الكـدب الأبيـض ينفـع في اليـوم الإسـود

الكذب الابيض عندنا شئ ممكن تقوله ومسموح تقوله لأنه مش هيضر حد ومش هيأدي لمشكلة
وحاجات كتير بنشوفها كذب ابيض سواء في شركات او افراد او اقتراحات حتي ميتردش عليها غير "انت اكيد بتكدب ! "
تقتح مثلا قائمة طعام المطعم اللي جنب بيتكم وانت اصلا مثلا في مدينة صغيرة او قرية
يقولك صنف "ساندويتش كوبا كابانا بالأعشاب الفرنسية "
طيب بالذمة ده كذب لونه ايه ؟؟ ده حتي مش ابيض ده اسود
يعني انا قاعد في البلد اللي بتتلخلخ تحتي دي زي ضرس وتقولي اعشاب فرنسية ؟؟
يا عم ده انت لو حطيت جرجير تبقي بتهيص علينا ..عايز تحرجه بجد اقرالك كام نوع كده من الاعشاب الفرنسية ع الانترنت
وخش قوله ده اي نوع بقي ورصله الانواع هتلاقيه اعترف فورا...ههههههههه

النوع التاني للشخص اللي بيهيص علينا مرة شوفته عند حلاق كان في انتخابات للنادي الحقير اللي عندنا وهو قريب واحد من المرشحين
قعد يقول انا عندي شوية اقتراحات هاقولها لقريبي لتطوير النادي اسمع بقي الاقتراحات دي يا عم الحاج وقال للحلاق :
اولا احنا نعمل بوابة الكترونية بكرنيها ممغنطة او ممكن ببصمة الصباع اي واللهي ببصمة الصباع
وممكن نحط حمامين سباحة بمساحة كبيرة وقسم خاص للحريمي
واضواء كاشفة بالليزر "مش عارف ازاي" للملاعب وصالة مغطاة علي احدث مستوي في مساحة جديدة
المهم الراجل ده غاظني اوي وانا خارج قولتله " ونحط يافطة كبيرة نقول فيها "الأرسنال او مانشيستر يونايتد "
الراجل اتضايق وافتكر اني بألس عليه هههههه طيب ما انا لازم أألس عليه هو بيقول اي كلام طبعا
قال بصمة صباع قال ياعم هو انت عارف تقعد ع النت في بلدك دي لما هتخش نادي ببصمة الصباع ؟فوق بقي..

واحد تاني في عيادة دكتور قعد ساعة يكلم صاحبه علي فوايد الحشيش وانه قرا علي النت انه مش زي البانجو والحاجات دي
بالعكس ده له فوايد صحية كمان حتي شكسبير كان بيضرب حشيش ودخلت معاه في المناقشة المتخلفة دي
وقولتله انا شايف انهم يدعموه واللهي للغلابة او يوزعوه علي بطاقة التموين وبعدين ده له كتب كتير في فوايده اكيد
زي كتاب "السكر السنترافيش في فوايد الحشيش " لابن ابي الحشاش
ومشيت وسيبته ورحت قعدت في حتة تانية ساعات تبقي مش عايز تخش في حوار الناس اللي جنبك لكن في مصر بتضطر فعلا غصب عنك
ماهو كلام ميعقلش برضه حشيش ايه بس اللي ليه فوايد ده حشيش النحل زي عسل النحل ولا ايه يعني ؟؟ وشكسبير كان بيشرب حشيش انا سمعت الاشاعة دي فعلا
قبل كده بس طبعا ده هري كبير يعني ..

والكذب بقي اللي علي كبير زي كذب الشركات الكبيرة زي شركات الانترزفت في مصر..اعذروني هو ميتسماش غير كده عندنا مش انترنت اكيد
لانه بسرعته دي المفروض يعمله فيلم تسجيلي عنه في اوروبا ويحطوا موسيقي حزينة بجد علي وضع التكنولوجيا عندنا والسنترالات
يقولك متصدقش كلام اي حد وخلي النت لاصحابه ههههههههه صباح الكدب البنفسجي مش الابيض
ده انتوا نتكم ماشي بنظام "هو كله نت نت مافيش شتيمة " وتقولي خلي النت لاصحابه طيب سيبوه لاصحابه بقي
وطبعا الكدب الحكومي انا معرفش لونه ولسه محدش في مصر يعرف لونه لانه خليط من كل الالوان مش ابيض ولا اسود ولا قمحي لون خيرك يا مصر حتي
كدب التصريحات والوعود والانجازات والمقترحات والبرامج الانتخابية والنزاهة والشفافية والمقالات الرسمية وغيره وغيره من الوان اكتر بكتير من درجات الالوان
وزي محلات الملابس طبعا اكبر نموذج كذب "البنطلون ده تركي..يوناني..امريكي..صيني..ومش عارف ايه واي كلام وهو انتاج مصانع الفار السعيد في مخزن ام حمادة اساسا

لكن في مصر "الكدب الابيض ينفع في اليوم الاسود "