ملحوظات رمــضانية جـدا

في رمضان السنة دي شهر العبادة والمسلسلات شوية ملحوظات او ملاحيظ كده عايزين نجولها عاد..ايوه كاتبها بالصعيدي من كتير مسلسلات الصعايدة ودوشتها :


أولا: في رمضان السنة دي اختلف الجو كتير قوي عن السنين اللي فاتت يعني المسلسلات عدت المية واقصي حتمال لانسان مطبق لا ينام في حياته انه يشوف 24 مسلسل في 24 ساعة يبقي مين يقدر ع المعادلة دي ؟


ثانيا: في ملاحظة مهمة قوي دلوقتي تقدر تقول حاجات مكونتش تقدر تقولها يعني مين كان يقدر يقول لابوه علني قدام الناس "حمرا يا بابا" الا بسبب برنامج ابراهيم عيسي"حمرا" فدلوقتي لو باباك او اخوك سالوك ايه اللي شغال دلوقتي في التليفزيون تقدر تقول بثقة "حمرا يا بابا " هههههههههه


ثالثا : بالنسبة لاعلانات رمضان فاظن اسوأ اعلان هو اعلان فوزية بتاع سيراميكا كليوباترا يليه اعلانات فودافون المستهلكة واسوأ دعاية لمنتج هن شئ يدعي جبنة بريتو
تقريبا هو صابع جبنة والغريب انه يقولك سعره يهلك من الضحك مع انه ب 3 جنيه خمس وسبعين قرش يعني حتة صابع جبنة بحوالي 4 جنيه هو فعلا سعر يهلك م الضحك هم مضحكوش علينا ..ده نصب علني بس. ويمكن احسن اعلان بتاع اتصالات وبتاع ايس كريم كيت كات بتاع سيد معوض.

رابعا: كترت قوي برامج الشيفات في كل القنوات وكتر الفتي في الطبخ من كنافة وقطايف بالمانجة لحاجات تانية كتير وكان المعدة دي مبتسألش ولا بتشوف ايه اللي بيحصل بالظبط كله تخاريف يا عم الحاج واحد في برنامج طبخ بيقوله طيب ينفع كنافة بالتفاح؟ قاله ماشي قاله طب بالخوخ قاله ماشي...يعني م الاخر هات شوية حاجات وركب طبختك بنفسك وتعلم الطبخ بدون معلم ولا كتاب ولا برامج واطلع الفلك تأليفتين في عالم الطبخ والهري الجديد..المطبخ الجديد كله هري بجد


خامسا: لاحظت ان الصعيد اللي طول النهار بيقولوا مش واخد حقه واخد حقه قوي في المسلسلات ..كل ما تعدي قدام التليفزيون تسمع "يا كبير" "يا كبير" او "ايه الحديث

الماسخ ده " والكلام ده لحد ما قربوا يعوجوا لساننا اساسا ..كل سنة خمسة ستة مسلسلات صعايدة ..وكان شخصية الصعيدي دي اسطورية او تراث..مع ان بعض الصعايدة حاليا ممكن يقعدوا قدام المسلسل يقولوا "هو مين اللي لسه بيتكلم كده ؟ "..صح الحديث دي عاد ولا ايه ؟؟


سادسا : برامج "غطيني وصوتي يا امة" من نوعية "بدون رقابة" لوفاء الكيلاني او برنامج "بلسان معارضيك" بتاع طوني خليفة كتيرت قوي وهاصت منهم خلاص وكلها اسئلة من نظام
"انتي اللي وضعتي السرنجة في الرنجة صح؟ "
تقول الضيفة "لا طبعا مين قال كده؟"
يعني انتي بتثيري البلابل والقلاقل ؟
تقولها "لأ طبعا القلاقل لأ.. هي هي هي "
تقولها "بوستي الواوا كام مرة ؟ "
تقول الضيفة "انا عمري ما بوست الواوا"

ونظام اسئلة اي كلام فاضي معقول وفي اخر الحلقة شوية شتيمة في خصم في نفس الوسط طبعا لزوم التحابيش..!

وكانت الرائدة في المجال ده هي مني الحسيني في حوار صريح جدا ومن ساعتها والناس عجبتها قوي جو الفضايح زي بالظبط اما الناس بتتل علي خناقة في الشارع
كله ساعة ما البرنامج ده بييجي كله يقول "هششششششش عايزين نسمع" ..يلد غاوية فضايح صحيح !



سابعا : اعتبر اسوأ برنامج في رمضان هو برنامج اسمه "ضحكني شكرا" كان ممكن يسموه "بكيني شكرا " او "اب... شكرا" نظرا للشاب اللي بيقوم بالبرنامج هو المشكلة مش افكار البرنامج لان البرنامج كويس بس الشاب مأساة..كان افضل لو جورج عزمي كان هيبقي برنامج جامد جدا..


ثامنا : اسهل فكرة برنامج هي برنامج رامز حول العالم والفكرة تتلخص في شاب اديتله قناة الحياة بتاع 2 مليون جنيه وقالتله يلا يا رموزة اطلع امريكا اتفسح وغيظ امنا
في 30 حلقة بلفك لامريكا كلها بالكامل وورينا فسحك ولفك بالفلوس واقعد في افخم فنادق واركب احسن عربيات..اظن دي فكرة سهلة قوي لاي حد طالما الشنطة دي موجودة


تاسعا : اظن اي مستشفي فيها شمس وغادة عبد الرازق ممرضات ستجد عليها اقبال مهول زي اللي في مسلسل زهرة وازواجها الخمسة
وكمان المسلسل بيشجع البنات ان اي حد يا بنتي تلاقيه زي الحاج وفي سنه عليكي بيه فورا بلا فرق سن بلا خرافات وبصراحة الست اتنقلت مية وتمانين درجة وحياتها اتغيرت تماما بسبب الحاج ومعظم البنات بعد ما تشوف مناظر زي دي هتستني فتي احلام في السبعينات زي الحاج كده !

عاشرا : مركز اعادة تاهيل الرجال لبريل هو ثالث مركز تليفزيوني يشتغل بعد معسكر الزبدةا لفلاحي ومركز خبراء بامبرز...وياريت السادة الوزراء بتوعنا يروحوا مركز بتاع بريل ده عشان يقولوا تصريحات جادة ورجولية بدل تصريحات "اديني عقلك " ..!

حادي عشر : للاسف الشديد مسلسل احمد مكي فيه الكثير من الاستهلاك والتكرار علي عكس ما كان متوقع بينما نجح جدا مسلسل خفيفة الدم هند صبري في مسلسلها الرائع "عايزة اتجوز" واللي زي ما مسلسل غادة عبد الرازق بيدي ثقة للبنات ان العريس جاي ولو في سن الحاج برضه مسلسل هند صبري بيدي ثقة للولاد ان العروسة ملقحة وموجودة حتي لو وصلت للخمسين وما فوق هتلاقي متقلقش


ثاني عشر : لاحظت قلة اعلانات السمنة قدام اعلانات شركات المحمول والسيراميك.الظاهر الناس معدش همها علي بطنها قد ما همها علي منظرها وشحنها للتيليفون علي راي فودافون ساعة الشحن متتعوضش

ثالث عشر : لقاء عبد الباسط حمودة مع سميرة احمد في مشاهد مسلسل ماما في القسم هو مشهد تاريخي ولقاء حضارات فعلا..كانه لقاء بين ماجدة الرومي وشعبولا
او غادة رجب وبعرور..كنت مذهول وانا شايف عبد الباسط بيكلم سميرة احمد ولكن الغريب ان حد ممكن يسأل هو مين اللي جنب عبد الباسط دي ؟


رابع عشر : بقت تصريحات البرامج عنيفة شوية اليومين دول يعني وفاء الكيلاني تقولك في المقدمة "هنخرم طبلة ودنك" وواحدة تانية علي قناة مودرن "تقولك هنكشف المستور وهنوريك اللي عمرك مشوفته " فيه ايه يا جدعاااااان حد هيقلع ولا ايه ع الشاشة ؟؟ ده نايل سات برضه ...!



ونشوفكم بعد الفاصل بقي..