Tuesday, August 3, 2010

دليلك الشخصي في الكلمات المفرقة للخطوبات..اوعي تقولها











عايز تاخد خطيبتك مكان رومانسي وحركات..ماشي يا سيدي الله يسهله بس خد بالك من بعض الكلمات اللي ممكن تفركش كل حاجة وده علي حسب العروسة
يعني لو العروسة من وسط عالي قوي يبقي خد بالك من الالفاظ اللي ممكن تقتل الخطوبة وهاقولك علي درجة خطورة كل كلمة في الوسط الهاي :

1- دهون :... الدرجة 8 من عشرة

ولو دخلت مثلا مطعم كبير في المهندسين ومعاك خطيبتك اللي من وسط عالي قوي اللي هو يعني جايبها من "اون ذا رن" مثلا.. (واحد هيقول دلوقتي ايه الشحات ده؟ وايه يعني اون ذا رن ؟؟ )..بس ده مش موضوعنا
المهم مثلا قولتلها "ناوليني الشفشق دهون "..كده قضيت يا عم الحاج خلاص الليلة فركش اكيد
لان كلمة دهون من اقوي كلمات قتل الخطوبات لو الوسط كان عالي قوي وعمرها مسمعت الكلمة دي غير في الافلام الكوميدية وفكرها كلمة تأليس مش كلمة حقيقية
وهي بتفرق عن "كدهون" للتشبيه و "دكهون" للبعيد و "دكهه" للبعيد قوي


2- الدورق :...الدرجة 10 من عشرة

لو في نفس المطعم بقي وكنت بتكلمها وفجأة قولت للجرسون "لو سمحت ناولني الدورق ده" او "ناولني الدورق دهون" تبقي برضه قضيت
لان كلمة الدورق من اخطر الكلمات القاتلة للخطوبة والرومانسية يعني مش معقول قاعدين تتكلموا في الحب الحب والشوق الشوق وفجأة تقول الدورق..
والكلمة دي خطيرة لدرجة ان في احتمال رمي دبلة فوري في وشك


3- شمري يلا : الدرجة 10من عشرة

وده لو هتاكلوا خلاص وهي لابسة حاجة بكم طويل وانت بتقولها يلا شمري وانت نيتك طيبة بس الكلمة صارخة قوي
وكأنك بتقولها "اطفحي " بس بالذوق



4- طه : الدرجة 8 من عشرة

ودي اختصار كلمة طيب يعني تطلب منك حاجة تقولها "طه طه "
ودي برضه من المحتمل فيها خلع دبل خصوصا لو كررتها كتير وكانت لازمة عندك


5- ديك النهار : الدرجة 10 من عشرة

لأن الكلمة دي دايما مكانها الكفور والنجوع فلو اتقالت وسط بشوات قاعدة بتبقي بمثابة شلوت في القعدة او كرسي في الكلوب
وهي فاسخة خطوبات ومفرقة للجماعات


6- دوغري : الدرجة 7 من عشرة

هي كلمة بيئة كيك طبعا ولكن مش بتضر قوي زي الكلمات اللي فاتت لان الشعب المصري اتعود عليها قوي
لان كل حاجة في البلد دي ماشية دغري طبعا زي ما احنا عارفين


7- في الفسحاية : الدرجة 9 من عشرة

طبعا لو واحد في جنينة مع خطيبته وقالها خشي شوية في الفسحاية دي بيكون منظره زي عم مرعي بتاع الكلبة بالظبط
وهي نفس الضرر لو قال "فسحي شوية" يمكن كلمة "اتاخري " افضل كتير مع ان شكلها معفن برضه


8- ايدي اللمبة : الدرجة عشرة من عشرة

ومش عارف مين اللي الف الكلمة بنت الكلب دي سواء كلمة ايدي او كلمة ولعي اللمبة ..ايه الفكر الاجرامي ده "ولعي" ايه بس
ويقولك "ولع التليفزيون" "ولع الراديو" كاننا قاعدين في بنزينة..وهي كلمة من فصيلة البيئة تحت بند الكلمات المفرقة


9- بسمع الفيلم: الدرجة 8 من عشرة

صاحب هذه الكلمة بيكون شخص عنده حول في حياته ما هو طالما بيمسع الفيلم يبقي اكيد هو نفس الشخص اللي بيشوف الاغنية !


10- اقفلي المسوجر : الدرجة عشرة من عشرة

فعندك بدايل كتير كان ممكن تقولها زي الترباس او الاوكرة او اي حاجة ما عادا كلمة المسوجر القذرة والتي لا معني لها
وانا مش عارف هي جت من فعل ايه هل من سجر او جسر وملقيتلهاش اصل في اي مكان


11- شفاتيرك : الدرجة 14 من عشرة

هذه الكلمة فيها سم قاتل
اكرر هذه الكلمة سم قاتل
كلمة شفاتير تقتل كل ما هو رومانسي وجذاب في العالم باسره حتي لو كنتوا قاعدين وسط جزيرة في منظر ساحر


12- عملت معاه الصح : الدرجة 11 من عشرة

اما يكون بيحكيلها عن حاجة وقال يعني هو عمل حاجة جامدة قوي فيقولها وعملت مع الراجل ده الصح وعلمت عليه


13- الله لا يسيئك : الدرجة 9 من عشرة

وهي كلمة ممكن تتقال علي غرزو او قهوة ومش بين اتنين خاطبين بعض


14- رجلي مفأفأة من المشي : الدرجة عشرة من عشرة

انت ممكن تقول تعبت من المشي او اي كلمة بس بلاش الكلمة دي بالذات لانها هتفأفأ منك برضه من الكلام بالاسلوب ده


15- الشرز ده جامد : الدرجة 21 من عشرة

وهي بتتقال في اماكن معينة وطبعا نسبة قليلة اللي بتقولها اما تشاور علي تشيرت او قميص
وتقول الشيرز ده جامد


16- تاكلي من ابو كام : الدرجة 15 من عشرة

اما تفتح المنيو في مطعم وانت تقولها "عايزة من ابو كام"
تبقي فركش الليلة كده لانك اول حاجة بتفكر فيها الفلوس مش ذوقها ورغبتها


17- مفخد شوية: الدرجة 16 من عشرة

لو واحدة سألتك في التليفون انت كنت بتعمل ايه تقولها لا مافيش اصلي كنت مفخد شوية


18 - يستجري؟ : الدرجة 10 من عشرة

كلمة سيئة جدا لما تقول "يستجري حد يعمل كده؟" بدل "يقدر حد يعمل كده ؟ "


19- مهبطة : الدرجة 14 من عشرة

بدل ما تقول "شكلك تعبانة" بتقول "شكلك مهبطة " ودي كلمة هابطة كيك


وياريت نبعد تماما عن الكامات المفرقة للجماعات دي
انا ماشي بقي اصلي مهبط شوية ههههه


8 comments:

دعاء العطار said...

ههههههههههههههههههه

فيه كلمات مفهمتش معناها ع فكره

وفيه كلمات تانيه كنت بقولها دايماً ع سبيل الهزار

زى مثلاً الشيرز

كنت دايما اهزر مع اصحابى واقولهم ايه الشيرز ده

بس بهزاار

ههههههههههههههههههه

معـــــتز هــاني said...

هههههههههه لا الا كلمة الشيرز دي بتعقدني في حياتي

شكرا علي زيارتك للمدونة انا شوفت مدونتك وعجبتني مواضيعها والتصميم كمان رائع

amr awwad said...

هههههههههههههههههههههه
جمده
هو انا مبستخدمش اى حاجة من الكلمات دى بس طالما سرها باتع كده يبقى هستخدمها فى حاله الخلعان
وبجد
البوست دهون معمول معاه الصح

معـــــتز هــاني سعد said...

طبعا يا عم عمرو دي في الحالة الخلعان مضمونة الكلمات دي وبالذات كلمة مهبط شوية دي فعلا سرها باتع هههههههه

سكندري said...

ههههههه
تدوينة غاية في الجمال
أنا ضحكت ضحك يا راجل :)
بس أنا نفسي أعرف يعني ايه شفاتيرك دي
أنا اول مرة اسمعها
ده في كلمات ممكن تعمل حرب بين عائلتين مش فسخ خطوبة بس

معـــــتز هــاني سعد said...

شفاتيرك دي اللي هي شفايفك بس بلغة البيئة طحن فحت يعني
يقولوا مثلا عليها شفاتير البت دي
او عليها جوز شفاتير البت دي

علي رايك اهي كلمة زي دي تعمل حرب ما بين عيلتين فعلا هههههههه

سكندري said...

شفاتير يعني شفايف
يا حلاوة
وده من امتي ده
داانا في نعمة و الله، مش بقول حاجة من الحاجات دي خالص
و مع ذلك أنا مش خاطب أصلاً
ههههههه

سكندري said...
This comment has been removed by the author.