Saturday, September 13, 2008

الشيخ كنافة

عندما قرأت أخر فتوي أو أخر نكتة لم ألحظ الفرق بينهما لأن الفتاوي الأن صارت تضحكني أكثر..

سمعت أخر فتوي ؟ده سؤال يمكن مكانش بيتسأل من زمن فات لكن دلوقتي بقي خلاص كل يوم وكل ساعة مش ملاحقين ع الفتاوي العادي منها والغريب..
أخر فتوي حصلت من يومين تقريبا كانت تحريم أكل الزلابية في الجزائر ..عارفين ليه؟لأنها بدعة وكل بدعة ضلالة وكل ضلالة في النار..وفي نفس الوقت تجوز الرشوي لإنها تيسر الأعمال
كل ده في الجزائر..وأخر فتوي في السعودية بقي هي جواز قتل صاحب أي قناة فضائية ..يعني تقابله في الشارع تقوله إنت بتاع ميلودي يقولك ايوه تطلع مسدسك فورا وتديله ..
طيب انا كده مقدرش أقول إلا جملة أحمد السقا بقي من النهاردة مافيش فتوي انا الفتوي ..طالما الموضوع بقي كده طيب أنا هأفتي بقي ومحدش هيعارضني لإما يروحوا يعارضوا الناس دي الأول..



الفتوي الأولي: تحريم الإسكوتر
السبب: مهلك للبدن ..مانع للنعم ..والقليل منه يطيب ..
وأيضا لأنه تشبه بالغرب..


الفتوي الثانية: عدم جواز أكل الكنافة اللي بشعر..
السبب:في باب عدم جواز اكل الجامد ..بس ممكن تاكل الشديد!..
ولشعرها الغزير وعسلها الوفير ..ألا لعن الله أكلها وبالعها..


الفتوي الثالثة: عدم جواز بخ مزيل العرق "أكس" أكثر من ثلاث..
السبب: في باب "الأكس إفيكت" وتأثيره..ولأنه مغري للنساء ما شاهدنا في الإعلان..


الفتوي الرابعة: عدم جواز مسك "الماوس" باليد اليسري..
السبب:في باب "هو كده" صفحة 10..


الفتوي الخامسة: عدم جواز لعب السودوكو..
السبب: لعب السودوكو في نهار رمضان مفطر..وفي ليله مفقر..
وهي لعبة تشتت العقول وتضللها ..لعن الله لاعب السودوكو..


الفتوي السادسة: تحريم تدريبات شركة إتصالات للفك عشان تتكلم براحتك..

الفتوي السابعة: تحريم شرب البيبسي إلا وشربت ورائها كوكاكولا ..لكي لا تشجع أحمد حلمي علي حساب كريم..وتشجع الإحتكار..

الفتوي الثامنة: تحريم الدخول علي الإنترنت إلا بمحرم..

الفتوي التاسعة: تحريم مشاهدة إعلانات الضرائب أسوأ سلسلة إعلانات في المجرة لما فيها من سفه وتضليل..



وياريت تمشوا علي الفتاوي بتاعتي وهتبقوا زي الفل ان شاء الله ..والدفعة الجاية من الفتاوي هتبقي بالدفع بقي .اللي عايز يحلل حاجة معينة او يحرمها ..
هاعمله فتوي تمام ومتفصلة ..ولا بتوع الفضائيات.

2 comments:

Anonymous said...

الله اكبر... انا بلف علي المدونات كلها علشان اكون اول واحد يكتب كومنت
طبعا الفتاوي دي هطل في هطل والي عاوز يفتي يفتي..
هما مش بيقولوا من قال لا اعلم فقد فتي
مابالك باه بالي قال اعلم
كمان بيقولك الفتوي الجديده في مصر ان الزنا اول مره حلال نظرا للظروف السيئه في مصر وان البني ادمين مش عارفين يتجوزوا والي زنا مالهوش عقوبه
يا عم دول بيستهبلوا وربنا
الله يهديهم
عمر خالد الديب

معـــــتز هــاني سعد said...

شرفت يا ريس ..زي ما انت قلت فعلا الفتاوي بقت اي مهلبية واي مفتي بيطلع يرجع علينا بكلامه مش عارف ازاي الموضوع بقي سداح مداح كده واللهي ومالهمش عقوبة ازاي ؟ربنا يهديهم ويبطلوا عك بقي