بص يا سـيـدي تجـيبها كـده تجـيبها كـده هـي كده

"المقاوح" او "المغالط" هو شخص بيحاول يفرض رايه الغلط علي الناس وخلاص ..اللي هو ماشي بنظام "هي كده بس اتاكد بس" ..ودي منتشرة قوي في كل الشوارع وفي الحكومة كمان وفي كل حتة هتلاقي الشخص المقاوح اللي عايز يقنعك بالعافية بحاجة مستحيل الاقتناع بيها :


تيجي تدخل محل ملابس مثلا تلاقي الراجل اياه اللي بيقف جنبك زي اللزقة بتاع "عجبك حاجة يا افندم؟" المهم تيجي تقيس قميص مثلا تقوله "بس ده واسع شوية" يقولك بكل مقاوحة "لا ازاي يا افندم ده متفصل عليك" تقوله "بس انا حاسس انه واسع من هنا" يقولك "لا لا يا افندم ده مظبوط قوي ده معمول عشانك " !

واحد يقول لصاحبه "ياعم انا عايز اطلقها انا مش سعيد معاها" يقوله "لا لا استهدي بالله بس وهي هتمشي ان سعيد بس مش حاسس" يقوله "يا عم انا اللي حاسس " يقوله "لاانت مش واخد بالك بس شوية كده والغمة هتزول" !

تروح للفكهاني تقوله "الجوافة دي وحشة قوي" يقولك "لا يا باشا ازاي دي زي العسل" تقوله "ازاي بس انت مش شايف ان لونها تقريبا اسود كلها؟" يقولك " لا يا باشا ده عشان تبقي طعمة وعشان هي طازة "..

اما تيجي تشتغل واحد وتقوله مثلا "شوفت بيقولك ابو تريكة رايح ريال مدريد" يقولك " اه فعلا" وبعدين توضحله انك بتشتغله وهو يفضل مصر ان ده حصل فعلا تقوله "ياعم محصلش ده انا اللي مألفها" يفضل رافض ويقول "لا يا عم انا سمعت كده فعلا" !

اكتر انواع المقاوحة بقي بيكون مع سواقين التاكسي تيجي توقف سواق تاكسي وبعد ما تركب وعايز تنزل تقوله "ايوه هنا يا اسطي" ويفضل ماشي قدام فترة وبعدين يركن تقوله "بس انت كده نزلتني بعيد يا اسطي" يقولك "معلش عشان البلاعات يا ابني..وبعدين ده قريب اهو" طيب هو انت تعرف انا نازل فين اصلا ولا رايح فين بروح امك عشان تقولي قريب ولا بعيد ؟؟ اما حاجة تفور الدم صحيح..

وواحد يعزمك علي فرح تقوله "لا مبحبش الافراح" يقولك "لا لا الافراح حلوة" تقوله "ماشي حلوة بس انا مبحبش الافراح" يقولك "تعالي بس هيبقي مختلف "
هيبقي مختلف ازاي يعني العروسة هي اللي هتلبس البدلة مثلا ؟؟ ولا العريس هيلبس طرحة ؟؟

وفي الحكومة المصرية اكبر انواع المغالطة طبعا تقوله "فين يا عم التحسن اللي فيه البلد" يقولك" يا سيدي انتوا مش فاهمين معدلات النمو زادت قوي" طيب فين الاثر يقولك ماهو مافيش اثر بس المعدلات كلها مرتفعة عندنا ...اكلني وشربني معدلات يا ابن العبيطة

ولو قولت لسواق ميكروباص "ازاي يا اسطي اربعة يقعدوا ع الكنبة دي؟؟" يقولك "ما هو في كل حتة يا استاذ بيعملوا كده" ..كل حتة ازاي يعني ؟؟ في اوروبا والدول المتقدمة يعني ولا فين كل حتة دي ؟؟ده مافيش الا في الميكروباص ده ! ولو قولتله "ده مافيش رحمة " يقلبها عليك انت انك شرير ويقول "فين زمان اما كانت الناس بتساع بعضها "
يعني يطلعك انت الشرير وانك مش سايع البشر هههه انت اللي مش حابب الناس انما هم كلهم حابين يقعدوا اربعة مثلا !

ولو جيت في مطعم تقول للجرسون "الاكل كان وحش قوي النهاردة" يقولك "ازاي يا افندم ده الطباخ عصام احسن واحد عندنا اللي عامله " !
طيب وانا مالي عصام ولا ام عصام يا سيدي الاكل وحش هو الزبون علي حق ولا بقي علي باطل في كل حاجة والجرسون هو اللي كل كلامه صدق دلوقتي ولا ايه نظام ابوكوا ؟

وحتي بتوع النت وشركات تقديم الخدمة تكلمه تقوله "النت وحش قوي عندي" يقول "لا يا افندم كل حاجة قدامي تمام" !
طيب ما هو لازم كل حاجة قدامك تمام ده انت قاعد في سرعة رهيبة وتلاقيك قاعد تنزل افلام اساسا ده انت قاعد فيقلب شركة النت نفسها في احلي سرعة وعايش حياتك انا قدامي مش تمام انا اللي حاسس يا اخي يقولك "راجع خط حضرتك وشوف التوصيلات" كأن الانترنت بتاعهم عمره ما بيغلط معصوم من البطئ !

وعسكري المرور يقولك فجأة وو بيخبط ع العربية من ورا "ممنوع يا باشا" تقوله "مافيش يا سيدي يافطة ممنوع" يقول" ماهو انا واقف عشان كده انا اليافطة" !
هو اليافطة؟؟ ده فهم المشهد غلط هو يمكن قصده يقول "من النهاردة مافيش يافطة اناااااا اليافطة" بس دي اهانة يعني ان هو حتة يافطة في الشارع !

وتيجي ترجع عروسة لعبة لمحل العاب يقولك "معقول ؟ حد يرجع العروسة دي؟" تقوله "معلش معجبتش الاطفال" يقولك "ياااه غريبة قوي دي اجمل عروسة دي اشيك عروسة دي احلي قطعة في المحل انا عمري ما شوفت حد رجعها دي قطعة جميلة جدا وانا لسه هاطلب منها كتير دي .. "
ويقعد تكلم ساعة عن العروسة ويقاوح كانك المفروض تقوله "احجزلك اوضة في فندق مع العروسة دي ولا ايه ؟؟؟ " !!!

واغبي نوع هو بقي بتاع "ولا حاجة " اللي هو مشهور قوي في مصر وفي كل مكان وده بيعمل ازاي بقي ؟ :

تقول "الدنيا برد قوي النهاردة" يقولك "لا ولا برد ولا حاجة "
تقول "الشارع ده مكسر قوي والعربية اتبهدلت " يقولك "لا لا مكسر ولا حاجة"
تقول "زحمة قوي الشارع" يقولك "لا لا لازحمة ولا حاجة"


وده النوع القنوع قوي اللي الحكومة بتحبه اللي هو بيقاوح لمصلحتها يعني هو شايف ان لا زحمة ولا حاجة ولا مكسر ولا حاجة يعني هو لا مسروق ولا حاجة والحكومة مش وحشة ولا حاجة والبلد مش بتتسرق ولا حاجة وده اجمل نوع من بتوع المقاوحة اللي تعزه قوي الحكومة .

قاوحني .شكرا