ده مالــوش بــديل

كل مشكلة في مصر ليها حل ..حكومتنا مبتغلبش في حاجة ابدا ..يعني حمادة يلعب والحكومة تلعب وكله بيلعب علي ودنه..

قالك يا عم شوفلنا حل مش عارفين نكسب ميداليات في الأولمبياد قالولك الحل في قلبظ نحط صور واحنا بنكسب ميداليات بالهبل ولا يهزك خالص يا برنس
طيب مش عارفين نروح كاس العالم ولا نعمل فيه حاجة قالك نعمل فيلم ونروح فيه كاس العالم ونسميه العالمي كمان
طيب مش عارفين نختار حكومتنا يا عم الحاج ومافيش انتخابات نزيهة قالك ولا تزعل خالص مصر مش عارفة تختار حكومتها بس ممكن تختار طعم شيبسي المفضل ليها في اكبر استفتاء !

يعني من الاخر كل حاجة ليها بديل ونظرية البديل في مصر ضاربة في كل مناحي الحياة عندنا اللي عاريز تعمله اعمله في عالمك الافتراضي زي قلبظ وشيبسي

عايز رئيس جمهورية تفصيل؟ بسيطة خش رشحه ع الفيس بوك وهات بتاع خمس الاف واحد معاك وقول ده رئيس جمهورية بناءا علي استفتاء الفيس بوك وعيش ايامك

الانترنت بطئ ومش عارف تشتكي حد ؟ خش اعملك جروب ع الفيس بوك ونفث عن غضبك وابقي قابلني لو حد عملك حاجة ولا حد استجاب لشكوتك

وبالنسبة لانتخابات رئيس الجمهورية احنا ممكن نعمل صورهم في شيبسي ونجمع وش ومناخير وحواجب واللي تجمعه كامل يبقي هو رئيس جمهوريتك يا عم
واحد حزب وطني بقي يجمع عين ايمن نور علي حواجب حمدين علي مناخير البرادعي يقولك "مين ده ؟ حسني ؟ "
لانه متبرمج طبعا علي شخص واحد اكيد مش هيتخيل حد تاني ممكن حتي يطلعله في شيبسي

وبالنسبة لازمة الرواتب وكده واحد كل شوية يقولك الحقونا بناخد 99 جنيه وبتاع والشخص ده طبقا لنظرية البديل اكيد حريف بنك الحظ لانه بيطلع كل عقده في اللعبة دي
وبيحاول يكون مليونير ودايما يكسب الجيم وياخد كل فلوس البنك .

واحنا عندنا كوادر كتير اوي ممكن تبقي رئيس يعني زي مثلا بحراوي "الرجل اللي بيعاكس"
يقولك ايه في الخطبة "يا حنان الشعــب..أحكـم "
وكمان ممكن اللمبي "الحكم الحكم..الشعب الشعب..الحب الحب..من طرف رئيسكم اللمبي "
او كابتن مدحت شلبي ينفع اوي برضه "هلا هلا هلا يا شعبي يا نهـــار أبيـض..ايه الجمال ده..احتجاج ايه..حبيب والديه ولا ..هلا هلا هلا "
يعني الاختيارات كتير اهه امال بيقولك محدش ينفع ايه يا عم ؟

وحتي الكورة ليها دخل كبير في نظرية البديل
يعني التعصب الرهيب للاهلي او الزمالك اهو بديل عن الانتماء السياسي والحزبي الهابط في بلدنا مش لاقيين اوي حاجة ننتمي ليها فبنتحول بجنون لانتماء كروي
ويقولك انا مصري اهلاوي مانشستراوي عمراوي.. ايه يا عم كل ده واحدة واحدة علينا ..
يقوله لسه مكملتش وكمان ريال مدريداوي اي سي ميلاني سلتيكي ليوناوي يعني مسابش دوري في العالم الا اما لجأ عليه ..
بصراحة ارحم ميقولك انا تجمعاوي نصراوي وفداوي والجو الحزبي العجيب بتاعنا ده اللي متعرفش فيه اهداف الحزب الا اما تمضي استمارة
وممكن تمضي عشان تطلع رحلة وخلاص واهو كله بحسابه..

وكان زمان يقولك محلاها عيشة الفلاح قاعد في الارض ومرتاح دلوقتي ولا معادش مرتاح ولا حاجة موبايله الصيني معلق والدش بيقطع والنت مش راضي بكبل ديل الجاموسة
يعني التكنولوجيا بوظتله حياته وكمان بياكل شوربة اندومي في قلب الارض
ولو ارضك بتنده اديها اندومي تبقي تمام وانغام تغني تعـــالي يقولها روحي في داهية بقي وجعتيلنا دماغنا انا عايز سيتي ستارز

والبديل كمان دخل في الجامعات قالك مش عارف تدخل كلية هنعملك بديل بفلوس ويكتبوا فوق الجامعة شعار "بفلوسي يا كلب "

وربما كمان المفتش كرومبو هو البديل اللي بيحقق العدالة الغايبة !
يعني البديل بقي خلاص في كل حاجة في حياتنا حتي الجواز عملوا له خط الخاطبة الالكترونية عشان تحس ان العرايس علي قفا من يشيل ده بديل الجواز الجديد.


الا حاجة واحدة في مصر مالهاش بديل !