كلنا عارفين فيلم ارض الخوف بتاع احمد زكي اما دخل مهمة سرية محدش يعرفها الا اشخاص معينة عشان يكون جزء من تجارة المخدرات في البلد
مع انه اصلا تبع الامن ويبلغ عن كبار مهنة المخدرات بعد اما يكون كبير زيهم في المخدرات..
دلوقتي الفيلم ده المفروض يتعاد بالظبط بس بدل المخدرات لأ يبقي مقدم خدمة انترنت فاسد لان المهنة دي بقت مستفحلة ومحدش فيها بيسأل عن شكوي ولا غيره
وبقت زي المخدرات بالظبط في الانتشار بس يمكن حتي المخدرات الناس لو اشتكت فيها التجار هيعدلوا الصنف ولكن شركات الانترنت لا استجابة علي الاطلاق..
في بداية الفيلم تبدأ الموسيقي ويجلس احمد زكي الجديد في صالة بلياردو :
احمد زكي "محدثا نفسه" بيحل الكلمات المتقاطعة : كلمة "سرع" معكوسة ؟ معقولة ده سؤال يكتبوه في الكلمات المتقاطعة؟؟ اكيد قصدهم معناها مش عكسها..ايه المسخرة دي ؟
يقاطعه شخصا ما : اتفضل معانا
احمد زكي: ايه يا باشا واللهي العظيم مجاوبت السؤال..انا سيبته فاضي
الشخص: لا عشان سبب تاني خالص متقلقش
يغموا عين احمد زكي ويخدوه علي قصر كبير ويقابل هناك الكبير :
الكبير: انت بقي العقيد احمد سالم ؟
احمد زكي: انا احمد زكي
المخرج: ستووووووووووب ..ايه يا عم احنا هنهرج ..ركز شوية يا استاذ
الكبير: انت بقي العقيد احمد سالم ؟
احمد زكي: امال يعني كبير الفخايدة؟
المخرج: اقسم بالله لو الموضوع ده اتكرر هاجيب ممثل تاني فااااااااهمين ؟
الكبير: انت بقي العقيد احمد سالم؟
احمد زكي: اه انا ..
الكبير: انت مطلوب معانا في مهمة رسمية
احمد زكي: اخيرا افتكرتوني ده انا مرمي من فترة ع الرصيف زي الكلاب ده جزائي يعني؟
الكبير: مصر محتاجاك جدا
احمد زكي: وانا محتاجلها
المخرج:ستووووووب.. وانت محتاجلها؟ اقرا السينارية عدل يا استاذ حرام عليكو بقي
الكبير: عايزينك في مهمة غاية في الخطورة
احمد زكي: اكيد بتتكلم عن موضوع فساد الانترنت في مصر
الكبير: اه طبعا ده اكبر موضوع ع الساحة
احمد زكي: انا جاهز لخدمتكم
الكبير: المهمة مختلفة شوية عن كل المهام السابقة
احمد زكي: المهم الفيلم فيه بوس؟
المخرج: ستوووووووووووب..يا استاذ ابوس ايدك..اه يا سيدي في بوس بس مش م الاول كده لسه بدري ..حرااااااام عليكم بقي هاعتزل الاخراج
الكبير: انت هتكون موزع خدمة انترنت في مصر وهتكبر مع الكبار في المهنة دي وبعدين تبلغنا عن فسادهم..والمهمة دي مش هيعرفها الا انا ووزير الداخلية والحاج محمد اللي علي ناصية شارع القلعة..
المخرج: ستوووووووووووب..انت بتقول ايه انت كمان..الحاج محمد مين اللي هيعرف المهمة؟؟ ماهو كده كل مصر هتعرف المهمة يا اخي ..واللهي هاعتزل..
احمد زكي: طيب طالما المهمة سرية وانتوا بس اللي هتعرفوها عندي سؤال بسيط
الكبير: اتفضل
احمد زكي: انا دوري ايه بقي وانتوا بس اللي عارفين؟
الكبير: يا نهار ازرق..انت اللي هتقوم بالمهمة يا ع............
احمد زكي: هو ايه حكاية الكلمة دي النهاردة دي جتلي برضه في الكلمات المتقاطعة..حاجة غريبة ..
الكبير: وطول الفيلم هتقعد تتكلم بصوتك وتحكي ذكرياتك خطوة خطوة لحد ما تكبر وتبعتلنا اول باول اللي بيحصل معاك
احمد زكي: تمام يا افندم
وانطلق احمد زكي لمهمته لدخول هذا القطاع الفاسد في البلد ومحاولة الابلاغ عن بطئ الخدمة او فساد مزود الخدمة
بعد مرور عشرين سنة...
صوت تخين لاحمد زكي في الفيلم محدثا نفسه :
لم ادري كيف فاتت هذه السنين وانا رهين هذه المهنة الوقحة..لا اعرف اصلا هل يسمعني احد ام اصبحت رهينا للفساد الذي طالني ايضا
تري هل مازال اصحاب الامر يقرأون ما اكتب ام يفضلون عليه مجلة ميكي..!
تري هل اصبحت سرعة 1 ميجا في مصر تعطي الداونلود المطلوب ام طالها الفساد !
كيف ساخرج من هذا الفخ بعد كل هذه السنين ام انني تعودت علي الفساد !
وفي مشهده الشهير مع عبد الرحمن ابو زهرة في الجامع :
عبد الرحمن: جايلك جواب يا استاذ
احمد زكي: هم بعتوك؟
عبد الرحمن: هم مين؟
احمد زكي: قالولك ايه؟
عبد الرحمن: عبيط ده ولا ايه؟
احمد زكي: بلغهم اني لسه بقوم بدوري وهاصلح اليوتيوب في اقرب وقت وهابلغ عن اي مخالفات
عبد الرحمن: ده جواب من شركة بم بم بتاعة اللبان اللي انت بتبعتلها بقالك عشرين سنة وبيقوولك عايزين ايه ؟
احمد زكي "متنرفز" : بم بم؟؟..بم بم يا كللللللللللب..
ويديله حتة دين قلم طير عبد الرحمن علي الارض
عبد الرحمن: يا عم انا ذنبي ايه ..انت اللي بتبعتلهم وقرفتهم بجد عايز ايه من شركة لبان؟
احمد زكي: عايزين تلبسوني جو فيلم "فايت كلب" لااااااااااا مش انا ..انا مش مجنون
عبد الرحمن: فايت ايه وبتاع ايه؟ ياعم انا مالي..انا ساعي بريد
احمد زكي: اخررررررررس يا كللللللللللللللب
ويديله حتة قلم تاني اقوي من اللي قبله
عبد الرحمن: انت ياعم انت المخرج قال هو قلم واحد..ايه اللي بتعمله ده؟
المخرج: ستووووووووووووووووب..انتوا بتقولوا اييييييييييييييييه؟ المخرج قال؟؟ دي كلمة تتقال في الفيلم؟؟
احمد زكي: يعني بم بم هو اللي منطقي بروح امك؟
يظهر صوت احمد زكي مرة اخري محدثا نفسه:
تري هل فعلا كنت اراسل بم بم ؟؟ ولماذا اخترت شركة لبان تحديدا..يمكن عشان الناس "فرقعولي" ؟
تري هل كنت موهوم فعلا طوال المدة التي مضت ولم يكن النت بطئ في مصر اصلا ؟
تري هل استطيع الخروج من هذا الوحل ام اني ساظل حبيسا فيه كموزع فاسد للانترنت ؟
وتري امتي هبطل كلمة "تري" اللي بقالي ساعة بقولها في الفيلم دي ؟ وياتري بتتكتب كده ولا بالطاء ؟
ويجري احمد زكي الي اجهزة الكمبيوتر بسرعة ويقول: لااااا انا مش مجنون ..ده النت بطئ انا متأكد
ثم ياخذ نفسه عندما يجد النت فعلا بطئ وانه في مهمة حقيقة ومكانش بيتهيأله ولا حاجة
احمد زكي: الفيلم قرب يخلص وانا مبوستش
المخرج: خد ياعم البطلة اهي
احمد زكي: ايه ده انتوا بتهرجوا؟؟ ده فيلم كبير..انا عايز ابوس يسرا علي اقل تقدير يعني
المخرج: ياعم دي حلوة ومزة كمان
احمد زكي: لا يا عم انا عايز يسرا ماليش دعوة
فرح: ايه الهبل ده هو انا ايه دوري بالظبط اتباس ؟؟
احمد زكي والمخرج وكاست العمل في صوت واحد : ايوه..!
فرح تغادر مكان العمل ويفرح احمد زكي ويقول: الحمد لله هيجيبولي مزة بقي
وفعلا تتحقق الاحلام ويبوس احمد زكي وكمان يتم القبض علي جميع موزعي الشركات
اللي كانوا بيحطوا مكان "الباند ويدث" تفافة ..
ويقابل الكبير مرة اخري ويسلم عليه في نهاية مختلفة :
الكبير: مبروك
احمد زكي: اخيرا خلص الفيلم ده انا بوست بوس يا برنس
الكبير: كل اللي عارفين السر ماتوا معادا انا
احمد زكي: امال ايه موضوع بم بم ده؟
الكبير: ده اسمنا الحركي
احمد زكي: ههههه العبي يا حكومة
الكبير: افندم؟؟؟
احمد زكي: احم..قصدي يعني حركاتكوا جامدة قوي
الكبير: المهم المهمة نجحت وهنرقيك وهندخلك مهمة سرية تانية المرة دي للكافيهات اللي فيها بلاي استيشن
احمد زكي: انا معاكوا دايما يا افندم وتحت امر مصر
وفي نهاية الفيلم يظهر فيديو يو تيوب بيحمل بسرعة وعلم مصر يرفرف بعد انتهاء فساد مافيا الانترنت..
ارررررررررررض الخوووووووووووف
Posts
1 comment:
واحلي سلام لعمو بم بم
:))
Post a Comment