Wednesday, July 6, 2011

عز..عز..علمني البجاحة يا حبيبي






واحد ممكن يسأل واحد صاحبه ويقوله علمني البجاحة ..!
خصوصا لو كان صاحبه ده احمد عز مثلا..
البجاحة وسيلة ام غاية ؟؟
البجاحة صنعة زي التقل صنعة ؟؟
هل النظام السابق هو اكبر مصدر للبجاحة في العالم تقريبا ؟؟
المهم يرد صاحبه ويقول..:

البجاحة يا ابني يعني :

1- انك تحط يافطة ايام الانتخابات وتقول ان جملة"مبارك شعب مصر" هي عشان اسم مبارك

2- انك تقول "خليهم يتسلوا" والعالم شايطة منك اساسا

3- انك تطلع في حوار تليفزيوني وتقول "اااه عبارات م اللي بتغرق دي؟"

4- انك تقف زي العبيط تقول بعد الانتخابات "دي انزه انتخابات حصلت في تاريخ مصر" و"كوتة المرأة هي اقوي معارضة" زي ممتاز القط

5- انك تقف في مؤتمر الحزب الوطني والشعب مستني اي حاجة تعملها وتقوله "يا راجل كبر مخك"

6- انك تقول وانت رئيس مجلس شعب عن التزوير انه مسموش تزوير ولكن "دقدقة وتفتيح مخ"

7- انك تزور صورة معروفة قدام العالم كله وتنشرها في الجرايد

8- انك تكون من الحزب الوطني وتقول لو ثبت ان الجزب الوطني ليه علاقة بموقعة الجمل انا هاستقيل فورا زي ابو العنين

9- انك تقول ايه يعني 10 قصور وكام فيلا زي زكريا عزمي ف التحقيق

10- انك تفكر ازاي هنحتفل السنة دي بعيد ميلاد مبارك وتجهزله تورتة

11- انك تكون في السجن في طرة وتفكر في مصير حسن شحاتة زي علاء وجمال

12- انك تقف وتقول انك ضحيت من عمرك من اجل هذا الوطن وانت مموت شعبك كله امراض

13- انك تدافع عن حسني والعادلي وتقول انك معاك دليل برائتهم

14- انك تقول ان مبارك اول واحد ايد الثورة

15- انك تقول "فين ايامك يا مبارك"

16- انك تكون رئيس اتحاد الكورة وتقول انا كنت هانزل التحرير ب كنت مش في حالة صحية جيدة

17 - انك ترشح نفسك لرئاسة الجمهورية وانت كنت بتبوس ايد صفوت ابو الفاسدين

18- انك تفكر انك تعمل حزب لمبارك عشان السلام اللي حققه لمصر

19- انك ترشح نفسك للرئاسة وانت كنت نخلي راس العرب في الارض وملهومش كلمة وانت وزير خارجية او امين جامعة الدول

20- ان سوزان تقول ازاي العساكر والامن مش بيقفوا ليا وانا معدية قدامهم وبيشربوا شاي

21- انك تكتب مقالات زي اللي كتبها الاخبار والاهرام بعد الثورة بكام يوم وكأنك كنت مش جريدة النظام وبوقه الفاسد

22- انك تقول انك مش عندك اي ثروة في الخارج وانت معاك ملايين وملايين

23- ان القذافي يقول مبارك لا يملك تمن ملابسه حتي وهو نفسه حرامي كبير

24- انك تقف كل سنة وتقول معدل النمو في مصر بيزيد وتدلل علي كده بعدد اللي بيشربوا مياه غازية في مصر وعدد العربيات الفارهة

25- انك تبقي وزير وتقول لا املك حتي تكييف في مكتبي في تصريح لجريدة

26- انك تنشر في جريدة حكومية خبر يقول انك رئيس جمهورية بس بتدفع ضرايب علي البلح اللي جايلك من برة

27- انك تهلل لحسني مبارك عشرين تلاتين سنة وبعدين تقول دي ثورة عظيمة

28- انك تقول احوال الفلاح المصري في تحسن والمحاصيل بتتروي من المجاري

29- انك ترفع قضية عشان اعادة مبارك للحكم بعد الثورة وتقول اصله لم يتنحي رسمي

30- انك تشرب شاي مع واحد بتقول انه عامل بسيط وهو شغال عندك اصلا وتحط الصور في الجرايد في الصفحة الاولي

31- انك تمشي ببدلة مكتوب عليها اسمك في كل مكان وفي ناس مبتعرفش تكتب اسمها حتي في بلدك

32- انك تقول المرتبات بتزيد في مصر وفي ناس بتاخد 99 جنيه في الشهر



عرفت يعني ايه البجاحة ؟؟ سهلة قوي وكان حسني وسوزان عندهم منها ازايز جاهزة او حبوب البجاحة وبياكلوها كل يوم .


1 comment:

Anonymous said...

فعلا ابجح رئيس ونظام في العالم كله وبيفتخروا ببجاحتهم كمان
موضوع جميل جدا