Saturday, May 25, 2013

نهضــتكم ...رسالة الي النظام...





كتبتها لمصر الحرية..لمصر اللي هتشوف النور مهما طال عصر الظلم والاوهام الكدابة..لمصر بلدي الللي طول عمري عرفتها معجونة بالخير والسلام والأمل وبكرة اللي متحني بالأحلام..لمصر ما بعد نهضة اليأس والخيبة..لمصر اللي هترجع لحضن المصريين ..مسيرها هترجع لحضن المصريين الأصليين



مرة وقفت سألت خروف..
هو بيحكم بالمعروف ؟
ولا بيحكم زي قديمه..
ويستاهل جزمة وملتوف ؟
بص خروف العيد طوالي..
قالي ده حاكم ايه رباني..
ده خليفة خلفاء راشدين..
يغير حالنا اوام في ثواني..
قالي ده ريس فوق العادة..
سوبر نهضة وحتة زيادة..
وكفاية دقنه في وشه كمان
حاكم كله ايمان وارادة
شوفت بعيني كده القرنين..
طلعوا بسرعة من الجانبين
مكتوب فيهم "سمع وطاعة"
والخرفان ملو الصفين
قولتله هي النهضة حشيش ؟
او احلام عميت شيش بيش
قامت نهضة فقط في جيوبكم
انما نهضة شعب ما فيش
نهضتكم توعد بفلوس
يطلع فيها خيار وفاقوس
تطلع نهضة زيت او سكر
لمواطن غضبان مفروس
نهضتكم كسر القوانين
او تكفيرنا باسم الدين
او تقسيم الشعب المصري
نص يطبل نص حزين
نهضتكم نهضة اسعار
تلعب فيها ليل ونهار
يوم بضرايب يوم بمصايب
يبقي الفول زي الكافيار
نهضتكم نهضة تدليس
ورئيسكم واقع حيص بيص
زي ما قال المثل الشعبي
تبقي النهضة للمتاعيس..
نهضتكم نهضة تمكين
يخطب مرسي تقوله امين
زي ما قالها وزير اعلامكم
ابقي تعالي وانا اقولك فين
نهضتكم مش نهضة شعب
دي جماعة بتعلي الكعب
تنهب حلمي باسم الثورة
زي ما سرقت ثورة شعب
نهضتكم بتعلي السور
سجن وقاطع فيه النور
وبنرجع للعصر الحجري
وبنطبخ علي جاز ووابور !!
نهضتكم نهضة اوهام
نهضة ضعف مع استسلام
نهضة ان الشاطر يحكم
لما السيد مرسي ينام !
نهضة اني اطاطي واطيع
واقبل فيها حكم "بديع"
عامل زي كاميرا خفية
والبلتاجي بيقولك ذيع
نهضة لو عملت تطهير
واللهي كل القصر يطير
اول شئ عايز يتطهر
هي الحاشية والطراطير
نهضة حكم الغاب النابي
ان الشيخ يطلع ارهابي
يطلع يشتم ع القنوات
مرسي يكسكس ليه ويحابي..
نهضتكم عاجزة ومخصية
تسجن ثورة تبيع في قضية
يبقي شباب الثورة سجين
ويقولك عصر الحرية !!
هي النهضة خطف جنود ؟
ولا البيع في اراضي وحدود ؟
هتبيع وطني وعرضي يا مرسي ؟
لأ دي بلدك فيها اسود..
هي النهضة نائب عام
يزرع بمزاجه الالغام
ويسيب ده ويمسك ف التاني
حسب الامر من الحكام
نهضتكم نهضة خوابير
كل خروف وعاملي خبير
بيصرح بكلام مع عكسه
اي كلام من غير تفكير
نهضتكم نهضة اقزام
فاكرة انها مالكة الاسلام
ده الاسلام طول عمره تسامح
مش حاكم نخاس احلام..
متمرد علي كل خروف
متمرد وهاعيش وهاشوف
ان بلادي بترجع تاني
للحرية مش للصوف
متمرد علي عصر ظلام
متمرد وانا كلي ايمان
ان بلادي هتفضل حرة
وهتقتل حكم الاجرام
وانا حلمي هيشوف النور
مهما يطول الحكم البور
الحرية هي رايتنا
مهما رفعت يا مرسي السور
مهما رفعت يا شاطر سور
احنا الشعب واحنا النور..
احنا الشعب واحنا النور

No comments: