فرصة سعـيدة قـوي يا حضـرت

واحد معرفوش..اول مرة اكلمه..التعارف في مصر غريب شوية وليه طابع شرقي جميل لكن احيانا بيكون مبالغ فيه وبتحابيش وبهارات مصرية

دايما تلاحظ ان اللي ميعرفكش يقولك "يا بشمهندس" ودي قاعدة مصرية ان الاصل في الانسان الهندسة الي ان يثبت العكس !
ولو بنوتة لذيذة كده ممكن تقولك اول مرة "هاي ازي اخبارك؟" ومش عارف الصراحة ازاي باظت يعني الجملة لغاية ما بقت مالهاش معني ويعني ايه "ازي اخبارك " ؟؟؟هي كانت بتتقال زمان "اخبارك ايه" او "ازيك عامل ايه؟" ولكن الظاهر دي جملة ميكس اتعملت جديد عندنا صناعة مصرية.

في بقي كمية ناس مبالغة في التعارف غير طبيعية زي بتوع "يا عمنا" "يا شيخنا" "يا سيدنا" وكأني مثلا لابس عمة وقفطان قدامهم ..

واحد مرة رايح انزله ويندوز ع الجهاز قالي "ازيك يا كبير" ايه يا عم شايفني جاي من الجبل علي اساس اني م المطاريد مثلا ؟؟ كبير ايه بس ؟

وساعات سواقين التكسي يقولك "يرضيك كده يا حضرت؟ " وكلمة حضرت دي بتخنقني قوي لانها بتفكرني ب "اكسلنس" والمفروض اني في زمن التمانينات بقي وارد عليه واقوله "اه موضوع بديع قوي..مدهش" وكاني يحي شاهين في افلام زمان


والشاب الكول بقي اللي اول مرة تكلمه اساسا يقولك "قشطة يا بوب" معرفش ايه كلمة بوب دي برضه مع ان البوب ده تقريبا بتاع الفاتيكان لو بينطقها بنطقهم مثلا بس اكيد مش مشتقة من كده !

والراجل الواقع بقي اللي ممكن يتعرف علي واحدة ومن ساعة ما يعرفها طول النهار يفضل يقولها "اتفضلي يا ست الكل"..."شرفتي يا ست الكل " .."تحت امرك يا ست الكل" وكأنه سايس جراج وهي نازلة م العربية !

وواحد تاني ممكن يتعرف عليك وفجأة يبص في الارض مكسوف ..ايه يا عم هو انا شاكيرا قدامك ؟ ولا انا بعض يعني؟ ولا وشي ميتبصش فيه ولا ايه بالظبط يا جدعان ..بتبص تحت ليه يا عم ؟
وفي الشاب اللي يحسسك انك مشهور قوي ويقول "اه انا سمعت عنه" وكانك بتيجي في مجلة كابتن ماجد او انك صنف جديد نازل في الاسواق مثلا ..سمعت عني ايه يا عم ؟ شايفني تمورة ولا الهضبة قدامك ؟

والراجل الكبير اللي يديك نظرة امل في بكرة ويبصلك بصة امل كده ويقولك "تشرفنا يا استاذ" وكانه شايف فيك امل مصر الخمسين سنة القادمة وهو بيبتسملك الابتسامة دي وناقص يقول ححححح وكانه واكل نعناع علي راي بوحة !


واحد تاني بتاع تعارف الكلمة الواحدة زي مثلا يقولك اول ما يتعرف بيك "عمي" او "باااااشا" وكانه برضه شايفني بطربوش او اني اكبر منه كتير


اما ابن المبالغة التاني اللي اول ميعرفك يقول كلمتين "حبيب قلبي" وهو لسه عارفني من ساعة بس واضح اني عشان حاطط اكس تحت باطي ولا حاجة وده تاثير الاكس زي الاعلان

يمكن اكون اثرت عليه وفجأة بقيت حبيب قلبه..مع ان الاعلان ده ان الاكس كان بيجيب حريم مش رجالة بس واضح ان النوع ده مغشوش !

ولو واحد سياسي يقولك في اول تعارف "تمام تمام" كانه بياكد علي قرار خده مش واحد بيتعرف بيه..
وممكن واحد تاني متشيك كده ومدي الدنيا حقها يقول "جميل جميل" وكانه بيتحرش بيك اصلا مش بيتعرف بيك

وفي ابن المبالغة الكبير بقي بتاع "اجدع ناس" لو اربعة واقفين يقولهم كلهم "اجدع ناس" وهو ميعرفش مين اجدع ناس اصلا او هو اكيد معتبر نفسه برضه من اجدع ناس دول
ده الناس كلها جدعان يا جدعان امال مين الهفأ في البلد دي ؟؟



وواحد ممكن اول ما يتعرف بيك يضحك ويهز راسه وكاني اتشقلبت قدامه بس هي دي طريقة تعارفه علي الناس اصلا .

وممكن عم المشغول بقي قدام ماتش ولا حاجة لو لسه صاحبك بيعرفك بيه يقولك "طيب اقعدوا اقعدوا دلوقتي" ويرمي الفول السوداني في بقه ويبص ع الماتش وبعديني بقي يكملالتعارف بعد الماتش
وكان معرفتك جت في وقت ضايع او مجرد استراحة ...حاجة مش مهمة يعني م الاخر.

وواحد تاني يسلم علي ايدك كده وكانه بيحسس عليك او بيشوف في جلدك اذا كنت بشري ولا لأ زيهم..وواحد تاني بدل ما يلمس من بعيد كده وكانه قرفان لا يقعد يفعص فيك وكانه بيتعرف ع الناس من جسمهم مش من وشهم ..
ايه نظام التفعيص ده؟؟ امال بتتعرف ع البنات ازاي يا اخ انت ؟؟

وفي الناس الغير مهتمة اصلا لو تلاتة بيلعبوا كوتشينة وجه واحد جديد يقول "انا..." يقوله فجأة "طيب اقعد اقعد..هتلعب بمين" يعني هو عايز بس دراعات تلعب وخلاص مش واحدجديد يعرفه.

وفي بتوع "انا كان نفسي اتعرف عليك من زمان" وهو ولا يسمع عنك اصلا في حياته بس اهي تثبيتة حلوة منه

وفي بتوع المحققين الدوليين اما تقوله "انا." يقولك "ياراجل قريب محمود؟؟..ابن خال سعيد؟؟ وكنت مع سامح في الجامعة ؟؟؟"" يا عم ارحم امي اه انا كل دول في ايه انت عايزنيولا عايزهم ؟؟ اروح اجيبلك امهم وامشي انا ؟؟

وطبعا اكثر الانواع انتشارا هم جماعة "فرصة سعيدة" قبل مايعرف هي سعيدة ولا لأ بس اهو ذوق منهم يعني



يعني عندنا انواع تعارف كتير قوي في مصر لكن معظمها مبالغ فيها