Sunday, April 3, 2011

موقعة الإستاد والراجل ابو جلابية





تعددت الأقاويل في موضوع الزمالك وموضوع الراجل ابو جلابية اللي هو اهم واحد دلوقتي علي الساحة طبعا "حسب احصائيات مجتمع الفيس بوك" ! من الذي اطلق النار علي الكرة المصرية !!
مسلسل جديد في الساحة المصرية حاليا وكرسي في الكلوب مع ان الكلوب معادش مستحمل لانها بقت شبه ضلمة خلاص ولكن كل جبهة كان ليها رأيها الخاص وتلاقيه غالبا معاكس تماما لرأي الجبهة الأخري :



الرأي الأول : فلول النظام :

طبعا سمعنا الكلمة دي كتير جدا قد ما سمعنا كلمة "تكنوقراط" في الفترة الاخيرة ..كل حاجة بيعملها فلول النظام والمعلم حسني ملك ملوك شرم الشيخ قاعد ومأنتخ وعامل جروب ع الفيس بوك اكيد اسمه "انتوا الفلول وانا مش مسئول" وباشارة منه للفلول بتجري وتنفذ مخططات "الكبير قوي" حسنيكو شطة وليمون وتعمل اللي هو عايزه حتي لو قال احرقوا البلد هيقولوا امين يا حسني.
ده راي الجبهة الاولي وهم مش قليلين ده عدد كبير جدا وهو سيناريو مرجح




الرأي الثاني: فينك يا حسني كنت مربيهم :

الجبهة دي بقي هتسمعك احلي كلام يا معلم وهتقولك ده شعب ابن لذين اساسا عايز العصايا والكرباج وحسني اللي كان مربيهم ومعلمهم الادب لكن دلوقتي الكلاب خرجت من القمقم وحاجات زي الجمل دي كده بيقولها الفلول لبعضهم علي صفحة الفلول علي الفيس بوك..او يمكن يعملوا موقع خاص اسمه "فلول دوت كوم" وكارنيه صغير مكتوب عليه "عضو مؤسسة الفلول العالمية لصاحبها حسني ".
ودول مبيصدقوا بلوة تحصل عشان يقولوا فينك يا عمو حسني كنت مهنينا ومشخلعنا ومهننا يا حبيب قلبي دلوقتي البلد بتتقسم ومن غيرك احنا ولا حاجة وناقصنا كام مليون حاجة علي راي الاغنية.




الرأي الثالث : احنا مش جاهزين للحرية والديموقراطية اساسا :

ده رأي ناس كتير جدا في المجتمع المصري "عدم الجاهزية" للنقلة الحضارية اللي احنا المفروض ننتقلها دي حاليا بعد الثورة..وده راي ليه احترامه بس لازم اليوم ده هييجي ولا يعني هنفضل مش جاهزين علطول ؟؟ ما هو لازم نجهز بقي والتأقلم بياخد وقت علي ما نظبط نفسنا ذاتيا زي المجتمعات الاوروبية مثلا اللي بتقف في الاشارة الحمرا من غير عسكري ولا نيلة ولكن اخلاقياتهم كده وتاقلموا علي كده مش مرة واحدة ولكن علي مدار سنين وحان الوقت اننا نبدأ بقي.




الرأي الرابع : دول جماهير النادي اصلا احنا كده :

ده نوع من جلد الذات جملة "ايوه احنا كده" دي حقيقتنا والكلام اللي بالشكل ده برضه منتشر جدا اللي شايفين ان المجتمع مليان عصابات وبلطجية ودي كانت نتيجة طبيعية للثورة وهتاخد وقتها ولكن هتتطول شوية لان المجتمع ده علي ما يتغير يبقي علي ما تشوف احفادك بقي




الرأي الخامس : دي اخلاق الثورة يا معلم :

دول برضه كتير جدا اللي بيقولوا كده وعايزين يلبسوا الموضوع ده للثورة وكان المفروض الاوقع انهم يقولوا "ادي الاخلاق اللي اتكشفت في غياب الامن" يعني مش الثورة بالذات اللي عملت كده ولكن الغياب الامني وغياب القانون هو السبب في ظهور جميع السلبيات اللي كانت مستخبية في كل شارع بسبب الفقر والحرمان في عهد مبارك.




الرأي السادس : الجيش :

الجيش هو السبب بعطلته وتلكيعه ده البلد هتروح في داهية متحاسب بقي المسئولين يا اخي وخلص ام الحوار ده بدل ما طول النهار مظاهرات وغياب امني وزفت عايزين نبدأ علي نضافة بقي ونخلص من الموال ده كله ونشوف مصر الجديدة اللي عمالين تتكلموا عنها دي وشكلها في الاحلام متخلصونا بقي يا عم الجيش




الرأي السابع : ايه يا بتوع التحرير ؟ :

دول ضد بتوع التحرير اساسا وشايفين انهم ديكتاتوريات متحركة وبتاكل راي الشعب المصري في كام الف واحد واقفين لا يعبروا عن كل طوائف الشعب المصري وكتير بيقولوا دول مش بيمثلونا اصلا ده مش راي تماما والشعب يريد اخلاء الميدان من اجل استقرار مصر والهدوء والرأي ده منتشر برضه




الرأي الثامن : ولسه يا ما هنشوف :

دول المتشائمين واللي دايما شايفين ان القدام أسوأ وما يعلم بيه الا ربنا ولسه الحروب بين الطرق الدينية بقي والحركات والمذاهب وميت الف حاجة والحروب بين الاحزاب جاية وهتبقي علي نار ومش هنشوف خير في الايام الجاية وهتبقي كل البلد صراعات دايرة من نار .




دي معظم اراء الشارع بعد موقعة الاستاد وياتري انت في اي جبهة من دول ؟؟



No comments: