مكانك يا جـــاك

الانترنت في مصر حاله عجيب جدا انا بيتهيألي ان في عصر الدعوات الغريبة في اليومين دول هتكون بعض الدعوات "ربنا يصلح حال كبلي"

ده غير معظم الدعوات العجيبة الاطوار اللي الناس بتدعيها اليومين دول "يارب نغلب الجزاير خمسة " ودعوات فيها طلبات غريبة خالص غير زمان اماكان الناس بتدعي لنفسهم وغيرهم بالخير وخلاص

دلوقتي اغرب دعوات ممكن تسمعها لو قعدت جنب واحد بيصلي مثلا "يارب ابني يجيب العربية اللانسر اللي نفسه فيها " ..يعني انا مش فاهم ايه الدعوة الغريبة دي

ده بدل ما يقول ربنا يوفقه في شراء عربية وخلاص ..ودعوات عن الفيس بوك والشات
واكيد لو شيطان ولا ملاك سمع دعوة من دول يقولك "ايه يا عم العالم دي ..انتوا بتقولوا اييييييييييييه ! "

واكيد الناس بتدعي بحفظ الاستيتس بتاعتها ع الفيس بوك من كل سوء
ولا تلاقي اصلا في "دعاء دخول النت " !

لكن الانترنت في مصر نفسي مصر كلها تدعيله ربنا ينتعه بالسلامة ولذلك توصلت لبعض التصبيرات الصغيرة اللي ممكن تساعدك علي التعايش مع جو الانترنت البطئ اللي احنا عايشين معاه وده بالاستعانة بالافلام المصرية



واحد: ممكن تقف جنب الراوتر بتاعك وتشد حزام وتقعد تقول "الله اكبر" زي فتحي عبد الوهاب في فيلم كباريه

اتنين: ممكن تبص للراوتر بنظرة عمرو واكد في فيلم اصحاب ولا بيزنس قبل عملية النسف

تلاتة: ممكن تقعد تاكل بليلة وتعيط جنب الراوتر زي حمادة عزو واعتبر الانترنت في مصر هو ماما نونة

اربعة : او تجيب منصة وتقف جنب الراوتر زي احمد زكي وتقول "كلنا فاسدون..نعم سيدي كلنا فاااااسدون" في فيلم ضد الحكومة

خمسة: او تعتبر شركات الانترنت هم عتريس ورجالته وانت من الدهاشنة زي فيلم شئ من الخوف بتاع فؤادة وعتريس

ستة: او تكلم رئيس شركة انترنت وتقوله "انا معايا ورق يبيتك طول عمرك في السجن" زي احمد السقا في تيتو وهو يقول "ورق ايه اللي معاك يا ابن الكلب يا واطي"

سبعة: او ترسم شعار شركة انترنت في الحمام وتقول "ده مكانك الطبيعي يا جاك" زي احمد عيد في ليلة سقوط بغداد

تمانية: او تكون انت رامز جلال في فيلم "حد سامع حاجة" وتكون شركات الانترنت في مصر " محي اسماعيل " ويقولك "ولكن حلمه لمممممممم يكتمل"

تسعة:او تفجر السنترال وتخرج من وسط الانفجار بالبطئ زي افلام الاكشن

واحب في النهاية اهدي شركات النت اغنية للست ام كلثوم بتقول "طول عمري بخاف م النت..وسيرة النت..وهجر النت لكل اصحابه..واسمع حكايات عن الراوترات مليانة اهات "

وربنا يخليكوا لينا وتفضلوا دايما في بطئ وازدهار ..وربنا يجعله عامر