الصحــافة فــين ..!

علي طريقة الافلام الاجنبي التي توحي بنهاية العالم انتشر غاز جديد في الجو ولكنه غاز خارق ومتغلغل اسمه غاز الهرتلة
والهرتلة تعريف جديد للعبط او للهبل

ومن انواع الهرتلة المنتشرة هرتلة البرامج الرياضية
زي واحد يطلعلك يتكلم بجد جدا ويقولك "انا هاشرحلكم دلوقتي طريقة خروج الفريق من المجموعة وممكن تجيبوا ورقة وقلم عشان هنشرحها بالتفصيل "
طيب ما اخد درس احسن عند مدرس رياضة عشان افهم بطولة افريقيا

وهرتلة المحامين في رفع القضية
زي المحامي اللي طول النهار يرفع قواضي علي الناس عشان اي سبب "ايه ده يا سعادة الوزير بتاكلها بالكاتشب ..ده فساااااد ..هارفع عليك قضية ...الشعب يقول ايه ع الاسراف ده! "

وهرتلة البرامج الفنية طبعا
"تامر حسني النهاردة غير ملابسه الداخلية مرتين ..واليسا ممكن تتجوز قريب وممكن تكون اشاعة ..ولون كرافتة عمرو في حفلته الاخيرة يهبل "
طيب مافيش اخبار عن هدوم انعام سالوسة ولا الناس دي مظلومة..متسموها نشرة اخبار المزز وخلاص طالما هم المطربين والمطربات المثيرات بس اللي بنسمع اخبارهم !



وبعد عدة سنوات من انتشار الهرتلة ساد الجو بشكل فظيع هذا الغاز حتي المساء وبدأ برنامج عمرو اديب وهو مهرتل لوحده ولكن المفاجأة كانت فقرة الصحافة :



المذيع : مساء البهججة والسرور عليكم والنهاردة في فقرة الصحافة هنستضيف علاء مرسي مش عارف ليه بصراحة بس طالبة كده

علاء: ايه النظام؟

المذيع: بال وسيكام

علاء: ايه الظروف ؟

المذيع: ورق ملفوف

علاء: صباحه

المذيع : مساءه

علاء: طيب يلا نبدأ

المذيع: امك في العش ولا طارت

علاء: طارت ع العش اللي جنبه

المذيع: احم طيب هتقرالنا ايه النهاردة يا علاء في الصحافة دي

علاء: واللهي انا جايب معايا ميكي وفلاش وكمان عشان لزوم الثقافة يعني جايب معايا احمد خالد توفيق "اسطورة الرجل الذي نف ثم تف "

المذيع: يا سلام كلام جميل جدا نف ثم تف ..يعني مش تف الاول ياعلاء

علاء: لا ماهو ده معني الرواية عشان كده الراجل ده اسطورة في مغزي الرواية

المذيع: قشطة دوبل

علاء: بابا اوبح

المذيع: طيب يلا نناقش مع بعض بقي اللي شد نظرك في الفترة الاخيرة في اللي انت جايبه معاك ده

علاء: طبعا اهم حاجة ان الجدة بطة معادتش بتدي عسل للدب ودي مهزلة

المذيع: يمكن العسل خلصان

علاء: ابدا دي لسه عاملة فطيرة كاملة في الحلقة اللي فاتت

المذيع: وميكي عمل ايه مع بندق ؟

علاء: لا لا لا الأهم فعلا تقصد تقول بطوط عمل ايه مع عم دهب

المذيع: هو بطوط ليه فكره وايدلوجياته الخاصة في معالجة الأمور

علاء: ايدلوجيات؟؟ طب بابا اوبح

المذيع: واوا اح

علاء: يا عم عم دهب ده جلدة ومبيطلعش مليم لبطوط مع انه بيكون نفسه عشان يتجوز زيزي قبل ما يخطفها منه محظوظ

المذيع: يا سلام دي قصة مؤثرة جدا من اهم الاعمال الادبية في الفترة الاخيرة

علاء: طيب ندخل ع المهم بقي

المذيع: هو في اهم من كده ع الساحة ؟

علاء: طبعا ميدو مخاصم كلبه هرقل في فلاش

المذيع: يا خبر ابيض ده خبر حصري منك يا علاء

علاء: اه ده فعلا خبر بننفرد بيه النهاردة

المذيع: طيب ننقل علي اخبار الرياضة

علاء: اه هنتكلم عن نتيجة فريق صفط اللبن مع سكر الحوامدية في مباراتهم المصيرية النهاردة

المذيع: صفط اللبن في مباراة مصيرية معقول؟

علاء: طبعا ده من وجهة نظري اقوي فريق في الفترة الاخيرة وهيقلب موازين الفرق الكبري زي تشيلسي وغيره

المذيع: وجهة نظر برضه..طيب واخبار الفن

علاء: انا عايز اتكلم عن الماستر سين اللي عمله سعد الصغير في فيلمه الاخير وابكي الملايين

المذيع: اه طبعا سعد بقي دلوقتي اهم ممثل دراما ع الساحة

علاء: يعني رأيك زي رأي

المذيع: طبعا معاك وخصوصا اغنية الفيلم الاخير اللي كان عاملها جاد شويري غيرت وجهة الناس في الاغنية العربية

علاء: اكيد اكيد..بوسة نونو بقي

المذيع: بوسة نونو ..امممموه..ونختم الحلقة النهاردة ونروح لفاصل اعلاني ونرجع تاني بااااااااي