Wednesday, September 26, 2012

يا استاذ لو سمحت..ده قصة ولا مناظر ؟؟؟





رايح السينما ولا حاجة ؟؟ هو اسم سينما اسم شيك قوي الافضل نقول "دار عرض" لان العرض فيها شغال علطول ..بس مش عرض الافلام ..ده عرض لشخصيات غريبة الاطوار قاعدين جنبك وبتلاقيهم في اي سينما ..

تعرف اليوم من اوله اما تلاقي سواق التاكسي بيقول  " انت عارف يا استاذ..اجمل بنات الكون في بنها" !!!
تفتح بقك بعد الجملة دي عشرة متر قدام من هول الصدمة ..الراجل ده بيقول ايييييييييييه ؟؟..بنات كون ايه بس...ده انت الكون بتاعك كله مركزه شبرا بالطريقة دي !
عايز تقنعني ان "مونيكا بيلوتشي" مثلا امها اصلها من بنها !! يا اخي روح موت واشبع موت وغطيها كويس وانت نايم ..


أول ما تخش السينما خالص ولسه بتقول يا هادي..تلاقي الراجل ماسكلك الكشاف ويهريك بقي "كل سنة وانت طيب" ..عايز فلوس عشان هيوريك مكانك بس علي اساس اني خلاص اتعميت مثلا..
وده ممكن تثبته بأكتر من رد وليه حلول كتير وفي حلول ممكن تغلس بيها عليه مثلا :

تقوله "لا شكرا معايا كشاف في الموبايل ما تتعبش نفسك"
او تقوله " كل سنة وانت يطب ليه هو النهاردة بمناسبة ايه مش فاهم ؟ "
أو تديله حباية "هولز" في ايده زي بتاعة الكتاتني..


هو احنا هنلاقيها من السايس بتاع العربية اللي فاكر الشارع ملكه والركنة مش عارف بكام ولا من بتاع السينما كمان ده حتي في الحمامات بقي في واحد من دول عشان بيناولك المنديل !!!
يعني في بلدنا بقت انك تناول المنديل دي كده شغلانة في حد ذاتها !! او الظاهر انه هيكتب علي صدره "خبير استراتيجي مناديل" او "ناشط حمامات" !!

ومتفتكرش ان حسب نوع السينما لو فخمة او تعبانة مش هتلاقي حاجات غريبة الاطوار ابدا..ده انا في سينام فخمة جدا ونزل الفيلم من غير ترجمة تماما والناس مذهولة وبدأت التعليقات "ايه يا عم الفيلم اللي جايبه من ع النت ده ؟"  "روح يا عم نزل الترجمة وتعالي من علي اي منتدي"
وبدات الناس تصفر وفجاة تم عرض الفيلم من الاول ولكن المرة دي بيهنج كل خمس دقايق ..!! وده بيحصل في اكبر سينمات مصر وده العجيب..
وشوية وبعد ما الناس زهقت يخش واحد يقولنا "تعالوا ورايا يا جماعة طابور علي قاعة تانية اصل الماكينة هنا عطلانة معلش"
يعني لو كنت نزلت الفيلم نسخة زبالة حتي وانت في بيتك كانت هتبقي ارحم من انك تقعد تعيد في الفيلم كل شوية لحد ما تحفظ امه .




وفي السينما هتلاقي انواع كتير من الناس جانبك وحواليك في كل الكراسي :


النوع الأول : المستعجل :

ده يقعد جنبك وطول ما هو قاعد تلاقيه بيطرقع صوابعه وساعات بيطرقع رقبته وانا بيضايقني اوي النوع المطرقع للرقبة ده بس ان جانبي "زومبي" !
ويقعد يفشخك أسئلة من نوعية "هو الفيلم هيبدأ امتي ؟ "
"طيب هو مدته قد ايه اصلا معلش"
"هو مش بيجيبوا حاجة قبله يعني اعلانات او كرتون مثلا ؟ "
"ياااه دول اتاخروا قوي دي فوضي"

وده طول ما هو قاعد عمال يفرك مش عارف طيب هو جه ليه اساسا طالما عايز يمشي من اول دقيقة قعدها تبقي عايز تقوله "ما تقوم تروح يا عم الحاج وارحمني ده انت خنقتني من الفيلم من قبل ما يبدأ"
عامل زي علاء مرسي في فيلم ميدو مشاكل اما كان بيقول "الصووووت..الصووووت العالي بيوترني" !




النوع الثاني : ابو ضحكة جنان :


ده تلاقيه بيضحك في كل المشاهد في الفيلم مافييش تمييز بين الدراما والكوميديا واي حاجة هو سيستم الضحك عنده معموله ابديت من فترة قريبة تقريبا..
اي مشهد اي جملة يفقع ضحكة تلاقي السينما كلها بتضحك اساسا عليه مش ع الفيلم ودول بتلاقيهم كتير وياسلام لو لاقيت واحد منهم جنبك ويكون تخين كمان يبقي تقعد طول الفيلم كأن "الفايبريشن" شغال في جنبك..فيل بيضحك ويهز كتافه والكرسي يلعب بيك طول الفيلم ..وكل مشهد كوميدي تتهز انت اتوماتيك من كتافه العريضة ماركة "بخيره"  !

او لو دخل في كريزة ضحك بقي وقعد يخبط في الارض ولا في الكرسي يبقي يومك مش فايت النهاردة ويبقي كل همك ان الفيلم يخلص قبل ما الراجل يجيله حالة هستيرية ويخبك فيك ولا حاجة وانت قاعد !

وكل فترة من الضحك المتواصل تلاقيه قال فجاة "اه ياني يا ابا"  او "اه ياما"  الراجل منفوخ ضحك لدرجة انه مش قادر ياخد نفسه والفيلم درامي ..




النوع الثالث : مستر جالكسي :


ده لو في سينما معفنة بقي من النوع اللي بيدخل فيها البياعين جوة السينما تلاقي كل شوية "حاجة ساقعة بيبس..شيكولاتة بسكويت..حاجة ساقعة بيبس "
تلاقي واحد كل شوية ينادي عليه كأنه مكلش حاجة من سنة يا عيني "خد يا اخينا اديني شيكولاتة"
ودي في الاخر بتيجي علي دماغك برضه لانه هيبدأ يقوم بقي يشتري حاجات ..ونظرا لان السينما معفنة فهي بالدراع مش بالحجز يعين هيقولك كل عشر دقايق "معلش احجزلي المكان علي ما اقوم اجيب بيبسي كانز"
كانز ؟؟ ليه انت هتجيب عشرة بيبسي ولا ايه اسمها "كان" يا عم الحاج..
وبعد شوية "معلش احجزلي المكان علي ما اقوم اجيب فيشار" وارتبط الفيشار بالسينما أزلي مش عارف ليه الفيشار بالذات ..


وتبقي عايز تقول للراجل ده "هوحد  قالك اني مشرف الرحلة بتاعتك بروح امك ..ما اشوفلك الفيلم بالمرة يا ابن ال...."
وتقعد طول الفيلم تسمع بقي صوت قرمشته للبسكوت والاكل اللي جابه وكميات الفيشار اللي وقعت ع الارض تكفي القاعة بحالها اصلا.
ويبقي مشهد درامي مؤثر وجانبك واحد "بيتكرع" في الاخر  بعد الطفح اللي طفحه ..فعلا النوع ده "احبوش" .





النوع الرابع : شئ من الخوف :


ده واحد ساعات تلاقيه ومش كتير بس بيكون موسوس ..يعني كل شوية يقول مثلا "حسيت بحاجة بتجري تحتك ؟"
وفجأة يرفع رجله ويقول "واللهي حاجة جريت بسرعة"
ياعم احنا في سينما معفنة فعلا يعني مش بعيد تكون قطة ولا حاجة تحت الكرسي ..
وواحد تاني تلاقيه كانه وسيط روحاني مع الحشرات ويقول "هش بقي انا قولتلك هش"
"هش بقي يا بنت الكلب"
علي اساس ان الدبانة سمعاه وحاسة بيه فعلا وسامعة الهش دي..
او في فيلم رعب جدا وفي الاستراحة واحد التفت وقال بكل هدوء "انا فعلا لي قريبتي كان لابسها عفريت قبل كده الحاجات دي بتحصل يا جماعة"
يا عم ارحمنا بقي الفيلم مسيب مفاصلنا وانت معندكش دم وجاي تفشخ الناس رعب اكتر ..

وساعات تلاقي شلة بنات وفجاة في مشهد رعب تشتغل الاوركسترا بتاعة الصويت بقي كأننا راكبين الصاروخ بتاع دريم بارك مش في سينما ..
اهدي يا اختي منك ليها متخافيش قوي ده لو العفريت طلعلك اساسا "هيقرا الفاتحة " !!




النوع الخامس :  اف ام :


اه متستغربش..دي مجموعة اسمها "رافعي الاريال" يعني يدخل تلاتة مثلا ولدين وبنت وفجاة واحد يفضل يبص للفيلم ومنتبه جدا والواد التاني في عالم تاني مع مراهقة الثانوية مثلا ..
وانت ايه يا عم الحاج مالكش في الصنف ولا ايه ؟ بدل ما انت رافع الاريال ومشوش علي موبايلتنا كده !
وشوية تسمع جملة زي مثلا "استني الدبوس وقع"  اوووووبة..دبوس وقع كمان هي ليلتنا فل ولا حاجة ؟؟  تبي عايز تخش عليهم باسلوب عادل امام وتقول "انتوا بتعملوااااا اييييييه ؟""

دول بيبقوا مختارين الصف الاخير خالص بس من حظهم النحس اني كتير بختار الصف الاخير رغم اني بكون لوحدي ساعات بس بلاقيه مكان مثالي انما هم شايفينه برضه مكان مثالي ومش متوقعين انهم يلاقوا واحد يقطع عليهم الفيلم بتاعهم ..يعني يبقي قدامك فيلم "قصة" وجانبك "مناظر"  ومتسألش بقي قصة ولا مناظر !!

وكل شوية الاخ المفعصاتي يقعد يبص جنبه وفي كل مكان كأنه بيهرب مخدرات ولو عايز ترخم عليه افضل باصص ناحيته ومش هيقدر يعمل حاجة لانه في وضع صعب "اخوكواااا مزنوووووق"

وده كتير ما بيكون في عروض في اوقات غبية زي فترة الصبح..يعني واحد داخل سينما مع واحدة ع الصبح بدري كده اكيد مش مزنوق في مشهد درامي يعني ولا ايه ؟؟




النوع السادس :   الحريق :

ده مش حريق سجاير..ده حريق للفيلم وده ارخم وافظع الانواع فيهم كلهم..
يقعد وجانبه واحد وكل خمس دقايق يقول الجملة بنت الكلب "عارف هيحصل ايه دلوقتي ؟؟؟"
ويبدأ يرغي ويحرق في ام الفيلم لحد ما تفد متعة الفيلم تماما لانك عارف نهايته بدري ..والغريبة انه شاف الفيلم قبل كده وجاي تاني عشان يحكيه علي رأي اللمبي "ده ايه غتاتة امك دي ؟"

ويقعد ينفخ فينا باسلوبه ويقول "انت فاكر انه كده مات؟؟ لا ده هيقوم تاني بس في اخر مشهد "
ده الفيلم كده هو اللي مات ده انت قعدتك سواد اساسا..هو انا دافع التذكرة عشان الاقي جنبي كابتن محمود بكر وكانه بيقول "واحد يسألني هو البطل مات..اقوله اصبر للمشهد الاخير " !




النوع السابع :  مستر حقوق انسان  :


عارف علي بيه مظهر ؟؟ اهو كده بالظبط ..
يبقي دافع تذكرة معفنة بعشرة جنيه ويشوف بيها اربع افلام في عرض واحد ومش عاجبه ان في واحد بيرمي اللب علي قفاه من فوق !!
امال اربع افلام بعشرة جنيه متوقع ان الصالة مكيفة ؟ ما هي اكيد مقلب زبالة سابقا !

"الاخ اللي بيحدف لب ده يخلي عنده ضمير"
اساسا السينما فيها ناس واقفة في النص كأننا في ميكروباص زي عادة سينمات المصايف القذرة اللي هي صحراء جرداء لا زرع فيها ولا ماء..
ويقعد يقولك "اكيد برة مافيش حد بيتف اللب علي الواحد في السينما احنا عالم تالت"
"انا هاشتكي صاحب القاعة انه سايب الحالة كده"

ياعم صاحب قاعة ايه بس هي دي قاعة دي مقلة لب ..دي الارض كلها لب وسوداني حتي الفيشار غالي عليهم..
وشوية يقول "الجو حر قوي..ايه ده الناس معندهاش دم..؟ انا لازم اكلمهم وانا خارج يراعوا انسانيتنا شوية"

يا عم الامور انسانية مين انت دافع عشرة جنيه في كل الافلام دي واصلا الافلام نصها بيتقطع كمان عشان يخلصوها بسرعة يعني عرض سريع للفيلم وانت فاكره كامل هو في فيلم يعني بيخلص في ساعة الا ربع ؟؟

"الاخ اللي بيرمي لب ..خلي عندك ضمير واحترم نفسك"
وفي النهاية يسمع صوت من ورا مش باين مصدره من الزحمة واحد بيزعق ويقول "ولو مبطلتش رمي لب هتعمل ايه يعني ؟؟"
ساعتها يقتنع ان حقوق الانسان في البتنجان ..





دي شوية عينات من جوة السينما ..الواحد ياما بيشوف واوعي تقع في نوع من دول والا يبقي الفيلم راح عليك خلاص وتقول "سينما اونطة عايزين فلوسنا " .

1 comment:

Anonymous said...

looooooool