشيتوا درفيل مشوي امبارح ؟
ولا كلتوا وحيد قرن ع الفحم ؟

والناس اللي بتييجي تقول اي كلام ع الصبح زي واحد جاي في ميكرفون وواقف الساعة 8
يقول
"معايا دليل المدينة سعر الكتيب 10 جنيه
الدليل طبعة جديدة وكلنا محتاجينها "
المهم قعد يعيد الجملة دي حوالي 40 مرة
لحد ما واحد طلعله وقاله
" يا اخي امك علي ام الدليل اللي بتبيعه اتكتم بقققققققققققققققققي"
وهو فعلا عنده حق دليل ايه ع الصبح هو انا تايه يا عم ؟
وبعدين انت شايفني جاي من المريخ ؟ ده انا ابن بلدك
يقولك الدليل مزود بخريطة المدينة وفرحان قوي
مبروك يا عم ع الخريطة بس هي مدينتنا كلها علي بعض 2 كيلو
مش عارف عرفتوا ترسموا الخريطة ازاي اكيد يا دوب فتحوا البرجل اترسمت لوحدها

وساعات بقي تنزل من بيتك الساعة 8 كده تلاقي ناس واقفة قدام محل بتشرب بيبسي
والغريب اننا 8 الصبح مش فاهم البيبسي ازاي بجد يتشرب كفطار ؟


يعني الصباح المصري ليه خصوصياته وطقوسه الغريبة جدا في كل مكان في مصر
وصباح الخير يا مصر.

No comments: