يا تعـليمك يا عم مبـارك

من اكبر قضايا الفساد في عصر مبارك كانت التعليم..مدرستي ومدرستنا كلنا والبلاوي اللي كانت فيها ونظام الصم والبكم في التعليم القائم علي التحفيظ بدون فهم خردلة مما نحفظ اصلا .

اول حاجة جملة "شف الخريطة" ..ليه؟؟ اشف الخريطة ليه؟؟ ما هي قدامي اهي في الكتاب ممكن افهم واعرف مواقع البلدان من غير ما اشف الخريطة بشفاف والصقه في الصفحة اللي قدام الدرس ..وليه اكتب التاريخ لازم ميلادي وهجري في كل حصة وده ع اليمين وده ع الشمال ولو لخبطت تبقي مصيبة ..طيب ما انا عارف تاريخ النهاردة انا مش جاي م المريخ ممكن اكتب تاريخ واحد وخلاص ولا يعني ده نوع م الوحدة الوطنية في الكشكول اني لازم اكتب الميلادي والهجري طب ما اكتب التقويم القبطي كمان بالمرة ..

وايه حكاية "حاذي يا ابني" في الطابور دي ؟؟ احاذي ايه ؟؟ الحاجات دي ممكن اعملها في اي مكان جيمانيزيوم او تدريبات انا مش جاي ارقص في المدرسة الصبح ..وبعدين طيب ايه لزمة حصة الالعاب طالما هنرقص في الطابور ع الصبح وبعدين ده مش هينشطني اني اكون لسه صاحي واقعد اصقف وارقص في تدريات الصباح بالعكس ده هيدخلني الفصل جعان وعطشان وعايز انام تاني من كتر التمارين

طيب ليه بنتعاقب واحنا بناكل في الفصل ؟؟ ايه الاهانة في الجوع للمدرس؟؟ انا جعان او عطشان ليه لازم اعمل خندق تحت الدكة بتاعتي واقعد اكل ؟؟ هو حرام؟؟ ليه يعني اما اكل او اشرب ابقي مش بحترمك يا مدرس ؟؟ مين زرع فيك الفكر ده اصلا ؟؟

وليه احفظ القصة اللي المفروض دي عمل ادبي رائع لكبار الكتاب الاجانب ..ليه احفظها واعرف سؤال "من قائل هذه الجملة وفي اي مناسبة؟" ازااااي؟؟ السؤال ده اجرام في حق التعليم وفي حق العقول البشرية كلها ..هو انا المفروض اما اقرا قصة احكيهالك ولا اقولك جملة جملة واسمعها وخلاص وانا مش فاهم مغزاها ؟؟ حرام علي امكوا يا بتوع التعليم ان شاء الله كل الهري ده هيتغير بعد الثورة ونشوف نظام تعليمي محترم قائم ع الفهم والبحث في المكتبة او النت او غيره حاجة تشغل عقول الطلبة مش حفاظة وخلاص ..

طيب ليه يا مبارك في عصرك التعليم كان اوسخ منه ما فيش؟؟ ليه عملت كده في ولادك ؟؟ ليه حصة التربية الوطنية كانت عبارة عن حصة للعب الكوتشينة والشطرنج في الفصل ؟؟ وليه مافيش احترام للمدرسين ؟؟ لانك بتديهم 99 جنيه في الشهر يا ظالم..فهم بيطلعوه ع الطلبة وده حقهم طبعا ..خليت مهنة المدرس الخالدة لايتمناها اي احد واللي يطلع مدرس يبقي يا حظه النحس ومرتبه البخس..

ليه خليت مدرسين الالعاب بكرش ؟؟ ومدرس الزراعة والصناعة والكهربا حصصهم عبارة عن كلام في اي مواضيع تانية لان محدش مهتم بالكلام ده ؟؟ هي مش المفروض رغبات ؟؟ انا يا سيدي مش مهتم بالكهربا تماما ليه تديهاني ؟؟ هو اي حشو وخلاص ؟؟ بذمتك ده نظام تعليمي؟؟ بذمتك ازاي راجل يقف شاب زي الورد يعمل مربي في حصة الزراعة والمدرس ياخدها بيته للمدام ؟؟ ازاي مش دي تدبير منزلي للبنات ؟؟ ايه اللي خلي الولاد في حصص الزراعة يعملوا مربي ؟؟ هلس وتعليم هلس منك لله يا شيخ

وليه تقعد 70 في الفصل ؟؟ هو في كده في العالم ؟؟ ولا عشان تلهف انت مليارات الفلوس وتخلع وتسيب البلد من غير مدارس كفاية ؟؟ 70في الفصل ؟؟ ده لو خمسة منهم كحوا الفصل باظ ولا حد سامع حاجة ؟؟ ليه يا مبارك خليت العيال تعمل قراطيس وتحدفها ع المدرس ؟؟ ايه السبب؟؟ عمرك فكرت في ده يا مبارك ؟؟ لانهم مبيحترموش واحد بياخد 99 جنيه في الشهر يا مبارك ؟؟ شايفين انها مهنة منحطة مع ان ده غلط بس انت يا مبارك زرعت في دماغهم كده ان المدرس هو اقل فئة في المجتمع منك لله يا اخي بوظت مهنة من اقدس المهن

بذمتك يا مبارك عمرك سمعت نطق مدرسين الانجليزي في مصر ؟؟ كارثة حقيقية.ولا هو نطق امريكاني ولا بريطاني متعرفش جاي منين بالظبط ؟؟ لان طبعا الكليات اللي بتطلع مدرسين انجليزي التعليم فيها مافيهوش اي تقنيات حديثة تساعدهم علي النطق البريطاني او غيره ..سمعت نطق اي مدرس في مدرسة او في مجموعة يا مبارك ؟؟ مدرس الانجليزي بيشتم ويقول " انت ياد يا صنانة" يا مبارك..مدرس الانجليزي بينطق صعيدي يا مبارك ..منك لله يا شيخ

طيب بذمتك في طالب في ثانوي المفروض يمسك دولة دولة ويحفظ صم الانهار اللي فيها والجبال والمحيطات والطرق حتي وهو مش هيتخصص في الجغرافيا اصلا ؟؟
ليه هو داخل من سيربح المليون بروح امك ؟؟ كل بلد حتي الدول الافريقية الفقيرة احفظ انهارها ولو سألت ليه يقولك هو كده احفظ انهارها وجبالها وخلاص..يا عم طيب ما تعرفني تاريخها او حاجة بدل مساحتها وعدد سكانها وبعدين الحاجت دي بتتغير مع الوقت ازاي احظظ عدد السكان وهو بيتغير كل سنة ؟؟ انتوا بتعملوا كده ليه ؟؟ هو حفظ وخلاص ؟؟

طب بذمة ابوك يا مبارك شوفت المدرس وهو بيتحايل ع الطلبة تجيب طباشير للفصل ؟؟ او تعلق لوحة ب 7 جنيه عشان منظر الفصل ؟؟ عارف ليه يا مبارك عشان الفصل جدارانه شبه واقعة ومقيحة زيك بالظبط ..من الفلوس اللي هبرتها انت ووزرائك جدران الفصل بايظة والمدرسة خشب وايلة للسقوط يا مبار وفيها مجاري يا مبارك
المدرسة المكان المقدس فيها مجاري يا مبارك ..

طيب بذمتك يا مبارك في حاجة اسمها حفظ موضوع التعبير ؟؟ ده اسمه التعبير يا مبارك من كلمة "يعبر" يعني بعبر عن نفسي يا مبارك ازاي احفظه عشان اجيب درجة عالية في العربي يا مبارك ؟؟ منك لله يا مبارك

طيب بذمتك يا مبارك ينفع تخلي الناس تسافر عشان تتعلم لان في بلدها مافيش مدرسة ؟؟ يعني في ناس بتسافر عشرات الكيومترات عشان تلاقي اقرب مدرسة بالذمة ده في شرع مين ؟؟
طيب شوفت الجامعات يا مبارك ؟؟ شوفت مبانيها عاملة ازاي يا عم مبارك ؟؟ شوفت الكافتيريا ومنظر الهامبورجر اللي جواها يا مبارك اللي يجيب تسمم وشلل كمان ؟؟
شوفت جدران المباني ونظم الامتحانات ؟؟ الناس بتحفظ اسئلة "اختار مما بين الاقواس يا مبارك "
mcq
الناس بتحفظ الاجابات يا مبارك لان تعليمك افسد منك يا مبارك

ليه عملت كده في اجيال يا مبارك ؟؟ مش في التعليم بس في كل حاجة بس انا بعتبر التعليم سب في حاجات كتير ..الحمد لله الثورة خلصتنا من امثالك بس يارب منقعدش نحفظ تاريخ الثورة تاني بنفس اسلوب حفظ زمان في المدارس ..وياريت يتلغي سؤال "علل" وحياة ابوك..واي سؤال قائم ع احفظ بس

ويارب التعليم وغيره وجميع القطاعات الي الافضل ..وتحيا مصر