مــربي يا معــلمي مــربي..هم النم يا روحي..الجزء الثـاني

فعلا كل مصطلحات الشعب المصري تحسسك ان كل همه علي بطنه ودايما تفكيره في الوجبة الجاية ودي شوية مصطلحات تانية بتدل علي كده :


الطفل من صغره دايما نكلمه عن الغذا السليم وان اهم حاجة في الدنيا هي الاكل والأم لازم تعرف ان اهم حاجة الرضاعة الطبيعية وكل اهتمامات الام المثالية تكون عن طريق توعيتها بالاكل الصحي لولادها
وتغني الام لطفلها من صغره "نام نام وانا اجيبلك جوزين حمام" وكأن دي اكبر مفاجأة للطفل هي وجبة برضه مش مثلا لعبة او مرجيحة او كده لأ جوزين حمام لانه طفل انابيب كل همه علي بطنه
وفي اغنية تانية تقولك "وزمان قالوا الخضار ..بيخلينا كبار..واحنا بناكل هم النم" ..طيب يا ستي زمان قالوا الخضار بيخلينا كبار تلاقيهم بتوع سوق العبور بالذات اللي قالوا كده وهم اللي كتبوا الاغنية دي اصلا عشان يبيعوا علي قفا الطفل والام.
وكمان اغنية "مرة سألت الاستاذ ارنب ليه ما انتاش لابس نضارة ردلي رد لطيف ومهذب باكل من غير ما اعمل غارة" برضه اكل الطفل لازم ياكل لازم يشرب وكل الاغاني منصبة علي كده في الطفولة
واغنية تانية بتقولك "مبيشربش اللبن الصبح وكل اصحابه ضحكوا عليه" يا عم كفاية فجعنة بقي طيب ما هم ممكن يضحكوا عليه لو بغل من كتر الاكل برضه يا عم محمد فوزي ولا ايه ؟
وحتي الاغاني التانية للاطفال هتلاقيها بتتكلم عن غسيل الاسنان زي اغاني صفاء ابو السعود مثلا ..يعني برضه مراحل ما بعد الاكل اغسل سنانك وكده


وفي اشهر الردود المصرية هتلاقي برضه مصطلحات الاكل والفجع زي مثلا "يا اخي علي الطاسة" برضه ليها ارتباط بالاكل ومصطلح "انت بتخبط في الحلل" او الكلمة الشهيرة جدا "مش واكل معايا"

وفي الامثلة حدث ولا حرج زي مثلا "اقلب القدرة علي فمها" او "تعمل م الفسيخ شربات" او الكلمة الشعبية "انت شايل طاجن ستك "
وواحد يقولك "مش مبلوعة الحكاية دي" او "مش نازلي من زور الراجل ده "


وفي الخناقات حتي برضه اكل وشرب في الكلام زي "اكلك بسناني دول" او "اشرب من دمك" وفي التزوير كمان يقولك "انتوا سويتوا الحكاية مع بعض"
او واحد عملت فيه مقلب يقولك "شربتها يا مغفل"


وكلمة "كملت الطبخة" اما حاجة تكون حبكتها جامدة قوي وملعوبة يعني ..وممكن يقول كمان لفظ زي "كده العملية استوت ع الاخر" كل الكلام هتلاقي فيه اكل وشرب لحد ما تشبع من كلامك لدرجة ان في ناس كتير تقولك حتي "انا جعان نوم" يعني حتي وهو داخل ينام مش راحم برضه بيفكر في كلمة جوع واكل وغيره

وحتي في السياسة يقولك "العصا والجزرة" "التفاحة المحرمة" "المطبخ السياسي" يعني برضه السياسة دخلت في مصطاحات الاكل والشرب بتاعتنا وكان العرب همهم الاول وتفكيرهم وهم بيتكلموا الاكل والشرب اللي باهت اواي فوق كلامنا ومصطلحاتنا

وفي الكلمة المعروفة برضه "الدنيا زي الخيارة" او ا"العروسة زي البطيخة وانت وحظك يا تطلع قرعة يا تطلع تمام"

وحتي الاغاني كمان اللي بنسمعها زي كاظم الساهر اللي بيقول "تعالي اعد لكي الشاي فانتي خرافية الحسن هذا الصباح" ومحمد منير برضه اتكلم عن الشاي ومطرب عمل اغنية اسمها "واحد شاي"
وحتي الواحد بييجي من الغربة بيقول لامه في التمثيليات "نفسي اكل تاني من ايدك يا ست الكل" يا عم ده انت طفس طفاسة قول نفسي اكل ولخص مترسمش دور انها وحشاك بقي.

والست اللي بتعرف تطبخ يبقي "نفسها حلو" يعني عشان طبخها حلو قولنا نفسها حلو
وطبعا سعد غني للعنب وناس غنت للبلح وشعبان غني للطماطم ولسه هنغني للمحشي وغيره بعدين
والبنت تعمل شعرها "كحكة" والولد يعمل شعره "كابوريا" .

ولسه كل يوم هنشوف كلام واغاني هتتعمل للاكلات مع مرور الوقت ..وانا ماشي بقي رايح اكل اصلا لاني جعت بعد الموضوع ده