الحـرق بالجــاز في لــيالي الجــواز..الجــزء السـابع عشر

الأفـــــــراح وأيامــــها :


المفروض ممدوح فرج يخش يقول : هيييه انتي وانت بتحبوا تروحوا افراح كتير ؟؟
بتحبوا الزفة والكوشة والحاجات دي كلها؟؟
حلك عندي..ثواني ونرررررجع لبعض تاني

مافيش اتنين يختلفوا ان الفرح شئ ممل..بس في ناس تحب تروح وناس تكره الملل تماما

دلوقتي لازم نوضح سبب ان في ناس كتير قوي بتكره تروح الأفراح وانا منهم ..بس ليه ؟؟؟ :


1- لأن المفروض تهني واحد وتبوسه علي انه داخل مرحلة عذاب والغريب ان الكل بيهنيه وكأنه خد اوسكار وناقص يقول كلمة مع انه داخل للروتين الحياتي الكلي

2- لأن البنات مش حاضرة الفرح عشان تفرح من قلبها ولكن بتكون عبارة عن مانيكان في محل ولابسة اللي ع الحبل عشان تمشي بمبدأ الفيلم "عريس يا اماااااي ..عريس"

3- فقرة البوفيه اشبه بفقرة الساحر في السيرك بييجي قبلها ناس ماسكة نار وكاسات وكأنك في "قريش لاند" وبعدين تبدأ فقرة البوفيه او بتسمية تانية "مجاعة المبسوطين" لأنه كله بيجري ع الأكل بدون سبب واضح رغم انهم ناس مبسوطين مش جايين من مجاعة افريقية ولا حاجة

4- دايما بقي في الافراح تيجي فقرة "اظهار التحضر" زي اي رقصة غربي او استعراض فجأة وكأننا في اخترنا لك بدون داعي ناقص يعملوا شقلباظ او العروسة تعمل شقلباظ افريقي زي بتاع الاحتفال بالجون بعد الماتشات وده بقي في كل الافراح وكانهم بيقولوا "لااا ده احنا جامدين يعني امال ايه" واللي بيرقصوه دلوقتي بيرقصوه قدام عجينة الفلاح

5- لو بصيت في عيون كل بنت او سمعت هي بتفكر في ايه بطريقة فيلم الحاسة السابعة تلاقي عيونها بتترعش كده وبتعمل زي عين محمود المليجي وبتقول "اه يا بنت اللذين عرفتي تعكشي عريس" ولو شوفت عين اي ولد تلاقيها بتقول " اوووبه البسسسسس يا معللللم "

6- بتقلب ساحة الفرح دايما لساحة رقصات متنوعة وكأنك في كارنفال او حلقة من برنامج " ارابز جات تالنت " للاستعراضات الراقصة وتنتظر بقي واحد يخش بعد الرقص يقطع هدومه او يغني راب

7- "صراع الترتر" هو عنوان المسرحية الهزلية دي بين الستات في الفساتين عشان نشوف مين اللي هتفوز باجمل فستان سواء بنت العشرين او بنت السبعين نفس التفكير وللأسف بعض الشباب السيس برضه كل تفكيره ممكن يكون ازاي ابقي اشيك بدلة ومش بعيد يحط بوبيونة ومصاصة في بقه وهو داخل

8- ساعات مبفهمش ابدا دموع حد في ليلة الفرح وكأن بجد حصل انجاز او اي شئ جديد او مختلف ويقولك "اصلي اديت الرسالة" رسالة ايه ؟ انت خلصت من بنتك عشان كانت كاتمة علي نفسك في البيت فبتعيط م الفرحة او لأنها هتوحشك انما لو عشان اتجوزت يبقي اسمحولي دي سذاجة

9- شخصيات الرقاصين علي ساحة الفرح وداخل القاعة اما بتكون "عفروتو" شاب قصير وبيرقص غربي او "بهلول" وده شاب تخيييين وهليهلي وبيرقص بكرشه او "تمورة" وده شاب ناقصه عدة اجزاء في جسمه منها ال... وبيرقص رقص مايع فقط ..

10- تفكير الولاد اللي حوالين العريس منصب في أربع حاجات اما "يا سلام والله فرحتلك يا ابني" او "كان بدري عليك يا عم واللهي " او "اوووف مراتك دي مزة بصحيح" او "ايه البومة اللي دخلتها عشك دي ؟ "

11- لا تختلف ابدا العروسة في ليلة الفرح عن عروسة المولد..من حيث ان كله بيحاول يزينها وكمان بتبقي في وسط المولد وفي الاخر بتتاكل اكل ..!

12- لو كانت الصراحة راحة كان كل عريس هيغني في فقرة اغنية العريس اغنية فيلم مطب صناعي بتاعة محمد محي وهو بيقول "رجعت للصفر من كان ما بدأت " والعروسة هتغني اغنية احمد سعد "حاسس بخنقة وضيقة حاسة ان انا بتهد "

13- صاحبة العروسة الصدوقة يعني المفروض تعمل فقرة كاملة لوحدها علي اساس ان فرحتها دايما في وسطها مش في قلبها

14- الدي جي دايما في الافراح يسأل "فين اصحاااب العريس" و "فيييين اصحاب العروسة " الناس بيفتكروا ان عشان يرقصوا ...لا لا لا ده قصده عشان يعقلوهم ويرجعوهم لصوابهم قبل ما يتسرعوا ..

15- ليلة "الفنكوش" هي دايما ليلة الدخلة ..كل اصحاب العريس بيتفننوا في هدايا اللذة زي مثلا برطمان عسل او سيجارة حشيش لحد ما الراجل طبعا يفهيص وطبعا بيخرج يقول "سبع" او "وحش" وكانه كان في "عالم الحيوان"..طب العروسة تخرج تقول ايه "نعامة" ؟؟

16- "الدربندوخ الدربندوخ كنا شباااب وبقينا شيوخ" هو موقف العريس تماما اول ما يقوم اول يوم جواز بعد الدخلة وبعد ما فهم الحياة هتمشي ازاي

17- دايما في الافراح هتلاقي واحد واقف ورا اللي بيرقصوا بيطرقع صوابعه كده اللي هو زي ما يكون عايز يخش الحمام الحركة اللي الناس بتعملها بصوابعها اما تكون مزنوقة ومحدش عارف ده ماله ده

18- في اي فرح هتلاقي شلة لوحدها ورا كده في ترابيزات تحس انهم جايين محششين وده بيثير استياء الاهالي اللي بتكون حظها وحش وقاعدة جنبهم ساعات الشلة اللي هي بترقص لوحدها والبوفيه شغال اصلا من اثر الحشيش

19- حتي في الافراح هتلاقي مخلصاتي من كتير ما اتعودنا علي التخليص في المرور او في المصالح الحكومية في كمان مخلصاتي الفرح اللي يجيبلك طرابيزة ويظبطهالك وينزلك الاكل اول واحد ع الترابيزة قال يعني جاي كازينو بروح امه مش فرح

20- في ناس في الافراح وهي بترقص بتشوفهم بياكلوا كرافتات بعض ومش عارف ده نوع جديد من الادمان تقريبا زي اللي بيشموا اللحاف مثلا ولا ايه ؟ تلاقيهم بيرقصوا وكرافتة كل واحد في بق التاني وساعات الجاكت كمان

21- رغم ان النميمة دايما سرية الا ان الافراح هي القاعة الوحيدة اللي فيها النميمة علنية يعني معسكر قرايب العريس بيتكلم عن قرايب العروسة ومعسكر قرايب العروسة بيتكلم عن قرايب العريس رغم ان الفارق بينهم ساحة رقص بس

22- اروش حاجة في الافراح الناس اللي بيكون عندها ظروف شغل او حاجة وملحقش يلبس بدلة قبل ما ييجي فبيكون محرج قوي مش عارف من ايه بيفضل واقف برة كانه زبال مثلا مع انه لابس شيك جدا والغريب ان الناس تستغرب مين اللي جه من غير بدلة ده كأنهم راحين اجتماع وزاري وحياة امهم

23- ساعات اختيارات الدي جي بتكون اعفن من الفرح نفسه زي اللي بيرقصوا علي اغاني حزينة وده في افراح كتير بيحصل وتلاقيهم بيرقصوا وكلمات كئيبة شغالة في الاغنية

24- لو ركزت قوي في الفرح وتفاصيله او الجواز عموما هتلاقي ان واحد مستعجل قوي عشان يصرف ويكع فلوس اللي هو العريس..وواحدة مستعجلة قوي انها تطبخ وتغسل وتكوي ويطلع عين ابوها الللي هي العروسة مقابل اتفاقية مشتركة.."النفط مقابل الغذاء" ..!

25- الزفة بالعربيات هي مرحلة الوداع الاخيرة وتذكير العريس بايام الحرية وزمامير العربيات حواليه دي بتكون اخر اجراس الحرية في حياته بعد كده هتزمر مراته بزمارة رقبته طول الحياة

26- الافراح صعب اوي بنت تتخلف عنها لكن الولد احتمال كبير ميروحش عادي لان البنات بتشوفها اخر فرصة للجواز يعني قاعة الفرح هي مكتب جواز صغير وبعدين يقولك اصلنا متجوزناش صالونات مع ان الصالون كان قاعة الفرح..وبيتنكروا من جواز الصالونات كانه عيبة مع انه عادي

27- دايما المأذون بيكون مرحلة قبل قاعة الفرح لان شكله بيعكنن علي المتجوزين الحاضرين الفرح فمش معقول يخش وسط القاعة لان المأذون بالنسبة للمتجوزين هو "حانوتي السعادة" والحرية

28- كل واحدة بتعكش جوزها قوي يوم الفرح عشان تبين لصاحباتها قد ايه هم حياتهم سعيدة وجميلة بكل هبل واستعراض رغم انه باين جدا انهم مخنوقين من بعض اساسا بس لزوم الشياكة والاصطناع في ام الليلة المصطنعة علي بعضها او سميها الحفلة التنكرية

29- من وسط كل ستة اشخاص بسالهم يطلع اربعة او خمسة فعلا مبيحبوش يروحوا الافراح ودي بقت ظاهرة غريبة قوي لكن اظن ان اللي بيخنقهم هو كل الاسباب اللي فوق دي والمفروض فعلا في اي فرح ينزل من السقف الراجل بتاع ميلودي يتحدي الملل ويكسر القاعة علي دماغ المعازيم

30- اخر كلمة : انا في حياتي كلها عمري ما هاحضر افراح من زمان وانا كده وعايزافضل كده يمكن بتيجي افراح طارئة في النص لازم تتراح بس الطبيعي اني مبروحش ومش انا لوحدي في ملايين كده..ياتري هتساعدني ؟ اتبرع ومتعزمنيش وحياة ابوك وانا هاهنيك وهافرحلك بس بالتليفون يا حبيبي بالتليفون



واحد يقولي ماهو كده اللي مش هتروح فرحهم مش هييجوا فرحك..اقوله كلمة واحدة بس ..
فرحي ؟؟؟؟؟؟؟؟؟؟ انت اتجننت ؟؟