في احد زنازين سجن طرة :
أحمد عز بيغني : "انا مش كااافر بس الجووع كافر ..انااااا..
العادلي: ايه القرف اللي انت بتقوله ده..متقوم ترجع علينا احسن
احمد عز: امال يعني هاغني عودوني في السجن ؟
العادلي: متفتحلنا حاجة في الجهاز اللي انت فاتحه ده
احمد عز: ما هو مش لاقط وايرليس مش عارف اخش ع النت هم بس سمحولي بالجهاز
العادلي: اه المرة الجاية بروح امك هنجيبلك خدمات النت كلها في طرة موصلينه بكابل من سجن القناطر عشان قعدت تلعب لعبة المزرعة ع الفيس بوك لحد ما دخلت المزرعة بنفسك
احمد عز : اللابتوب بتاعي ده ياما عملت بيه عمايل ومشيت بيه البلد علي عجين متلخبطوش
العادلي: اديك اتفرمطت يا حلو وروقوك في الاخر
واثناء مشاهدة التليفزيون :
جمال : هات القناة الاولي يا عم انت
مسجون: حل عن دماغ اهلي انا عايز سبيس تون
جمال: فيه مسجون يشوف سبيس تون ؟؟ بتشوف كوكب ايه بقي ؟؟ كوكب السفاحين ؟
مسجون: بتقول ايه ياااد ؟
جمال: لا ولا حاجة يا اخ
مسجون تاني: هاتله يا عم الاولي اما نشوف اخر اخبار المجرمين ايه
واثناء الاخبار :
المذيعة : وقد حضر رئيس مجلس الشعب المنحل احمد فتحي سرور لتحقيق معه الان و...
جمال: ياااه بيقولوا عليه "منحل" كده علني ؟؟ ده مش اام يثبتوا عليه الجرايم الاول ؟ ايه قلة الذوق دي ؟
العادلي : ده مجلس الشعب هو اللي انحل يا جمال مش بيتكلم عن فتحي فوق بقي الله يخربيت اهلك ضيعتنا
جرانة : يا عم سيبه عايش في ملكوته منه لله اللي كان السبب
علاء: انت متتكلمش خالص يا حرامي انت
جرانة : حراامي ؟؟ ده انا جنبك قديس يا عم الحاج
وفجأة تفتح ابواب السجن ويدخل سرور :
يصيح كل المساجين : موااااااافقة يا عمو سرور ههههههههه
سرور : بتقلسوا عليا يا ولاد المهفوفة ماشي انا هاوريكوا
هشام طلعت مصطفي : منكوا لله شبهتوني ما كنت لوحدي والسجن نضيف دلوقتي كله وساخة انا قتلت فنانة انما انتوا قتلتوا شعب كامل
العادلي : فككوا من سرور بقي هيقعد يقرفنا كلام في القانون دلوقتي ويهرتل
سرور : وياما قلت ان "طرة سيد قراره " محدش صدقني
احمد عز : لا حول الله يارب ده الراجل لسع ع الاخر
سرور : انا هاقسمكوا عمال وفلاحين يا كلاب
مسجون : ما تتكتم بقي ياااد بدل ما اغزك
سرور : احم..تحت امرك يا افندم..ناخد راي الاعضاء
المغربي : فالح بس عم مبارك يعمل خطابات عيد العمال والفلاحين لحد ما ورانا ان محلاها عيشة الفلاح وجابنا "مزرعة" في الاخر
العادلي: وانا كنت بحب فيلم الطريق الي ايلات دلوقتي اشوف ايه بقي ؟؟ الطريق الي طرة ؟؟
مسجون : وانت امك فين ياد يا جمال ؟؟ راحت القناطر؟؟ انا ممكن اوصي عليها لان المودام بتاعتي هناك عدك اللامؤاخذة
جمال : اخرس يا كلب متجيبش سيرة ماماي علي لسانك
مسجون : مامي ؟؟ طيب يا حبيبي هاجيبلك البسكلتة اهو عشان تروح لمامي
مسجون تاني : ياعم سيبك منه الله يخربيتهم خرجوا المساجين اصحابنا هربوهم وجابولنا الاشكال دي
العادلي : مالها ياد الاشكال دي مش عاجبينك يا معفن ؟؟
مسجون : وليه الغلط بقي متخلنيش اعمل فيك زي عماد الكبير
العادلي: انا وزير داخلية يا كلب
مسجون : داخلية ؟؟ شوووبش يا داخلية ما انت بقيت وزير شئون طرة دلوقتي هههههههههه
علاء: ياجماعة انا نفسي اشوف ماتش واللهي هو الدوري مبدأش ؟
احمد عز: يا اخي قرفتنا انت واخوك ماتشات وزفت والشعب اداكم علي قفاكم في الاخر قال يعني كنتوا فاكرين ان الماتاشت هتعمل تعاطف وكده جتكوا نيلة
العادلي : لا وعاملين اعلان احسبها صح وهم اول ناس حسبوها غلط وضيعونا معاهم
مسجون : الا ماقلتليش يا جمال هي الاغنية بتقول عشان كده احنا اخترناه..اخترناه ليه بقي ؟ ههههههههه
جمال : محدش يتكلم علي والدي
جرانة : لا وكاتب علي البدلة اسمه ههههه ما كان يعمل تاتو احسن
مسجون : وانت يا عز ما تقوم تهز..انا سمعت انك طبال جامد
العادلي : اهي طبلت عليه يا اخويا
المساجين : ههههههههه حلوة يالا يا عادلي يااد
عادلي :اخرررس يا كلب انا وزير داخلية
فتحي سرور : يرفع الامر للتشاور
جمال : ما تشوفوا حل يا جدعان للراجل اتجنن خالص وفاكر نفسه في المجلس
مسجون : كل يا عم جمال انت صاحب مكان
جمال: انا مكلش الاكل المقرف ده
العادلي: هنجيبلك كافيار من برة اهو يا جيمي
المساجين : هههههههههه حلوة ياااد يا عادلي ياااد يقطعك
العادلي: اخرررس انا وزير داخلية
سرور : تبقي موافقة
المغربي : متخرس بقي يا سرور بدل منرميك برة واللهي
مسجون: انما ما قولتليش يا جيمي هو والدك قال فعلا ان منتخب مصر كويس ؟
جمال : لا احنا اللي الفنا الجملة بس انما هو مقالش حاجةعن المنتخب اصلا هو بيحب الاسكواش بس
العادلي : عشان كده دايما نكسب بطولات الاسكواش بالامر المباشر ..اسكواش بقرار جمهوري
المساجين : ههههههههههه حلوة يالا يا عااااااادلي الله يحظك ياااد
العادلي: انا وزير داخلية يا كلاااااب
المساجين : داخلية ؟؟ داخلية اتجوزت ههههههههههه
علاء : حلوووووة ياد يا سوابق الله يحظك
العادلي: انما انت قاعد في ركن ليه يا عم هشام ما تيجي في قعدة الانس دي
هشام طلعت مصطفي : لا يا عم اخاف اتشبه
العادلي: تتشبه ؟؟ انما انت قتلت المزة ليه ؟
هشام طلعت مصطفي : انا مقتلتش حد يا عم انت انتوا ملفقين لي التهمة دي
العادلي: كل واحد يقولي ملفقين لي التهمة اكن البلد كلها ناس شريفة واي حد عمل حاجة قبل الثورة يقولك العادلي..حتي زلزال التسعينات هيقولك اصله تخطيط العادلي وهو صغير
المساجين : هههههههههههه جامدة يا عادلي
العادلي: جره ايه ياد انت وهو هو انا جاي اسليكوا ولا ايه ؟؟ انا وزير الدخلية يا ولاد الكلب
المساجين : والله احنا متشرفين بيكوا يا جدعان وعايزين نغني نشيد المساجين بعد ما بقت قعدة فخفخينا كده ونقول "ارفع رااااسك فووووق انت مسجججووووون "
"ارفع راااسك فووووووق انت مسسجوووووون"
وفجأة يدخل "زكريا عزمي" :
زكريا عزمي : هاي يا جماعة
المساجين : ميييين سي عزمي ؟؟ لامؤاخذة يا ابني اصل انا عندي شعرة ساعة ترووح هااااه وساعة تيجي..قووول
زكريا عزمي : احم..ساعة تروووح وساعة تيجي
جمال: عمو زكريا مجبتش معاك اي حاجة ونت جاي؟؟جاتو مثلا او كرواسون ؟
زكريا عزمي : لا واللهي مقالوليش ان هنا صالة لكبار الزوار يا جيمي
المساجين : ههههههههههه
احمد عز : مساء الفل يا عم عزمي تعالي اقعد جنبي ده الحزب الوطني في مصلحتك يا معلم
عزمي: ابعد عني يا بوز الاخص انت قوم طبل وسمعني
مساجين: قالوا في البرنامج انك عندك 600 ساعة الماظ يا حاج عزمي بجد الكلام ده ؟
عزمي: طبعا يا ابني انا زكريا عزمي
مساجين : لا وبيقول ايه يعني اما يكون عنده كام فيلا وقصر كانه مشروع اسكان شباب مثلا ..دي قصور يا عااااالم يا ظلمة
عزمي: قريتوا فيها ادينا اتفشخنا اهو
علاء: اتفشخنا ؟؟ ده لفظ يا عمو زكريا ؟؟
مسجون : وسعادتك تقرب لزكية زكريا ؟؟
عزمي: اه انا والدها يا حيوان
العادلي: هههههههههه..انت مرتبط زكية قربت
مسجون : جامد ياد يا عادلي واللهي..بس في سؤال يا زكريا والنبي موصيني اسالك عليه اما اشوفك
عزمي : قول يا معفن ما هي لمت
مسجون: يعني ايه مليار لا مؤاخذة ؟؟
عزمي : مليار يعني فلوس يا حمار
مسجون: ايوه اصلهم كل واحد يمسكوه يقولك معاه كذا مليار يعني كام دول ؟؟ يشتروا ايه يعني ؟؟
العادلي : يشتروا امك وابوك وضميرك كمان
عزمي : عارف المليون طيب ؟؟
مسجون: اه اسمع عنه
عزمي : اهو المليار ده الف مليون
مسجون : ازاي يعني الف مليون ؟؟
احمد عز: يعني ايه ازاي بقولك الف مليون
مسجون: ايوه دول يتعمل بيهم ايه يعني ؟؟هو ينفع اصلا ؟؟
فتحي سرور : سيبوكوا منه ده معاررررضة
العادلي: والنبي يا سرور خليك في كوزك مش طالباك بقي فكك مني
مسجون : وانتوا كلكوا معاكوا الميار ده ؟؟
احمد عز : اه وكذا مليار كمان بس الناس عايزين يخدوهم مننا
مساجين : يا ولاااااااااد الحراااااااااامية خد بوووم طخخخخ طرااااااخ
وينهال المساجين ضربا علي حرامية البلد بكل عنف
وفجأة يصيح سرور وعزمي وعز والعادلي وجرانة وكل النظام للمساجين : "سلمية..سلمية...سلمية"
"نظام مساجين ايد واااحدة..نظاااام مساجين ايد واااحدة"
وتنتهي صفحة سوداء من تاريخ مصر وتاريخ النظام الافسد في العالم تقريبا الي مذلة ما بعدها مذلة.
مسجون : عمرلي الشيشة يااد يا عادلي ياااد
العادلي : خداااامك ايييوه جااااي
Posts
1 comment:
thank you
اخبار السيارات
Post a Comment