مساجينووووووو

رسالة الي مسجون :


عزيزي المسجون عزيزتي المسجونة..طبعا انتوا في الشارع دلوقتي وانا قولت اكتبلكم الرسالة دي يمكن تشوفوها وانتوا في اي نت كافيه ما انتوا عايشين حياتكوا برة دلوقتي ومقضينها ..ياريت كل واحد يرجع زنزانته في سلام واحنا هنقدم للداخلية الاقتراحات دي عشان تسلموا نفسكوا وتسيبوا الناس من غير خوف شوف يا سيدي :

1- تكييف الزنزانة بتكييف اخر موديل وتنقية للهواء كاملة
2- عدد 2 شاشة ال سي دي 50 بوصة عشان تستمتعوا بزنزانة جامدة وشقية
3- ليلة الخميس من كل اسبوع فقرة رقص شرقي داخل الزنزانة لزوم الفرفشة
4- دهان النزنزانة باحدث الالوان ومش هنسيب كرانيش السقف كمان
5- شبكة واي فاي ولاب توبات لجميع المساجين مع طرابيزة خاصة لكل مسجون عشان يحط اللاب توب بتاعه وممكن تطلب "اي باد" بالطلب
6- تمارس العاب الجولف في حوش السجن والعاب باسكيت وتنس واشيك اللعبات
7- مدربين جيمانيزيوم كل يوم الصبح وتدريبات علي احدث الاغاني الاجنبية
8- مياه معدنية وغداء كل يوم من انتركونتينتال جاهز ومغلف
9- فتح فروع لاجمد المطاعم داخل السجن
10- زيارة اسبوعية كل يوم جمعة لسجون اخري للتعرف علي اصحابكوا المجرمين ومشاركتهم اخر اخبار الاجرام والبلطجة
11- تدريبات خاصة للسادة المزورين والاستعانة بادوات حديثة للتزوير وتعليمهم احدث وسائل التزوير في العالم بالاستعانة بافلام وثائقية
12- العاب حربية وقتال علي الكمبيوترات للسادة المحكوم عليهم بالاعدام والقتلة
13- افراج عن المحبوسين اللي قتلوا زوجاتهم عملا بكلمة "اقتل مراتك تنعم بحياتك"
14- انتخابات نزيهة وشفافة لمعرفة "زعيم البلطجة" داخل السجن حسب عدد الاصوات
15- لاصحاب الاشغال الشاقة المؤبدة سيتم تحويل العقوبة الي "الاشغال الحلوة المقطقطة" لتسهيل فترة السجن
16- حمامات سوبر لوكس جهزة بقواعد تفتح بالسقفة وسيفون تاتش
17- يمكن طلب زنزانة ايجار جديد مفروشة احدث صيحة باجر زهيد
18- حلويات يوميا وفاكهة بعد الغدا لحد ما بطن سعادتك تتملي ع الاخر
19- شغالة فلبينية لكل مسجون تسمع طلباته بس بلاش حركات ناقصة معاها
20- الخروج في نص او ربع المدة حسب الجريمة


ودي اقتراحاتنا ويارب تحنوا علينا وترجعوا زنازينكوا وهنحاول نوفرلكوا الطلبات دي كلها وسجن سعيد ليك ولاسرتك .."هابي حبس"..انجوي يور تايم يا مسجون يا عسول





برنامج "مساجين بلا حدود" :


البرنامج كان اسمه "خلف الاسوار" بس نظرا لان الاسوار معدش وراها حد اصلا هنسميه "مساجين بلا حدود"


المذيعة : اهلا بيكوا في حلقة جديدة من "مساجين بلا حدود" واحنا النهاردة من المهندسين الساعة 1 بليل وشايفين بلطجي هناك ماسك رشاش في ايده ونقوله ازيك
المسجون : اهلا انتي مين ؟ طلعي اللي معاكي يا مزة
المذيعة : انت مسجون ولا بلطجي عادي ؟
المسجون: بسم الله الرحمن الرحيم الاجابة مسجون بلطجي
المذيعة : وياتري خرجت ازاي من السجن ؟
المسجون : خرجت ازاي؟ ايه الاسئلة الغبية دي؟ ده كل اصحابي المساجين في النزنزانة خرجوا هي جت عليا
المذيعة: وبتفتكر ترجع تاني ؟
المسجون : بفكر ارجع تاني ؟؟ هو مصيف يا ست ؟؟ ده سجن
المذيعة: طيب تمام وياتري بتقضي وقتك ازاي برة السجن ؟
المسجون : زي ما انتي شايفة حضرتك رشاشات بقي وترويع للناس وحاجات حلوة من دي
المذيعة: ترويع ؟؟ سمعت الكلمة دي فين ؟
المسجون: في التليفزيون حضرتك بيقولوا علينا بنروع الناس في الشارع مع ان صوت الرشاش حضرتك ميروعش حد ايه الجيل الخرع ده ؟
المذيعة : وانت بتسرق المهندسين بس ولا حتت تانية ؟
المسجون: لا ما انا خلصت المعادي حضرتك
المذيعة: ومش خايف للشرطة ترجع تاني وتمسكك ؟
المسجون: شرطة ؟؟ ههههههههه لا ما هي واخدة اجازة بدون مرتب اما الدبابات اللي في الشارع دي حضرتك الناس بتتصور معاها وكده انما مبتخوفنيش يعني حضرتك
المذيعة : يعني انت اخلاقك ما اتغيرتش بعد الثورة ؟ ده بيقولوا انها ثورة اخلاق وكده
المسجون: الثورة الجاية ان شاء الله ابقي اغير اخلاقي المرة دي انا عايز اكل بس
المذيعة : وياتري انت ليك عتاب علي حد ؟
المسجون : طبعا ليا عتاب علي شلوفة والعترة اللي خرجوا م السجن وسرقوا اهل منطقتهم رغم ان دي مش مجدعة ابدا واخلاق المسجون متسمحش بكده ولا اخلاق المجرم
المذيعة: اخلاق المجرم ؟؟؟؟ اشرحلي اكتر
المسجون: يعني ده يرضي ربنا ان واحد يسرف اهل منطقته وناسه ؟
المذيعة: طيب ما انت بتسرق منطقة المهندسين كلها
المسجون: ايوه انا معرفش حد في المهندسين فواجب عليا اسرقهم
المذيعة: اااه ماشاء الله مبدأ برضه واخلاق ممتازة
المسجون: امال ايه ؟ هو احنا مساجين اي كلام ؟
المذيعة: لا العفو ده كفاية شنبك ده ده انت مجرم بدرجة قدير جدا
المسجون: الله يكرمك ياست ..هو البرنامج ده هيتذاع امتي؟
المذيعة: ليه هتشوفه ؟
المسجون: اه ما انا سرقت تليفزيونات كتير قوي وهاشوفه اما ييجي عشان اشوف وشي في الكاميرا علي مؤاخذة بيقولوا وشي "فوتو فينيك" في الكاميرا
المذيعة: فينيك ؟؟؟ لا حضرتك "الفنيك" ده بيتحط في الحمامات تقريبا التانية اسمها "فوتو جينيك"
المسجون: اه عفارم عليكي يا ست سيبيني بقي في اكل عيشي
المذيعة: فرصة سعيدة قوي حضرتك كمل براحتك واستعمل رشاشك..وانت كسبت معانا النهاردة في الحلقة مفاجأة
المسجون : ايه كسبت ايه ؟؟
المذيعة : جراب احمر للرشاش يحفظه من الاتربة مبرووووووووووووك
المسجون: واللهي؟ الحمد للله الحمد للله انا كان نفسي من زمان في جراب ليه فعلا بس مبيبعش في اي محل الحمد لله اني لقيته الف شكر الف شكر..انا بهدي الانجاز ده للسيد مأمور السجن وبقوله تحيا مصر تحيا مصر
المذيعة: دي كانت نهاية حلقاتنا مع دموع المسجون وفرحته بالهدية ونشوفكوا في حلقة جديدة




اعلان مساجينكوا :

هربان ؟؟
هربت غصب عنك وعايز تحس باحساس السجن اللذيذ تاني ؟
دلوقتي بنقدملك قضبان "مساجينكوا"
تقدر تحطها حوالين السرير او ع الشباك عشان تحس انك مسجون من جديد
القضبان صلبة جدا وغير قابلة للكسر احبس نفسك بنفسك
حس باحساس السجن المنعش واللذيذ من تاني بدل عيشة الحرية المقرفة اللي انت خرجت ليها
"قضبان مسجينكوا" بتقدملك تشكيلة الوان القضبان الذكية وباسعار مدهشة
اتصل الان من اي تليفون مش متراقب وهنوصلك لاي غرزة انت فيها
سعر الشحن حسب مكان الغرزة او الخرابة اللي هيقابلك فيها المندوب
مساجينكوا..ع الزنزانة دور