جت سـليمة يا عـم الحـاج

المطيباتي هو شخص بيطيب او بيشتغل الشخص الاخر بافعال تهون عليه او حتي مش علي الاشخاص بس ساعات بيطيب ع الاجهزة حتي
مثلا اليو اس بي بايظ واحد جانبك يقولك هاته بس ومالكش دعوة
تقوله يا عم هتعمل فيه ايه هتعرف تصلحه؟ يقولك ملكش دعوة بس هاته..وبسر غريب يقعد ينفخ فيه والمصيبة انه يشتغل في الاخر
يقولك شفت بقي ؟ وتقعد انت يا عيني مذهول

والناس اللي في ملاعبنا بتوع العلاج الطبيعي كتير منهم ولا علاج ولا نيلة هو يرشلك البنج ويطبطب واللعيب بيتلوي وتلاقي زميله كمان بيجري ويطبطب عليه علي اساس ايده بقي فيها الشفا
ونظام اطبطب وادلع في الطب الحديث مثلا

اسوأ نوع بقي المطيباتي العبيط زي فيلم محمد هنيدي فول الصين اما كان بيقول للراجل الصيني "يا اهبل..يا اهبل.."
حادثة كبيرة في الشارع والراجل اتقلب من ع الموتوسيكل وتقريبا رجله ادغدغت وداس عليها عربيتين والراجل بيجري عليه ويقوله "جت سليمة ! "
ههههههههه سليمة ازاي يعني ؟ حادثة دي ولا تسلخات يعني ؟ علي رأي امير البحار ..

تقعد في القهوة تلاقي الراجل وراك واحنا مغلوبين اربعة صفر يقول "معلش بس هنفوز ان شاء الله "
يا سيدي احنا في الدقيقة 80 يقولك الجون بييجي في ثانية يا عم ثانية ايه بنلاعب فرنسا يقولك ربنا كبير !
ايه علاقة ده باننا اتغلبنا خلاص ؟ لدرجة اننا قولتله طيب لو فوزنا خمسة اربعة في عشر دقايق هديك متين جنيه حالا اهو والغريبة ان الرجل تحمس وكاننا هنفوز بجد وضربت بكفي علي راسي ومش مصدق الراجل ده..

واكتر الكلمات المطياباتية زي "غمة وتنزاح" "سحابة صيف" "ازمة وتروح لحالها" حتي اللي في حالة ضنك يقولك ازمة وتعدي ..

الشعب المصري مطيباتي بطبعه ده اكيد بس انواع بتفرق عن انواع
مرة بقي تطييب من دول قلب بخناقة اقولك ازاي ساعات بنقول الحمد لله علي كل حاجة اتنين بقي سواقين طقشوا في بعض ع الطريق
نزل التالت صاحبهم والميكروباصات متحطمة تماما الراجل بيشتكيلوا بيقولوا "خرب بيتي الله يخرب بيته " قاله التاني بنوع من التطييب "الحمد لله "
اتخانقوا مع بعض ومسكه عجنه ع الطريق هههههههه افتكروا شمتان فيه مع انه بيطيب خاطره يعني بالحمد لله
وكلمة "ربنا كبير" برضه يا جماعة دي كلمة مطيباتية وطبعا ربنا كبير بس الكلمة دي مبترجعش حق ولا بتضيع ظلم يعني

انا بقالي ست سنين بقول "غمة وتنزاح" علي حال الانترنت عندي ومافيش فايدة الظاهر دي غمة مش قابلة للازاحة ولا بتحرك من مكانها

واكتر نوع منتشر بقي هو نوع "المواقف المركبة" زي ايه كل ما واحد مثلا بيته ولع يقولك احمد ربنا انك مكونتش موجود
واحد عربيته بتتحرق يقولك احمد ربنا انها مش العربية الجديدة اللي كنت هتجيبها قريب
واحد بنته ماتت في حادثة يقولك احمد ربنا ان انتوا مكونتوش كلكم في عربية واحدة
ياعم حمد ربنا واجب بس ليه دايما تتوقع الاسوأ يعني انا اقولك بنتي ماتت تقولي الحمد لله انكوا مش كلكم متتم هههههههه ايه النق والسيرة الهباب دي ياعم راعي شعوري طيب
واكبر مطيباتي طبعا كلنا عارفينه "حكومتنا الجميلة" بيعملوا دايما "تقرير ختامي للتطييب " كل سنة وتقارير تطييب الخاطر للشعب
وشوية تصريحات التطييب في كل عيد عمال وخلي الشعب يعيش يا عم
يعني التطييب عندنا من اكبر راس لأصغر راس يعني صنعة مصرية بالبلدي كده
ومعلش اعتبروا الموضوع ده "سحابة صيف" !