اضغــط ع الــرقم واحــد

اهداء الي خدمة العملاء في جميع الشركات..
"شرفنا باتصال يا افندم"



يارا ومحمود كانوا اكتر من حبايب من سنين كتير فاتت واتخطبوا من فترة قريبة لكن فجأة قررت سارة انها تشتغل وكان فاضل علي جوازهم شهرين:


يارا: انا عايزة اشتغل اشمعني انت يعني

محمود: ايه حركات العيال دي..اشمعني انا ايه؟ انا راجل

يارا: انا راجل؟؟ يعني هتعملي سي السيد من دلوقتي

محمود: وانتي هتعمليلي نوال السعداوي ؟؟

المهم الخلاف منتهاش وبعد فترة من الخصام :

محمود : خلاص يا فلينة قلبي من جوة انا سامحلك تشتغلي اللي انتي عايزاه

يارا: ههههه اللي انا عايزاه ..ده سي السيد بقي اي كلام خالص..يعني اشتغل رقاصة مثلا ؟

محمود: يا حبيبتي انا رهن اشارتك بس انتي قشري ..ولو رقاصة انا انقطك واشخلعك

يارا: لا انا هاشتغل في وظيفة في شركة موبايلات

محمود: هتشتغلي ايه هناك ؟

يارا: خدمة عملاء


وبعد مرور يارا بشهور من التدريب المتواصل وفترة عمل اسبوع عادت في احد الايام بعد الاجازة الي منزل والدتها القديم وكانت المفاجأة :

ام يارا: ازيك يا حبيبتي وحشتيني جدا الشغل واخدك مننا ..وعاملة ايه مع خطيبك

يارا "بعد التأثر بخدمة العملاء" : تمام يا افندم..لحظات معايا اغير هدومي وارجع لحضرتك ياريت تخليكي ع الانتظار

ام يارا "لنفسها" : انتظار؟؟ البت لسعت ولا ايه ؟؟ هو عملها ايه المهبوش خطيبها ده ؟؟

وبعد تغيير ملابسها :

يارا: اتفضلي يا افندم اسفة علي التأخير

ام يارا: مالك يا بنتي حصل ايه ؟؟ انتي مالك بقيتي عاملة زي مازنجر كده ؟

يارا: مازنجر؟؟ مش فاهمة حضرتك يا افندم

ام يارا: افندم ايه وبتاع ايه انتي كنتي متخانقة مع خطيبك ولا ايه

يارا: لا ابدا يا افندم بس مكلمتوش من "فترة محدودة"

ام يارا: فترة محدودة؟؟ لا حول الله يارب البت لسعت ع الاخر..



وفي منزل صديق محمود :

سعيد: اهدي بس ياعم هو ايه اللي حصل يعني

محمود: بقولك يارا بقت مش هي خالص دي بتقولي يا افندم

سعيد: يعني حاسس انها بتخونك ؟

محمود: بتخونني ايه انت كمان ..بقولك بقت غريبة جدا ومعدتش عارفها بقت بتكلمني اكني واحد من العملاء في الشركة ..دي بتقولي ياريت تشرفني بزيارة

سعيد: هههههههه طيب وايه اللي مضايقك كلمها بلغتها يا عم

محمود: تفتكر هتجيب نتيجة

سعيد: طبعا الصدمة دي هتفوقها كلمها بنفس الطريقة وهي هتفوق من الل هي فيه



وفعلا استمع محمود لنصيحة سعيد وبدأ بالتدرب علي اللهجة الغريبة حتي ايقنها تماما ..وفي احد المحادثات التليفونية :

يارا: استاذ محمود..ازيك يا افندم شرفني مكالمة حضرتك

محمود : حصلنا عظيم الشرف يا افندم بس قبل ما اكمل مع حضرتك ياريت اعرف بعض البيانات

يارا: بيانات ؟؟

محمود: دقايق معايا حضرتك وهاوفيك بكل الاخبار حالا

يارا: استاذ محمود حضرتك بتكلمني كده ليه ؟

محمود : للرومانسية اضغطي رقم واحد للنكت والفرفشة اضغطي رقم 2 للهلس كله اضغطي رقم 3

يارا: انا اسفة يا فندم مش مسموح لي انا في وقت شغل دلوقتي

محمود: ممكن تكلميني في اوقاتي الرسمية من 8 صباحا لحد 8 مساءا يا افندم اكون شاكر لحضرتك

يارا "تفوق من الصدمة" : محمود انت بتقول ايه ؟

محمود "لم يستطيع التخلص من المرض" : بقول لحضرتك يا افندم علي اوقاتي الرسمية

يارا "بعد الشفاء" : رسمية ايه وزفت ايه .انت بتتكلم كده ليه ؟ انت عيان ؟

محمود: سعداء بمكالمة حضرتك جدا وياريت تشرفينا بمكالمة تانية مع السلامة..تيت تيت تيت



لم تدري يارا انها كانت السبب الرئيسي الذي جعل محمود ..هو انا بكتب بالفصحي ليه ..بص تحت هاقول السطر ده تاني بلا خوتة..
معرفتش يارا انها كانت السبب الرئيسي اللي خلي محمود يتكلم بالطريقة دي ويجيله هذا المرض اللعين مرض "خدمة العملاء"
ومرت شهور وشهور ومفاقش محمود ابدا


وكانت اخر كلمة بينهم :

"دبلتك اهي يا افندم تحبي حضرتك خدمة تانية ؟ "