الحكـم حدوتة لاخر فتـفوتة..الجزء الرابع

المرشحين مسكتوش بقي علي الاعلانات دي والحملة اشتدت قوي وبقت حامية الوطيس ..يا جااامد حلوة قوي الوطيس دي ..
وبالمرة نكمل بقيت المصطلحات المثقفة زي العصا والجزرو والمطرقة والسنديان وورقة التوت وعنق الجاجة كده انا سياسي في الجوووول..

جه بقي المعلم حمدين في الانتخابات وعمل حملته الجديدة ضد الحكومة زي اعلان اتصالات :

الحكومة دي مش بنحبها..
يعني اللي بقاله فترة وزهق منها..
والشاب المعارض الكاره امها..
يعني 80 مليون اتخنقوا منها..
والناس اللي اعتصمت و اتسرقت عندها..
يبقي حكومة حمدين دلوقتي وقتها..
حمدين..."دلوقتي وقتها"..



ورجع ايمن نور بحملة ضد البرادعي هو كمان ما هو كله بيخبط في كله زي اعلان سبرايت :

ايمن شاب جامد يعني البوكسر بالنسبة له شئ داخلي مش خارجي..
الحكومة بالنسبة له حاجة ملهاش اي تلاتين لازمة..
كان مصاحب رئيسة حزب وكانت مدلعاه..
يعني من الاخر راااجل مش ماااان..
وده لانه بيشرب سبرايت..
ايمن ..."هو كده"



ولكن الريس مسكتش فعمل اعلان زي بتاع فودافون بتاع العرايس الخشب كلمني شكرا :

راجل في الاتوبيس يغني: رصيدي خلص يا عالم مش عارف اكلم حد..
محتاج لدقيقة او اتنين علشان خلصان الكارت..
ست بترد عليه :رشح رئيسك يا معلم يديك ميت كارت وكارت..
اطفال في الشارع بتغني:
رشحني شكرا رشحني..
او خلي بابا يرشحني..
ابعت لماما ترشحني..

دلوقتي مع اختيارك الزعيم فترة جديدة هتاخد دقايق مجانية كتييييييييييييير..




ورجع بقي عمرو موسي ودخل بقوة باعلانه زي شيبسيكو وبيقول :

كده كده احكامنا مشرعة..
اه كده كده قوانينا مضلعة..
اه كده كده..
كده كده وزرائنا مطرقعة يلااااا
عمرو..كله يضلع نفسه..



وعاد الزعيم مرة اخري وقال انا هارفهكم انا هارفع مستوي معيشتكم ومش هتتكلموا ارضي كله هيغتني وهيعيش وده اعلانا الجديد :

اتكلم دولي يا ابن بلدي..
مع مين مش فارقة دي عندي..
لندن او منوفية..باريس واسكندرية..
الخدمة اكيد مية المية..
اتكلم دولي يا ابن بلدي ..
صوتك ده منغمش قوي عندي..
مع زعيمنا..كله هيتكلم دولي..



تظهر عبلة كامل في حملة البرادعي ..:

عبلة كامل: دي بقعة؟
الفلاحة: امال دي ايه بروح امك؟
عبلة: لا مش قصدي انا قصدي انها بسيطة هنزودها بشوية طين
الفلاحة: ليه القرف ده؟
عبلة: وكمان شوية روث بهايم
الفلاحة: دي انتي مقرفة كيك
عبلة: في فلاحة تقول كيك..ده انتي فلاحة نايتي خالص..
الفلاحة: خلصيني مش طالباكي
عبلة: وكمان هنضيف ريحة ابنك اللي مستحماش من شهرين
الفلاحة: احترمي نفسك يا ست انتي
عبلة: ودلوقتي دي بقعة معفنة معفنة يعني
الفلاحة: والله انتي اللي ست يتفاتلها بلاد
عبلة: كان زمان المساحيق مبتشيلش الكلام ده..البقعة دي زي الفساد بالظبط عايز تغيير
الفلاحة: اه فهمتك يعني " ويند اوف تشينج"
عبلة: مش بقولك فلاحة نايتي
الفلاحة: يعني ننتخب مين عشان البقعة الفاسدة دي تروح
عبلة: مافيش غيره طبعا..برادعيكو
برادعيكو.."بحبيبات القوة الزرقاء"..لا طبعا يا فالح يا اللي هناك مش الفياجرا !



والي اللقاء في حملات جديدة وانتخابات شرسة..