Saturday, May 8, 2010

الحـكم حـدوتة لأخـر فـتفوتة..الجـزء الثـالث






بنكمل الحملة الانتخابية للرؤساء بتوعنا بعد الحملتين الاولي والتانية عشان الانتخابات بتقرب بقي
والمنافسة علي ودنها كل سنة وانتوا طيبين وعقبال ميت سنة حكم ان شاء الله

بعد الحملة الاولي والتانية اضطر الزعيم يعمل اعلانات جديدة لتكثيف حملته الدعائية وبدأ باعلان

مقرمشات "سو ماتش":

اول الاعلان قطة كارتون كده بتطلع وبتغني "جرب نار الغيرة يا ايمن "

"مين ايمن ده ؟ ده انا انسفه "
"ابقوا شوفوا بقي مين اللي هيطفي نارهم ؟ "

وفي نهاية الاعلان ..

"زعيمنا جامد ..ومالوش في الهتش "



ولكن البرادعي مسكتش وعمل اعلان جامد موت وجاب فيه احمد عز بعربية كروز جديدة :

احمد عز بيدخل العربية :

" العربية ناعمة بس الطرق مكسرة
العربية مالهاش صوت بس خبطها في البلاعات ليه صوت جامد..
العربية شكلها حلو بس بسبب المجاري لونها اتبهدل ..
وكل ده بسبب الاهمال والتسيب.."

وفي نهاية الاعلان بينزل من الكروز وبيقول "انا بحب كروز والبرادعي وبس ".



وايمن نور مسكتش جاب حملة اعلانات تي ايه داتا الجديدة وقيفها علي مقاسه :
في بداية الاعلان واحد بيدخل مصلحة حكومية وبيقولوا هنخلص الورق في يوم
وقعد الراجل يومين وتلاتة واربعة وخمسة
وفي نهاية الاعلان بيقولوا "مش اي حد يقولك حاجة تصدقها ..
الزعيم ليه 70 في المية من سعة الحكم في مصر ..
بس ايمن نور ليه التلاتين..
"مع ايمن.. ادي الحكم لاصحابه "




وبدأت الاغاني الساخرة من الحكم تظهر في حملات الرؤساء :

وعملنا اغنية جديدة للحكومة

"جدو زعيمنا عنده ايه ؟
اايه ايه اوووه..
حكومة تهب هوبة تشب..
تحب اللعب وتنزل لعب..
وزير مجنون يصحي من النوم ..
وينزل سرقة في قوت الشعب..
جدو زعيمنا عنده ايه..
ايه ايه اوووه..
رشاوي كتيرة وسرقة تقيلة..
تجيب الفقر وتمحي الشعب..
وفساد بينونو هوبة يهوهو..
يجيب الضغط لقلب الشعب..
جدو زعيمنا عنده ايه..ايه ايه هوووه..




وطبعا عمل ايمن لحملته اغاني وهو نازل من بالون من السما وبيرمي حمص وعسلية وفاتح اغنية :
"ايمن نور بيقولكم..
يقولنا ايه؟
ايوه انا جيب وجايبلكم..
جايبلنا ايه؟
جوز ولوز ومشبك..وحلبة صفرا علي ترمس .."



وطبعا دخل الاخوان باناشيد اسلامية ولكنهم اختاروا الدعاء المشهور "مولاي" اللي بييجي في اذاعة القرأن الكريم عشان يغيروا فيه ويبقي شعار الحملة :


وبعد التعديل : وهو موجه للزعيم :

"اخواااااااااااان يا اخوااااااااااااااااااااان..
اخوااان نحن سنجعل حكمك طوع يدي..
والناس تريد زعيم سواك يا جميل..
اخواااااااااااان يا اخوااااااااااااااان.. "



وبدأ ايمن نور في حملة جديدة طحن باغراء الناس في نهاية الاعلان بتاع الحاجات الصيني :

"عايز الحلل دي كلها لأ مش ب 400 جنيه ولا 300 جنيه ..
السعر مفاجأة..
بس انتخب ايمن وهنديك كل الحلل دي مجانا..
ايوه مجانا وكمان البطانية اللي بتدفي هدية معاها..
"الحبر الفوسفوري زائد مصاريف الشحن "



ومسكتش البرادعي وعمل اعلان جديد جدا بيقول :
واحد بيقول في الاعلان لواحد تاني: انت بتاكل ايه ؟
قاله: انا باكل شيبسيكو وانت ؟
قاله: لا طبعا باكل برادعيكو
قاله:برادعيكو..؟؟
قاله: طبعا النص الاول من معاهدة برادعيكو بيقول اوعي تنتخبه في الخباثة..
ويظهر طفل صغير : هو ايه معاهدة برادعيكو دي ؟



وعاد زعيمنا لعمل حملة جديدة لقيادات الحزب وعمل خطابه زي حمادة هلال وقال :

الزعيم: ايه يا جماعة الحكم حلو؟؟
الناس: حلو قوي قوي
الزعيم: الحكم حلو؟؟
الناس: حلو قوي قوي
الزعيم فجأة مسك الميك في ايده :
طب ما تقولوله حاجة ده..
طب ما تقولوله حاجة ده...
الحكم حلو ااااه حلو قوي قوي

مع تصفيق حار في القاعة ورقص جامد جدا


وربنا يعدي الانتخابات علي خير..الحكم حدوتة لاخر فتفوتة..



No comments: