طلعت مصطفي وسوزان تميم..موضوع في الصميم

لو معاك كام مليار كده تعمل ايه..ممكن نسأل السؤال علي كذا واحد .
واحد هيقولي أشتري حمام واطيره..التاني هيقول أبعت لنفسي رسائل مصورة كل يوم لحد ما اخلص رصيدي ..
واحد يقول هشحن بمليار وأسمع الرسالة بتقول"رصيدكم الأن هو مليار و 50 مليون جنيه"..ممكن تبقي دي اجابات غبية جدا ..
لكن طلع طلعت من تحت وقال اسمع اجابتي..
اتفضل يا طلعت ..قال طلعت" اعمل حفلة خاصة واجيب فيها سوزان تميم"..لا لا لا سامحني يا طلعت الإجابة غلط..
ده أسوأ إختيار يا ابني ..ايه الغباء ده..سوزان تميم مين والناس نايمين يا ابني..انت مبتشوفش التليفزيون ولا ايه..طيب ليه مش هيفاء وسامحني يعني ..ليه مش نانسي عجرم ..السؤال هو من وجهة نظر تانية..
ليه سوزان تميم؟

اذواق غريبة برضه..بس مش ده موضوعنا المهم هو الراجل ده هيطلع براءة؟واحد هيقول طبعا هيطلع اذا كان بتاع العبارة اللي غرقت طلع براءة وأكياس الدم طلع براءة يبقي اللي قتل سوزان مش هيطلع؟يعني هي سوزان مبارك يعني..
يا عم ده عندها شقة بس ب 3 مليون دولار..اللهم احفظنا دول دفعتهم كاش ولا قسط يعني..والشقة دي أكيد تشطيب سوبر لوكس بقي ولا كام متر يعني؟..هو ممكن أتخيلها إن الأكر في الأبواب ماس والحمام من العقيق..والمطبخ كله أحجار كريمة..

السيراميك مصنوع من حجر نادر في شمال الصين ..بيني وبينك انا برضه عايز أقتلها..
طيب أكيد عندها مجات للشاي حلوة بقي في الشقة دي بأربعة مليون دولار ..بس محدش جاب سيرة المجات دي في التحقيقات خالص مش عارف ليه..
وطبعا السرير ممكن يكون جواه دش أصلا أو بينفد ع الشارع أصحي الصبح أتاوب في الشارع العمومي..

طيب مجموعة ناس قاعدة ع القهوة وخبر زي ده ييجي في التليفزيون ان عندها شقة بالمبلغ ده ..فجأة هتنقلب القهوة مدبحة الناس هتقوم تضرب في بعض من اللي سمعوه ده..
أيوه يا جدعان شقة بالتمن ده من شريط واحد فاشل عملته مطربة مغمورة...طيب دلوقتي بسأل نوال الزغبي عندها كام ودي عمرها الفني قد سوزان عشرين مرة..

وكلما زاد الفقر ممكن يتاخد الخبر كنكتة..يعني الطبقة المتوسطة مثلا تقول"شفت يا عم بيقولك سوزان تميم عندها شقة بملايين"..وطبقة أفقر تقول"ناس بتهرج وبتقول ان سوزان تميم عندها شقة بملايين"..
والطبقة الفقيرة خالص "بيقولك مرة واحدة عندها شقة بملايين الدولارات هاهاهاهاها"..

طيب والبورصة المصرية تقع كالعادة لأي سبب رئيس مجلس ادارة شركة مات تقف البورصة واحد يتقبض عليه الناس تبيع وتقف البورصة..ايه الحكاية؟
خايف مرة تقف البورصة بسبب إعصار في جزر الهونولولو..الناس مبتفكرش بتبيع وخلاص وتوقع البورصة ..
واحد يطلع يقولك "الحق طلعت مصطفي اتمسك"التاني الغبي يرد عليه "يا نهار ازرق ده انا شاري في شركة قصب سكر أما الحق أبيع"
طيب دي شركة قصب مثلا مال أمها بشركة زي طلعت مصطفي ..!!

طيب من ناحية تانية هل في مطربة فرحت أو شمتت؟
بيتهيألي مستحيل لأن وزن سوزان الفني كان ضايع خالص ملهاش غير أغنية واحدة عدلة بس غير كده في الضياع..يعني نوال الزغبي ممكن تفرح لو سميرة سعيد ماتت مثلا ..أو عمرو دياب ممكن يفرح لو رامي صبري وتامر حسني ماتوا ..
انما متقوليش ان اليسا تفرح لو شعبولا مات ..

وطبعا ميت فنانة هتطلع وتقولك دي كانت حبيبتي ده انا كنت اختها الكبيرة دي كانت دايما بتلجألي في مشاكلها ..اه يا ناس يا سو يا غجر ..بيطلعوا أول ما الواحد يموت..غير كده ولا شافت سوزان دي اصلا..
الله يرحمك يا سوزان ..جملة صعبة شوية ..بس مش هينفع أقول الله يحرقك يا سوزان ..اذكروا محاسن موتاكم...
طيب اهلها اما يروحوا التربة هيحطوا علي قبرها سيديهات يعني ولا ايه؟..ولا شوية كليبات كده..
"فقيدة الشباب"محدش افتقدها بصراحة..طيب ممكن نقول "فقد الفن ضلعا مهما" لأ برضه ولا ضلع ولا فخد..طيب مش مهم لقب معين ..

طيب طلعت لو خرج من القضية براءة هيمشي مع مين بقي المرة الجاية؟..ودلوقتي عرفت ليه سمها "مدينتي"..ايوه مدينته وهيجيب فيها حريم زي ما هو عايز ..حد عايز حاجة؟
أكيد كات سوزان بتدلعه وبتقوله يا طلعوتي مثلا مع انه دلع بايخ أوي..

أنا بقيت بقرف اوي من الوسط الفني وكمان وسط الناس اللي زي طلعت دول ..وساعات بقول لنفسي الفنانة دي شكلها محترم وارجع اقول طيب ايه كان عيب سوزان تميم ما شكلها محترم برضه..

جيبت في سيرة ام الناس كلها واحنا في رمضان بس مش مشكلة احنا بعد الفطار..
وبعدين ما "البنا" قال ..التدخين حلال في رمضان..قشطة كيك..يبقي اكيد النميمة ممكن نلاقيلها حل ..واللي وراه مشوار مهم ..حفلة تامر حسني مثلا في أي خيمة ممكن يفطر بدري لأنه علي سفر ولازم يلحق الحفلة ..لأنه طالب هلس..
طيب بس المفروض محدش قال "اطلبوا الهلس ولو في الصين"..تمام يا طلعت؟