حـلو يا حـلو..رمضــان الديــجيتال جه

رمضان اختلف كتير جدا عن زمان يعني بقي رمضان الديجيتال بعد انتشار الانترنت وبقت علاماته مختلفة شوية عن زمان زي :


* هييجي رمضان وتصبح مشكلة الاسرة المصرية الشعاع السحري اللي بيخرج من السمنة في الاعلانات وهل هي فلاحي ولا لأ وبكام

* هييجي رمضان وهيزيد اعداد المشتركين في جروبات محبي عمر بن الخطاب ومحبي سيدنا علي وجروبات غريبة من النوع ده وكأنهم اصحاب مثلا يقولك شوفت جروب عمر وااااو

* هييجي رمضان وتستمر الاعلانات الغريبة زي اعلان تبرع بجاموسة عشر او اعلان لبنيتا اللي بيظهر فيه بقر كارتون مما يجعل الطفل يسأل ابوه :بابا هو انا لو شربت لبن كتير هبقي بقرة ؟؟

*هييجي رمضان وتزيد درامية الامهات من الدراما التيفزيونية اللي هم مبيسيبوهاش اصلا طول السنة ويتم حسد الممثلين علي القصور اللي بيظهروا فيها والتحدث والتاثر بالمسلسل كأنه بيحصل فعلا ودلوقتي

*هييجي رمضان وترجع اعلانات التبرع والبطانيات والصعيد اللي تحس انه منكوب مثلا طول السنة يقولك تبرع ببطانية لابن الصعيد طيب والباقي يعني؟ وتيجي اعلانات كفالة اليتيم اللي بتمزق قلوب الامهات اللي معندهمش ولاد بدل ما تشجعهم بسبب موسيقته المرعبة

*هييجي رمضان وتزيد كلمة "حصري" اللي حتي الان اتحدي ان في حد فهم معناها من مديرين القنوات اصلا لان حصري معناها انها عندهم بس ومع ذلك تقلب تلاقيها في كل القنوات وهم كمان بيقولوا حصري

*هييجي رمضان ويزيد التنافس بين الازازة اللي بتغسل 6000 طبق والتانية اللي بتغسل اطباق مصر كلها وكأن المتلقي دغف

*هييجي رمضان وترقصلنا غادة عبد الرازق وعلا غانم قبل التراويح وترقصلنا مريم فارس بعد التراويح وقشطة ع الشهر الفضيل

*هييجي رمضان وترجع برامج "افضحني شكرا" بتاعة "انت اخدت رشوة" "انت متهم بالتحريض علي الجنس" واللذي منه زي برامج وفاء الكيلاني وطوني خليفة وغيره

*هييجي رمضان ويستمر الرسم البياني للكرش المصري في الارتفاع خصوصا ان الفطار متأخر قوي والناس هتاكل من الساعة 7 لحد الفجر متواصل

*هييجي رمضان ويعيش المدخنين من الصبح حيحان علي سيجارة او فنجان قهوة وكانه مدمن كوكايين

*هييجي رمضان ويتم تركيب المزيد من الدشات والوصلات بدل ما زمان كان بيتم تركيب الفوانيس

*هييجي رمضان ونسمع الادعية الدينية من المطربين ومش بعيد فيفي عبده او نادية الجندي بالمرة تدعي بالنيابة عنا في الراديو

*هييجي رمضان وتكون المسلسلات هي فواصل الاعلانات وليس العكس

*هييجي رمضان ويقل الاقبال علي النت مقابل التليفزيون بنسبة عالية جدا

*هييجي رمضان والفانوس المصري اللي هنبعته هتكون بس علي الفيس بوك لان الفوانيس التانية صيني في السوق

*هييجي رمضان وتحس ان السعب المصري كله مليونير من فوائض الاكل بعد الفطار

*هييجي رمضان ويتم الوقوع علي الكنب بعد الفطار وكأن الناس ضحايا حرب المائدة ويمد ايده المرتعشة ويرمي العصير علي معدته حتي وهو مش قادر يقوم

*هييجي رمضان ويرجع الناس بتوع البلح ع الطريق اللي بيوقفوا العربيات بالعافية مع ان الناس عايزة تجري تلحق الفطار في بيتها



وكل سنة وانتوا طيبين جميعا