لو عايزين نعمل قناة تليفزيونية جديدة لفئة معينة من الشباب وهم اللي بيسموهم الناس "الشباب السيس "
طيب نبدأ منين ونعمل ايه في شعار القناة ونقدملهم ايه فيها ؟
شعار القناة طبعا هيكون صورة جاد شويري لأن ده نموذج للشاب اللي بكلمكم عنه والبرامج اللي هتتقدم هتكون
"اللف صنعة " طرق تعليمية عن طرق حديثة في لف السجاير
"هتصيع فين النهاردة ؟ " اماكن وخروجات مخصصة للشاب السيس
" مطبخ السيس روول " وهي اكلة الشاب السيس
"اغاني سيس " وطبعا هي منوعات من احقر الاغاني زي اغاني سعد الصغير وجاد شويري وعمدة وخلافه
حملات التوعية بقي هتكون مختلفة تماما زي اعلانات احسبها صح وكده بس بطريقة تانية خالص لهذا الشاب :
اعلان "احسبها صح " :
دادي وسولي خرجوا من امبارح ولسه مرجعوش ..
وفي صحراء بعيدة :
دادي: ايه يا سولي بقي ده اخر قرش حشيش معانا وبقالنا اربع ايام برة البيت مش هنرجع بقي ؟
سولي: انا قايل لمامي اني هغيب عشر ايام كده وارجع يعني مستأذن منها
دادي: يا سولي بس الحشيش هيخلص والبنزين كمان ومش هنعرف نرجع كده
سولي: متقلقش انا عامل حسابي وواخد الكريديت كارد بتاع بابي عشان لو احتجنا حاجة من اي ماركت علي بعد 50 كيلو
دادي: والحشيش؟
سولي: انا عامل حسابي ..افتح شنطة العربية
ويتفاجأ دادي من كم الحشيش الموجود في الشنطة
دادي: يا خبر ده احنا كده نتمسك متاجرة مش تعاطي
سولي: ولا هنتمسك ابدا انا معايا كل نمر اصحاب بابي الوسايط الجامدة اللي تخلص اي كمين
دادي: طول عمرك بتحسبها صح يا سولي
وفي نهاية الاعلان صوت تخين "برافو عليك يا سولي ..احسبها صح تعيشها صح "
"البركة بالشباب" حملة توعية :
ناني: بقالي ساعتين ولسه ميدو مدخلش ع الشات
دودي: متقلقيش يا بنتي ادهني انتي المونكير ده علي ميدخل يمكن عنده ظروف منعاه
ناني: بس ده دايما بيشيت معايا في الميعاد ده
دودي: تعالي نروحله شقته نطمن عليه
وتذهب دودي وناني الي شقة ميدو وتجدانه ملقي علي الارض من كتر الكوكايين
ناني: ميدو ميدو..ايه اللي حصل
دودي: متقلقيش يا ناني تلاقيها جرعة زائدة ولا حاجة ياما حصلتلي
ناني: يعني عادي وهيكون بخير؟
دودي: اطمني انتي بس مافيش حاجة
وتقوم دودي بالاسعافات اللازمة حتي يفيق ميدو من الجرعة
وينتهي الاعلان بقبلة بين ميدو وناني
وصوت في الاعلان "البركة بالشباب..السيس "
اعلان "اقتل مراتك تنعم بحياتك " :
سالي: انت فين ؟ وجاي منين وكنت سهران فين امبارح عايزة افهم ؟
رامي: انتي كل يوم تفتحي التحقيق ده انا زهقت
سالي: اقولك تجيب حبيبات القوة الزرقاء امبارح وتيجي تقوم تجيبلي برسيل يا خيخة
رامي: انتي موضحتيش ايه غرض استعماله وبعدين برسيل بحبيبات القوة الزرقاء
سالي: طيب مافيش خروج النهاردة انت فاهم ؟
رامي: فاهم فاهم
وفي اثناء الليل يتسحب رامي ومعه المخدة ليكبس علي انفاس سالي
ويصرخ رامي في جنون : انا حر هههههههههههه انا حر ااااااااااااه انا حر هههههههههههه
ويظهر صوت الاعلان "اقتل مراتك تنعم بحياتك "
حملات التبرع :
رانيا: انا مش مصدقة ان في كده تخيلي في ناس من المنكوبين مش قادرين يطلعوا حفلة بيونسيه عشان مش معاهم فلوس ؟
دينا: يا خبر بجد؟ في ناس فقيرة للدرجة دي ؟
رانيا: ده كمان بيقولوا مش معاهم عربية اصلا
دينا: يا نهار ابيض ده فقر رهيب
رانيا: احنا لازم نتبرع ونطلعهم معانا حفلة بيونسيه ده من اقل حقوق الانسان
دينا : عندك حق يلا نعمل جروب تبرعات ع الفيس بوك لصالح متضرري حفلة بيونسيه
ويطلع صوت الاعلان "كل يوم هنطلع واحد وواحدة حفل بيونسيه وياريت تشارك معانا "
Posts
No comments:
Post a Comment