Sunday, February 27, 2011

خط الفرفشة والنعكشة





كل شوية تيجي رسايل عجيبة ع المحمول والكلام ده من زمان ..متعرفش ايه هدف الرسالة اساسا وهل هي رسالة بجد ولا مقلب ..بس بجد صندوق الرسايل اتملي رسايل من النوعية الحمضانة دي بتاعة المسابقات وكمان الجيش دخل في الخط وشوف بقي نوعية الرسايل اللي بتيجي عاملة ازاي :



1- "مسابقة اسمنت المقاوم ..اكسب موبايلات في مسابقة اسمنت المقاوم..مع اسمنت المقاوم عمر المبني هيبقي طويل "
وبعتولي بقي رقم المسابقة وكده..وعايز اسألهم سؤال ..بذمة ابوكوا بقي ده اسم يشجع اني ادخل المسابقة اساسا..المقاوم؟؟..وهاكسب موبايل ايه بقي اسمنتي ؟؟
وبعدين الرسالة اصلا حسستني اني عامل فواعلي بشيل اسمنت ..يا اخي ده الملافظ سعد !




2- "تكاليف فرحك كاملة علينا..ايوه علينا..ارسل كلمة فرح الي الرقم .... واجب علي تلات اسئلة بشكل صحيح وشركة...بتقلك مبروك سلفا "

طيب ازاي يعني تبعتولي الرسالة دي اساسا ؟؟ ده انا بقالي فترة طويلة قوي بكتب "الحرق بالجاز في ليالي الجواز " يبقي ازاي هاتجوز ؟
الرسالة دي من اكتر الرسايل اللي حرقت دمي بجد..ويقولك اجب ع التلات اسئلة وهندفعلك تمن الفرح ..اكيد هيسألوني هل انت خرونج ام كينج كونج؟ وبعض الاسئلة زي دي عشان يعرفوا اني عبيط جديد دخل القفص..انا كلمة "فرح" بتجيبلي العصبي وبتخلي عيني ترف جامد قوي..طبعا الرسالة دي مسحتها فوراااا اول ما وصلت وكنت هارمي الموبايل ع الارض افلقه نصين





3- "حرق قش الارز يضر بصحتك وبصحة اسرتك "

بجد ؟؟ طيب ما توفره تمن الرسايل دي وروحوا عالجوا الموضوع ده ..طيب ما هو بيضر بالصحة امال انتوا سايبن النوضوع وقاعدين تبعتوا رسايل ؟؟ هو ده الحل بتاعكوا ؟؟
ولا انا البس الموبايل كمامة علي مناخيري ولا ايه ؟؟ ايه فايدة الرسالة دي ؟؟ المفروض تكتبوا بتضر بصحتي وصحة اسرتي وصحة اللي جابوني كمان..بس فين الحل يعني ؟
ولا المفروض ارد ع الرسالة واقول " كح كح كح" ؟؟




4- "الي كل ام اب اخ اخت الي كل مواطن شريف حافظوا علي هذه البلد فالوطن باق للابد "

انا صحيت م النوم لقيت الرسالة دي اول حاجة في وشي ..مين اللي باعت ؟؟ القوات المسلحة ؟؟؟ هم جابوا موبايل ؟؟؟؟؟
يعني بيقوموا الواحد مرعوب اساسا ..انا قلت البلد ولعت تقريبا او في حرب دلوقتي في الشوارع كنت عايز اطلع البلكونة لحسن الاقي كشك ام وليد احتلوه ولا حاجة الناس..او في حرب اهلية في شارع البحر مثلا بالمصاصات..اه يا جيشنا العظيم الرعب اللي انت بتبعته ده ؟ طيب ابعت الرسالة العصر مش الصبح كده يعني؟
ده انت مقومني م النوم وانا ركبي بترقص من الخوف يا راجل من صيغة الرسالة اساسا ..دي رسالة حرب مش نصيحة.




5- " تفهم المجلس مطالبكم وتم تكليف الجهات المعنية لتحقيقها في الوقت المناسب"

اهي دي بقي جت في الجون لاني كنت لسه قايل للحاجة انا عايز اتغدي ..فجأة الرسالة جت بعدها بشوية انها هتحقق مطالبي كلها .ايه هتجيبولي دليفري؟؟ وهو انتوا مراقبيني ولا ايه يا عم الحاج ؟ ده انا يدوب قولت عايز الغدا لقيت انكوا هتحققوا المطالب وكمان جهات هتحققها في الوقت المناسب يا سلام رسالة في وقتها




6- " القوات المسلحة لن تسمح باستمرار الممارسات الغير مشروعة لما فيها من خطورة جسيمة علي الوطن وستتخذ الاجراءات القانونية الرادعة "

طب ايه اللي انا عملته ؟؟ ده انا في الحمام ..وهل اللي انا بعمله ده غير مشروع ؟
خلاص يا عم معدتش هاعمل كده تاني المرة الجاية هابقي امسك نفسي بس هدوا نفسكوا يا جدعان فزعتوني من ام الرسايل دي




7- " خط الاصدقاء للدردشة والصداقة..كون صداقات جديدة واتصل علي .... "

والغريب ان مكتوب رقم دولي ..يعني هاتصل دولي عشان اكون صداقة ؟ يا اخي بناقص الموضوع ده ما اكلم ناس من بلدي وخلاص هم يعني قليلين؟؟ ما احنا 85 مليون يعني الله يزيد ويبارك مجتش يعني علي اللي هاكلمه ده هيكون انتيمي مثلا عرفته ع التليفون ؟
وبعدين ما احنا عارفين الخطوط دي هدفها ايه اساسا ولا صداقات ولا حاجة ..دول ليهم اجندات اخري..ولا بلاش كلمة اجندات الناس اتعقدت من الكلمة دي




8- " مبروك ربحت سيارة هامر ..اتصل علي .....لتستلم الجائزة "

هامر؟ ده انت اللي هامر واللهي..يعني هتدوني سيارة هامر ومستخسرين تكلموني وبتبعتوا رسالة ؟؟؟
كفاية فشر بقي وضحك عالناس..وياتري هاستلمها من اقرب كشك ولا هتبعوها قطع وانا اركبها ؟
وايه الشركة المحترمة دي اللي بتقولي كسبت سيارة هامر من غير ما تقول للجرايد وتقول للدنيا كلها عشان تعمل دعاية اكتر لنفسها ؟
يا سلام دي شركة قديسة اوي ..
زي اللي بعتلي بتاع نوكيا وقالي كسبت 600 الف دولار بس ابعتلنا تفاصيل كذا وكذا وكذا كان عايز رقم حساب وحاجات كتير قوي يعني بيقولي هاسرقك م الاخر يعني
يا جماعة المفروض التحايل يبقي اذكي من كده يعني




وبصوا بقي انا هاقفل تليفوني لاني اتخنقت م الرسايل دي سلااااام

2 comments:

mohsen said...

هههههههههههههه
حلوة بتاعة هاسرقك يعنى هاسرقك

معـــــتز هــاني سعد said...

هههههههههههه اه ده كانت شركة نوكيا عايزة تفاصيل حياتي تقريبا عشان تسرقني بدل ما تديلي الدولارات المزعومة